Read Zeme Naga EZEKIEL 14 Bible Online

EZEKIEL 14 - Zeme Naga bible

EZEKIEL 14

¹Israelme ruage gechîngme hanggesame a dage wang lu ze a suage ’ntau gai de lei.

²Zai Tingwang gu sam a dage wang de lei:

³“Ziemmena na gau, aime â mâ-luîtewbe ramme penui lung ge teigut kai lu chize ’nrap lu ze penui kâurabe hang penui masuage kai de lei; penui ne achu mâ’nneu ra I pheu gu se mei?

⁴Chidaze penui je rang be lau, Tingwang HERA ne acheu ze rang lei: Israel kibaume ruage mi-mige pe lung ge pe gu heraluîtewbe ramme kai lu, pe masuage pe gu hemui ziegene mâ-’nraprabe kai lu, kemeu’mpeu dage wang sede, zai pe gu heraluî ramme misongga bam lêuzai du I Tingwang sing ne pechu kak ku lei,

⁵Dezai Israel kibaume penui gu heraluî ramme ziegene a dagene penui ’nnuktattibe gene penui lung ze I ne nîm le ra hangge zeu.

⁶“Chidadege Israel kibaume je Tingwang HERA ne aigum ze rang lei: Lungheliwang dai lau, ningnui gu heraluî ramme gene lungheli dai zu lau, ningnui ngaukatenetbe leine gene ningnui ju ’nnuk te lau.

⁷Israelbe kiduîme ruage mi-mige mei nune Israelme ram ge hesang chang ze bamme mei ze achu sâu ze mâ-luîtewbe je penui lung ge teichugai’ndime penui suage mâ-’nrap lu ze hemui ge kâugairabe tew lu ze, penui rasam achu ’nneu ra kemeu’mpeu dage penui tat dezai I Tingwang gîmsing ne penui je samkak ku lei.

⁸Chipaupeu peireige a ma ’nsua gai gu, achu pa ne sâu ’ndi de lei be salia bam ra a gu ziemmena ruage kaipatchâm ’ndu lei; chidezai I ze Tingwang lei be penui chî gu lei.

⁹Kemeu’mpeu je ’nchoâ ne sam sa ra tew gai dizai â I Tingwang ne chi kemeu’mpeu je choa de lei, pe peireige a ba getuapat kû, zai a gu Israelme ruagene pechu tew’ngga ’ndu lei.

¹⁰Penui gu hemuipâu â penui ne pung gu lei; ’nchoâ ne mâ-ka’nneupeu gesâbe ngau gum ze kemeu’mpeu du gesâbe ngau gu lei—

¹¹chidezai a dagene Israel kibaume tatlietat ta du lei, zai penui hedieka’ngkabe leine gene penui runne penui je tewhebâ ta du lei, kane a gu ziemmena chang le ra, zai I ze penui Rapeu chang le ra hangge zeu, ze Tingwang HERA ne rang lei,” ze acheu zeu.

¹²Dadege Tingwang ne a dage wangkeu lu acheu sa ze:

¹³“Ziemmena na gau, heramme ne hemui gai ze achu nei ta dizai â I ne a ba getuapat ze hetak hang ngaube bâm ze tew’nsia gai gu lei. I ne herakûm lang gai bei ze ziemmena benai hekaubena chai kam du lei,

¹⁴zai chi ziemmena hangchum, Noabe, Danielbe zai Jobbe chige ring ze bam sedu penui keringbe peireige runne penui keyibe zene tew’nring gai lu tau gu lei.

¹⁵Makchaine heram ge mî de tat’ngguakchi lak ra ziemmename je hekaubena ramme ne ’ngkîchat ra lang gai ze heram ze mi kehingbe bâm hang tew gai bei lêuzai,

¹⁶chige chime hangchum ring ze bam leusedu I Tingwang keringbe Rapeu ring ze bambe ziegene penui name je penui ne lupatchi ra mak lei. Penui keringbe hang runne tew’nring gai lu ze heram ze â hênam chang gai di tau gu de lei.

¹⁷Makchaine chipau heram ge I ne herei teiwang gai ze ziemmena benai hekaubena je tew’nggaduibe hereikerua mi kehingbe lang gai bei lêuzai,

¹⁸chime hangchum chige ring ze bam leusedu I Tingwang keringbe Rapeu bambe ziegene penui name je penui ne tew’nringpatchi ra mak lei, penui keringbe hang runne zangnêu.

¹⁹Heram ge herarît kesiabe I ne lang gai bei zai a lumpum ne ziemmena benai hekaubena ramme je tewchat ze keringbe tew’ngga ze bam lêuzai,

²⁰Noabe, Danielbe zai Jobbe chige ring ze bam sedu I Tingwang keringbe Rapeu bambe ziegene penui name je penui ne lupatchi ra mak lei. Penui keringbe peireige runne penui keyibe zene tew’nring gai lu tau gu lei, ze kacheu de lei.

²¹“Ziemmena benai hekaune je tew’ngga kam gai ra Jerusalem ge a gu samrambe geteube medai, hiazutkie, herakûm, hekaune kesiabe ramme zai herarît lang gai dezai ’ndaizeu ze sia’nteu ra lau!

²²Kane, chige ringpatme sâugaidiakbeime bam ze penui name ’mpeumi ramme benai ’mpuimi ramme je nguapat ra ningnui dage penui wang ze penui ’mpuî ramme benai penui tatew ramme nang ngau dezai ningnui peireige I ne teiwanggai’ndibe leine hangge, Jerusalem peireige I ne kesiabe teiwanggaibe zene ningnui lung tewhegei gai gu lei.

²³Penui kebambe tak benai penui tatew tak ningnui ngau dezai penui ne ningnui lung tewhegei gai gu lei; pe peireige I tâtewgaibe leine pedeu ga ze I tew gai mak lei be ningnui chî gu lei, ze Tingwang HERA ne rang lei,” ze kacheu de lei.