Read Zeme Naga EZEKIEL 16 Bible Online

EZEKIEL 16 - Zeme Naga bible

EZEKIEL 16

¹Tingwang gu sam a dage wangchang kadai de lei, acheu sa ze,

²“Ziemmena na gau, Jerusalem ngaukatenetbe chî ra pechu salia be lau,

³Tingwang HERA ne Jerusalem je aigum ze rang lei: Ningchu â Kanaanme ram dei gene lungkeu gai lei, zai chigene pat lei, ning peu â Amorme zat lei, zai ning pui â Hethme zat lei.

⁴Ningchu lungkeube heram â aigum lei, ningchu lungkeube mai ge ning laria rum mak, zai ningchu tew’nchi ra hedui ne ningchu pia gai mak lei; ’nchaîdui ne du ningchu ’nnuk kai mak, zai paî ne ningchu ’nnum gai mak lei.

⁵Airamme ning peireige ngauka’nggiabe mik ne tew gai ra ga lei, ningchu ka’nggiabe kau ga lei, kane ningchu keloaning ge tuâpat kai bei de lei. Ningchu lungkeu gai dege ningchu â ngaukatenetbe chang di de lei.

⁶“Zai ning taihia I tatpat ze hejai ge kela ze bambe I ngau dege, I ne ningchu ning jai gene ‘Ring ze bam lau,

⁷zai ’nduloa ge chingbangluîne chîngyi gum ze chîngchu zu lau,’ ze kacheu de lei. Zai nang chîngchu ze ’mpuimi ’nsîng-sîng bam di de lei; ning gapâ tumpat ti, zai ning tam pungpak bam di de lei; kane nang â ning pum pumlâng bam gerei de lei.

⁸“Zai ning taihia ge I wang dai lu, ningchu I pie gai dege, pie le lau, nang â ngau’nrairabe tingkum riâ hang chang di de lei; chidadege a paî ne ningchu tap kai de lei, nang pumlâng bambe tapchim gai bei de lei, eu lei, ning dage I deseu gai de lei, zai ning dage samhat kai de lei, zai nang ze a gu chang di de lei, ze Tingwang HERA ne rang lei.

⁹Chidadege ningchu hedui pia gai bei de lei, eu lei, ning jai ze hedui ne hui’nchichiak kai bei de lei, zai I ne ningchu taudui ’nnuk kai bei de lei.

¹⁰Heziakpaî ne ningchu bâ gai bei de lei, zai hemeigei pîchûp yibe kai ra I ne pei bei de lei, zai banutpaî ne bâ gai bei, zai tinggûmbelangpaî ne ning peî ’ngkum gai bei de lei.

¹¹Hepuâni ramme ne ningchu keru gai de lei, ning guang ge gechâkteuria, ning ba ’nggua ge heta ramme,

¹²zai ning nêu ge ’ngngainepui (baroine) zai ning kun ge gechâk-kunchei, zai ning peî ge gepût peichûp peluiyibe I ne kai de lei.

¹³Chigum ze gechâk benai gepût ne ningchu I ne keru gai de lei, zai banutpaî benai tinggûmbelangpaî heziak kairuirikbe ne ningchu bâ gai bei de lei. Dekuîyibe, ’ngkuidui zai mâ-châdui ne nang teu de lei. Ning luî ngauyi-reching ze bam de lei, heguangpui nang chang di de lei.

¹⁴Ning luî yibe ze heramzatme ruage chipakpa di de lei, a ngêudibe ningchu I ne bâgaibeibe ziegene mâ-yika’nsangbe nang ngau lu de lei, ze Tingwang HERA ne kacheu de lei.

¹⁵“Kane ning runne ning luî ngauyibe je nang ’nnumtew ze, zai ning ji di ze sasuangbe ne nang tingnei di, hesang tebeîtewme dage nang jei ’nsui;

¹⁶ning paîni ramme gesa lu lu ze heraluîtewbe ngauyi ra heki puâ hang tew gai, chige hepumzuateume gum ze miramme dage nang jei bam de lei. Aigumbe tewbe ze mâdau de bam gai me rei lei, zai bam du bam dai ra mak lei.

¹⁷A gu gechâk benai a gu gepût merua ramme peluiyibe ningchu I peibeibe lu lu ze, ’mpeumi luî hang tew lu ze lungkahailabe tâ tew de lei.

¹⁸Ning paîni heziak kailube ramme lu lu ze mâ-luîtewlube peireige tapchim gai lu, zai a gu taudui benai a gu mâ-perîmyibe ze mâ-luîtewbe suage dung gai de lei.

¹⁹Zai a gu tingku ningchu I peibe ze du, dekuîyibe, mâ-châ, zai ’ngkuidui teu ra I peibe ramme mâ-luîtewbe suage mâ-perîmyibe ka’ntaube hangge pei gai ’nsui zeu, ze Tingwang HERA ne kacheu de lei.

²⁰Chirunne makse ning na ’mpeumi, ’mpuimi ramme ningchu I peibe ne herâtew ra heraluîtewbe hangge pei gai, aigum ze kahailabe tâ tewbe ze mâ-kecheîne hangge ’nning gai mei?

²¹A name je nang ne tewchat lu heraluîtewbe hangge hemi ge tuâgaibe ze mâ-kecheîne semei?

²²Ning luilung ngaukatenetbe benai nang kahailabe tâ tewbe leine, nang hena’ngka ning pumrua ze bam, zai ning jeî ge nang jeikela bambe nang chî ta di de lei.

²³“Chidadege aigumbe deu ge nang ne tâ-kesiabe tewlube chângge du, (ning duângga gu lei, ning duângga gu lei! ze Tingwang HERA ne rang lei),

²⁴’mpuîrikki ’nsangne ge ning hang heki betâudibe hangge tew gai lei, heraluîtewbe je kellumrabe bâm hangge ning hang tew gai zeu.

²⁵Heki kak ’mpuîrikki gutbe ’nsangne ge heki betâudibe tew gai lu, nang heleuyibe ze zuateu, chige tatka’nruime dage jei ’nsui ze bam, zai nang kahailabe tewpung gai ze bam lei.

²⁶Ijipme ning puiname je ngau’nrai ze tâ-kesiabe nang tew gai, zai a lumpum tew ra ning pum zuateube tâ ze tewpung gai ze bam de lei.

²⁷Chidadege pie le lau, ning peireige a bahuâ kai de lei, ning gu hetak ze periâ tew’ncham ’ndu lei, zai Philistinme ningchu ngaugailakme, nang kahailabe je ka’ngngamme dage ningchu I pei gai bu lei, penui ne ningchu tewnei-neibe tak ne tew ra hangge zeu.

²⁸Ning lungwângchangmakbe ziegene Assiriame dage ning pum zua gai de lei; kane ning lungwângchang mak, eu lei, penui dage nang haila ze, penui dage nang jei de lei, acheusede ning lungwângchangbe ga lei.

²⁹Kanaanram ge Kaldiame, helîkahedetme dage du nang ning pum zuateube tâ tewsuâ gai da, kane aigene ning lungwângchang sua mak lei.

³⁰“’Ndaizeu ge haila ze ning lung bamdaulak ze bam ra lau? Nang kebambe tak ’mpuimi hekuâpheumakbe kau, tâ-kesiabe ning pumzuateube tâ tew zeu, ze Tingwang HERA ne kacheu de lei.

³¹’Mpuîrikki gutbe kemui ’nsangne ge herâtewbe bâmra hang tew gai lu, ’mpuîrikki ’nsangne ge heki betâudibe hang tew gai lu ze, rangkâng je nang gua’nsamakbe ziegene nang â hepumzuatewme du mak lei.

³²Pe napeu je sua â miramme je luneipui, kahemapui lei.

³³Hepumzuateume je ’mpeumi ramme ne kela ramme peika’nsui lei, kane nang â ning huâzie ge bamme ne ning dage zuawang ze, ning dage jei ra henim peize nang ka’nraime je kela pei gai lei.

³⁴Kêdabe ’mpuimi ramme hepumzuateube tâtewme je nang â mâ de ’nzuâ mak lei. Mi-mige ne ’nchi-chine pe pum zuateupui hang ningchu tew gai mak lei; mi-mige ne pemî peimakbe ze nang ne pemî pei lei, chidaze nang â gechâmbe lei.

³⁵“Chidadege Hei, Jerusalem pe pum zuateupui, Tingwang HERA ne rangliabe sam ’ngking le lau:

³⁶Tingwang HERA ne aigum ze ranglia lei, nang ngaukatenetbe ruîpat kai ’nde lei, nang ka’nraime je nang haila ze ning pumrua jeibe ziegene, zai nang ngaukatenetbe heraluîtewbe ramme ziegene, zai heraluîtewbe ge ning name jai peigaibe ziegene,

³⁷pie le lau, nang ka’nraime ramme dage ning lung herua ze ning suiyi’nta ze bambe, zai nang ngauka’nraime, zai nang ngaugailakme, ning huâzie ge bamme je ning taige kûwang’ndui gai gu lei, zai ning pumrua bambe penui ngau le ra, penui suage ning pumrua bambe ze I ne teilia gu lei.

³⁸’Mpuimi pe napeu je meu lu ze, pe na jai tewpatbe kau je samram gum ze ningchu samram gu lei; hemimeube benai a lumpumbe ne ning peireige hejai tewpat kai gu lei.

³⁹Nang ka’nraime dage I ne ningchu pei gai gu lei, ning gu herâtewbe-kaira penui ne tewkau ’ndu lei, zai ning gu pebâm hube tew’nsia ’ndu lei; zai ning paîni ramme penui ne gâutua ’ndu, zai ning gu teluichu ramme penui ne sut-tat tu lei, ningchu pumlâng zai ning pumrua sâudiak kai gu lei.

⁴⁰Ningchu ’nggi ra baudime je penui nguawang gai gu lei, zai tingchu ne ningchu tuâ gu lei, zai penui gu hiazutkie ne ningchu dângderuirui gai gu lei.

⁴¹Ning ki ramme ge penui ne hemitua gai gu lei, ’mpuimi misonggame mikngau ge ning peireige samram gai gu lei; ning pum zuateube tâ tewbe deî’nsau ’ndu lei, chidezai pemî du nang pei ta du de lei.

⁴²Chidezaine ning peireige a lumpumbe I tew’nsang gai gu lei, ningchu I a lunggailak ta du, a kuâneu dai ra mak, zai a lumpum dai ra mak lei.

⁴³Nang hena’ngka telung ze chibam dai ra mak lei, aipau deu gene a lungsui tew’nsia ze bambe ziegene pie le lau, nang telung tak luigum ze ning peireige peiruî gai dai gu lei, ze Tingwang HERA ne kacheu de lei. “Nang ngaukatenetbe tâtewbe peireige du kahailabe tâ nang tewsuâ mak semei?

⁴⁴“Pie le lau, aipau samrekum ne ning peireige miramme ne acheu ze sa gu lei, ‘Pe na (’mpuimi) ze du pe pui luî gum de lei,’ acheu zeu.

⁴⁵Nang â ning puina sing de lei, pe napeu benai pe name je ’nneî-’nrie ze bambepui zeu; nang du ’mpuimi ning sikina ningnui ’mpampatbe ’mpuimi changbe kau de lei. Penui napeu benai penui name je ’nneî-’nrie ze bamme bau zeu. Ningnui pui â Heth’mpui da, zai ningnui peu â Amor’mpeu de lei.

⁴⁶Zai ning sipui â Samaria lei, tingpeî ’mbia pe name ’mpuimi ramme je ngualungpui zeu; zai ning kinapui tingpî ’mbia pe name ’mpuimi ramme je ngualungpui ze Sodom lei.

⁴⁷Sede nang â penui tatbe ’mpuî sui mak, zai penui gu kahebâbe tâ ramme tewheli mak lei kane nang tatbe ’mpuî leine ge penui sua â nang â sia’nteu di de lei;

⁴⁸I ringbambe ziegene, ning kinapui Sodom benai pe name ’mpuimi ramme â nang benai ning gume ramme ne tewgaibe tâ ze mâdau du tew gai me lei, ze Tingwang HERA ne kacheu de lei.

⁴⁹Ni, ning kinapui Sodom gu tâtewmaube aize de lei: Pa benai pe name ne gechîrettewbe tak ne kegeuga ze bambe, kane kelaksiame benai kegame je ’ngngâgaimaktaibe ramme zeu.

⁵⁰Penui â kechî-keditew ze, a mikngau ge ngaukatenetbe tâ tew ze penui bam lei; chipauziegene I ngau lu dege penui je tei’mbia ’ndi de lei.

⁵¹Ning gu hemui pa’mpi riâ Samaria â tewchang mak lei; penui sua â nang â ngaukatenetbe tâ tew’ngkeu gai de lei, zai ngaukatenetbe tâ leine nang tewgaibe gene ning heume â nang sua â yibibe luî hang nang ne tew gai de lei.

⁵²Ning heume yibibe hangge nang ne tewgaibeibe ziegene ka’ngngambe â nang ne pung ra lei, penui sua â nang mâ-ngaukatenetbe tâ tew lei, ning gu hemui ziegene penui â nang suadu yibi lei. Eu lei, ning heume yibibe nang ne teiliabe ziegene nang â helêu ze ’ngngam lau.

⁵³“I ne ning hang keyibe pei gai dai gu lei, Sodom benai pe name lungyibe, zai Samaria benai pe name lungyibe pei gai dai gu lei, zai penui ruage ning lungyibe hangge pei gai dai gu lei,

⁵⁴chidezai nang kahelêube nang runne pung ra, zai nang tâtewgaibe leine ge ka’ngngambe pung ze penui lung tewhegeigaibe chang le ra hangge zeu.

⁵⁵Penui ’ngngim-desang ze bam dai gu lei, zai nang benai ning ramname du tingtie gum ze ngau dai ra penui je pei gai dai gu lei, zai ning heume Sodom benai pe name heleume, zai Samaria benai pe name heleume ze du tingtie bam gum ze bam dai gu lei; zai nang benai ning na heleume du tingtie bam gum ze bam dai gu lei.

⁵⁶Nang ning ngeudi ze bambe ting ge â ning kinapui Sodom je â teihenuitew ze bam mak ti lau?

⁵⁷Nang tâ-kesiabe tewrabe suage zeu. Ni, chuna Edom na heleu’mpui benai pehuâzie ge bamme leine, zai Philistinme na heleume ne pebâm’nsangne ge ningchu sa’nsia la de lei.

⁵⁸Ning pum zuateube benai ngaukatenetbe tâ tewbe mî ze nang lie de lei, ze Tingwang HERA ne kacheu de lei.

⁵⁹“Chidadege Tingwang Hera ne aigum ze rang lei, samhatkaibe tew’nsia, zai samhatkaibe je mâ-hangge du ’nninggaimakbe luigum ze ning peireige tâtew gai gu lei,

⁶⁰Acheusedu ning riting ge ning dage I ne samhatkai’ndibe I chî bam gu lei, ning dage I samhatkai’ndibe ze betingbeta hangge I tew gai gu lei.

⁶¹Chidezai ning heume, ning sime benai ning kiname je nang chi lu dezai nang telung tak nang ’nningdau lu ’ngngam gu lei; penui je ning name hang I ne pei gai gu daseu, kane ning dage I ne samhatkailube ziegene mak zeu.

⁶²Ning dage samhatkaibe I tew’ntip kai gu lei, chidezai I ze Tingwang lei be nang chî gu lei.

⁶³Nang tâtewmaube leine I ne lun kam gai bei dezai nang chi lu ze nang ka’ngngambe ziegene ning mui gene mâ de sam sa dai ra mak lei, ze Tingwang HERA ne kacheu de lei,” ze kacheu de lei.