Read Zeme Naga EZEKIEL 12 Bible Online

EZEKIEL 12 - Zeme Naga bible

EZEKIEL 12

¹Tingwang gu sam a dage wang kadai de lei,

²“Ziemmena na gau, ka’nggime penui mâ-ngau ra hemik bam lu, kane ngau mak, zai seurabe kun bam lu, kane seumakme ruage nang bam de lei;

³penui â ka’nggime kiduîme dadegeu. Chidadege nang ziemmena na gau, kebang hang nîmtatme gum ze ning put ramme teleu le lau, ’nrîmbeting penui ngaube gene nang zuapat lu ze kebang changbe gum ze kêdabe bâm ’mbe nang tat lau, penui ka’nggime kiduîme chang leusede mâ-ka’nningbe bam lêu gu lei.

⁴’Nrîmbeting ge ning put ze penui ne ngau sing ra kebang changrabe put gum ze ning gu merua tei lu ze nang zuapat ra lei; ning pum sing ne du penui mikngau ge heram kêda ’mbe tatrapeu gum ze naimik hegî ge nang tat ra lei.

⁵Penui mikngau gene kerie tewput lu ze chigene ning gu kerua teipelapat ra lei.

⁶Penui mikngau ge ning keîtoa gene ning put pua lu ze tingmuî ge nang zuapat ra lei. Zai heram ze nang ne ngau mak ra ning ju tapnam ra lei, Israelbe kiduîme hangge I ne dak teiliabe chang daseu,” ze acheu zeu.

⁷Tingwang ne achu samde peibeibe luigum ze I tew de lei, kebang changrabe put gum a put ze ’nrîmbeting ge I pungpat te lei, zai hegî ge a ba ne kerie tewput te lei, zai tingmuî ge penui mikngau ge I ne a gu kerua a keîtoa gene pua lu ze I zuapat te lei.

⁸Zai hechua ge Tingwang gu sam a dage wang de lei,

⁹“Ziemmena na gau, Israelme ka’nggime kiduîme ne, ‘Nang ’ndaikau tew lau’ acheu mak se mei?

¹⁰Penui je, ‘Tingwang HERA ne acheu sa lei: Aipau sam keliâbe ze Jerusalem ge besuitewme benai Israelbe kiduîme leine bamrabe tak rasam lei,’ acheu be lau.

¹¹Ningnui hangge I ne dak chang lei, ‘I ne tewliabe luigum ze penui peireige tew gu lei; penui je kebang hang nîmtat ku lei,’ ze rang gai be lau.

¹²Zai penui ruage besuitewme â kemuîbe luage pe keîtoa gene pe gu heput pua lu ze pa zuapat ku lei, pe gu heput teipelapat ra kerie ze penui ne bûngput ku lei. Heram ze pe mik ne ngauchi lak ra pe ju tapnam ra lei.

¹³A gu chîak pe peireige ’nsung gai gu lei, dezai a gu ’mpia ne pechu migit ’ndu lei; zai Kaldiaram dei ’mbe Babilon ge I ne nguatat ku, kane pa â chize ngau ra mak lei, zai chige pa chai gu lei.

¹⁴Pe huâzie ge pechu ’ngngârame zai pe baume je I ne hûtimrarip kai gu lei, zai penui chai hiazutkie ne penui je gua’nsa gu lei.

¹⁵Heramzat ramme ruage penui je I ne lang gai ze heram ramme ge penui je hûtimrarip kai bei dezai I ze Tingwang lei be penui chî gu lei.

¹⁶Kane herei gene, herakûm gene, zai herarît gene ziemmena gechâmne I ’nzuak kai gu lei, chime zene penui tatkaibe heram leine ge lung ze bamme (Jentailme) je penui telung ngaukatenetbe leine penui salia gu lei; zai I ze Tingwang lei be penui chî gu lei,” acheu zeu.

¹⁷Zai Tingwang gu sam a dage wangchang kadai lei,

¹⁸“Ziemmena na gau, kedun ze nang mâ-teu lau, zai kedun ze kehingbe gene hedui sak lau;

¹⁹zai heram ge lungme je salia lau, Israelram ge Jerusalem ge bamme tedeu ge Tingwang HERA ne aigum ze rang lei: Penui kehingbe gene mâ-teu gu lei, zai penui duângga ze penui hedui sak ku lei, chige lungme katîmphibe ziegene pe ram ze tew’nsia gai bei sâuhâmmuî gai be ra changdibe ziegeneu.

²⁰Dezaine penui kelungbe namdi ramme ’ngga kam du lei, zai heram ze sâuhâmmuî ’ndu lei, dezai I ze Tingwang lei be penui chî gu lei,” ze acheu zeu.

²¹Zai Tingwang gu sam a dage wangchang de lei,

²²“Ziemmena na gau, Israelme ram ge ningnui ne aipau samrekum teibe ’ndaikau rimba lau? ‘Betingtie di dege keliâbe ngaube ze mâ-pelamgabe chang gai di di lei,’ ze kacheube zeu.

²³Chidadege Tingwang HERA ne acheu ze rang lei, ‘Israelram ge aipau samrekum ze tei ra mak lei, aipau samrekum ze I ne tew’nsau ’nde lei,’ zeu. Kane penui je, Beting naimik nawang mui da, zai keliâbe zai keliâbe zat leine tewpui sing gu lei ze salia lau.

²⁴Israelbe kiduîme ruage keliâbe karasa bam ra mak lei, zai kemeu karasa bam ra mak lei.

²⁵I Tingwang ne I samsarabe ze sa gu lei, zai chize tewpui gai gu lei, chize beting tew’ntie ta du de lei. Hei ka’nggibe kiduîme gau, ningnui ringbe luage I sam sa gu lei, sam I sagai’ndibe I tewpui gu lei, ze Tingwang HERA ne rang lei,” ze acheu zeu.

²⁶Zai Tingwang sam a dage wang kadai de lei,

²⁷“Ziemmena na gau, pie le lau, Israelbe kiduîme ne acheu sa lei, ‘Keliâbe chuna ngaube â bechâng hang lei, pa ne rangliaka’ntuabe ramme ze bechâng-châng hangge ranglia lei,’ ze acheu zeu.

²⁸Chidaze Tingwang HERA ne acheu sa lei: A sam ramme katte beting tew’ntie ta de lei, a sam sagai’ndibe leine wangchang kam gu lei, ze Tingwang HERA ne rang lei be salia lau,” ze acheu zeu.