Read Zeme Naga EZEKIEL 13 Bible Online

EZEKIEL 13 - Zeme Naga bible

EZEKIEL 13

¹Tingwang gu sam a dage wangchang kadai de lei, acheu sa ze,

²“Ziemmena na gau, Israelme gu kemeume, penui lung ka’nningbe sam ne kemeu sam chang ze same je salia be lau, ‘Tingwang gu sam ’ngking le lau,’ acheu zeu!

³Tingwang HERA ne acheu ze sa lei: kemeu kemieme, penui lung ge ka’nningbe chaisui ze, mâ de penui ngau mak ze kemeu changme â penui duângga gu lei.

⁴Hei, Israelme gau, ningnui gu kemeume â keloa ’mpiedibe ge munserung ramme gum lei.

⁵Tingwang gu naimikpui mai kahereibe ge ningnui sapdangchi le ra, kerie bakeudibe bekak puttibe ningnui rie mak zeu.

⁶‘Tingwang ne rang de lei,’ ze penui ne pauliabe sam ze karasa lei, penui je I ne lang gai me lei, kane penui ne rangliabe sam ze wangchang sing gu lei ze penui ’nnum’mmi ze bam lei.

⁷Keliâbe betâugabe ningnui ngau mak mei, zai sam rangliaka’ntuabe karasa ningnui sa mak mei? I ne sa gai mak sedu ‘Tingwang HERA ne rang lei,’ ze ningnui kacheube lua’nsangne ge zeu,” ze kacheu de lei.

⁸Chidadege Tingwang HERA ne penui je, “Mâ-betâugabe ningnui sabe keliâbe karasa ne ngaube ziegene ningnui je I ka’nggi lei,

⁹Mâ-betâugabe keliâbe ngaume zai karasa ne rangliaka’ntuame kemeume je a ba ne I ’nggi gu lei; a gu ziemmena wangka’nduibe ge penui wang ra mak, zai Israelbe kiduîme gu leisi ge penui ji raw gai ra mak lei; zai Israelme gu heram ge penui gut ra mak lei, chidezai I ze Tingwang HERA lei be ningnui chî gu lei.

¹⁰Kemeume ne a gu ziemmena je ngua’mmie ze, lunghegeikatenaibe ga ze, ‘Lunghegeikatenaibe la lei,’ ze kacheube ziegeneu; zai herei gu kerie-riebe ge becham kaube kau’ntipmakbe ge, zai kemeume ne wang lu ze ’nnei ne ’nnukhâ gai bei de lei.

¹¹Mâ-kakeniakme je kerie ze bakêu gu de lei! Tingsim rui gai ra, pe peireige desak ruikeu gai ra, zai tingkaichibe ne pe peireige nupwang ra I ne lang gai gu lei be ze salia be lau;

¹²zai pie le lau, kerie ze bakêu di dezai, Ziemmena ’nteumena ne, ‘’Nnei ’nnuk-hâgaibe ’ndaige la lau?’ ze acheu mak ta ra mei?

¹³Chidadege Tingwang HERA ne aigum ze sa lei, A râtabe ne heratingkai ne mâ-tew’nsia ra lang gai gu lei, zai a lumpum ne tingsît kedibe ruikeu ra tew gai gu, zai a rata ne desak misongga ruikeu ze mâ-tew’nsia kam ra I tew gai gu lei.

¹⁴Chidezaine ’nnei ne kerie ningnui keniakkaibe ze I ne tewkau gai gu lei, zai chize kedei kangge keu gai gu lei, dezai bepung ze tew’nduduak kai gu lei; kerie ze bakêu du, zai chipau ruage ningnui ga gai du lei. Chidezai I ze Tingwang lei be ningnui chî gu lei.

¹⁵Chigum ze kerie benai chige ’nnei kakeniakme peireige a lumpum pei gai gu lei, dezai I ne, Kerie ze ga de lei, zai chi ’nnei kakeniakme du ga de lei,

¹⁶Israelme gu kemeume Jerusalem rasam rang’ntua ze desieyibe ga ze desieyibe la lei ze keliâbe ngaume ga de lei, ze ningnui je acheu gu lei, ze Tingwang HERA ne rang lei.

¹⁷“Zai ziemmena na gau, ning gu ziemmename ’mpuimi ramme penui lung ge ’nninggaibe sam ne kemeu sam chang ze mâ-rangka’ntuame je kiânam gai lau, penui je pau gai ze,

¹⁸Tingwang Hera ne aigum ze rang lei: Ningnui ’mpuimi ramme gau, miramme ba ge heduaî gu ’nraikak kai, zai heduaî gu peî’nkum hang heruigaibe ziegene ziemmena je nîm ra peume ningnui, ningnui duângga gu lei! A gu ziemmename gu keringbe ze ningnui ne nîm lu zai ningnui hang gierabe hanggene kêdame je ’nzuak kai ra mei?

¹⁹Hebakuî gene barli gechâmne, zai tingku gechâmne ngaurabe ziegene chaimakrame je tewchat, zai ringmakrame je tew’nring gai ra ningnui choa ze a gu ziemmename ne ka’nnumbe ziegene a gu ziemmena ruage a ji tewhebâ gai de lei.

²⁰“Chidadege Tingwang Hera ne aigum ze rang lei: pie le lau, ziemmena keringbe ningnui gu heduaî ’nraikakkaibe zene nimbe tak ze I ngaugailak lei; ningnui ba gene chiramme I ne tewtap ’ndu lei, ningnui ne nîm ra peube chi ziemmena keringbe ramme je I ne ’nruine je gum ze ’mpat kai bu lei.

²¹Ningnui peî’ngkum ramme du I ne hitri kam ’ndu lei, zai a gu ziemmename je ningnui ba gene lupat ’ndu lei, ningnui ne penui je tewchat ra ningnui ba ge penui bam ra mak lei; dezai I ze Tingwang lei be ningnui chî gu lei.

²²Ziemmena ka’nchibe kau lung I ne tewhereu gai mak sede, karasa ne ningnui ne pe lung tewhereugaibe ziegene zai ziemmena kesiabe kau pe chu tew’nring le ra hangge tâ-kesiabe tewbe gene heliwang mak ra ningnui ne gecheugaibeibe ziegeneu.

²³Hedapiebe tak benai kemeu gekungbe tâ tewbe hangge ningnui ngau dai ra mak lei; a gu ziemmename je â ningnui ba gene I ne lupat ’ndu lei. Dezaine I ze Tingwang lei be ningnui chî gu lei,” ze kacheu de lei.