Read Zeme Naga EZEKIEL 15 Bible Online

EZEKIEL 15 - Zeme Naga bible

EZEKIEL 15

¹Dadege Tingwang gu sam a dage wang de lei,

²“Ziemmena na gau, hênamkang ge bambe hingbang ruage grepchî keî bambe zene kêdabe ching je grep ching ne ’ndaigum teikedachi ra lau?

³Mâtâu tew ra hang chipau ching ze lu semei? Ziemmena ne mâ-bung guakkairabe hangge chize ne heka hang tewchi duî semei?

⁴Pie le lau, hemi ge tuâ gai ka’nsui lei; pemuitû kena lam hemi ne rû kam nan tai lei, rû kam nan tai de lei, sûngngang dum geneu, mâ tâ tewrabe hang betâudibe la mei?

⁵Pie le lau, pelane matâu hang ga lei, chize ne matâu deu tew ra mâ de ga lei. Chize hemi ne rû ze dekeikâng chang di dege â, mâ-betâu deu tewrabe ’ndaizeuge ga de ra lau?

⁶Chidadege Tingwang HERA ne acheu ze rang lei; hênamkang ge hechingbang ruage grepchîria dekeikâng chang ra hemi ge I ne tuâ gai gum ze Jerusalem ge bamme je I ne tuâpat kai bu lei.

⁷Penui lam’mbe a ma ’nsua gu lei, hemi gene penui zuapat lu sedu penui je hemi ne rû gu lei. Chidezai I ze Tingwang lei be penui chî gu lei, penui lam a ma ’nsua gai bei dezai neu.

⁸Chigum ze penui ramdei je sâuhammuî gai ra I tew gai gu lei, penui ne achu ’nnum’mmimakbe ziegeneu, ze Tingwang HERA ne rang lei,” ze acheu zeu.