Read Zeme Naga EZEKIEL 17 Bible Online

EZEKIEL 17 - Zeme Naga bible

EZEKIEL 17

¹Tingwang gu sam a dage wang de lei, acheu sa ze,

²“Ziemmena na gau, Israelbe kiduîme je hekî-kibe sam teleu lu ze, samrekum ne sa lau;

³Tingwang HERA ne aigum ze rang lei: keliengdi pekan di ze tie zai betun’nrinbe pe gêu misongga bam, zai pegeî gechâm-châmbe bambe kau Lebanon ge wang lu ze, kedarchingbang tûnroi gu pebuâ lutat ti de lei;

⁴betunroi pebuâ ’nchiaplangbe tiabet lu ze, helîtew ze tebeîtewme gu heram ’mbe teitat lu ze, helîkahedetme gu namdi ge kai bei de lei.

⁵Zai chipau heram gu helei lu lu ze kedei yibe bâm ge ling gai bei de lei, bekâm hedui kiebe bâm ge tau gai bei de lei; hegua’mpêune kiak gum ze pa ne tau gai bei de lei.

⁶Zai mâ-kiak puakpat te lei, zai grepchîria ’mbambiak ze hiampat ze, pe tailam bekeî ramme hiamzuapat te lei, kane pema â ’ngkang ’mbe bam lei, dadege grepchîria chang di de lei. Zai bekeî ramme pat ze besûne tumpat te lei.

⁷“Chige keliengdi pe kan di ze tie zai pe kan gêu misongga ze bam lei; zai pie le lau, aipau grepchîria ze keliengdi tailam pema hiamzua lei; chi taugaibe bang mêrie gene bekeî ramme pe tailam hiamzua lei, pechu hedui zuâ ze teleu gai ra hangge zeu.

⁸Chize taugaibe bâm gene bekeî hiampat ze, zai pechî ’nchikeu ze grepchîria keyibe chang ra hedui kiebe bâm kedei keyibe pa ne taukeli gai bei de lei.

⁹Tingwang HERA ne acheu ze rang lei: Aipau grepchîria yi ze pebuâ ze ring bam gu mei? Peize hegui gai de ra bekeî ramme chuttua ze pema ramme litua mak ra mei? Chize pema gene tukpat ra mi ba ranchibe zai ziemmena misongga ’nnang ra mak lei.

¹⁰Ni, pie le lau, chize taukeli gai bei sedu yize pebuâ bua ra ring bam gu mei? Tingbia ’mbene tingbia gu tingkai guitau gai bei dezai pelane hegui kam gai du mei? Chize taugaibe bâm sing ge hegui gai mak ra mei, ze acheu ranglia be lau,” ze acheu bei de lei.

¹¹Tingwang gu sam a dage wangchang kadai de lei,

¹²“Ka’nggibe kibaume je salia be lau, airamme rimba ze ningnui chî mak mei? Ranglia be lau, pie le lau, Babilon heguang ne Jerusalem ’mbe wang lu, pe gu heguang benai pe gu heguangsinme je nîm lu ze, pe dage Babilon ’mbe nguatat ti de lei.

¹³Heguang kiduîme ruage hangkat je pa ne nîm lu ze pe dage sam hat kai lei, zai ’nchi-chine kadeseube bam de lei. (Heram gu lungchime, besuitewme leine je â pa ne nguatat kam di de lei,

¹⁴chipau heguangram je tewhelêu lu ze, heguang chang ze sapchudaichi lak ze bam ra, kane samhatkaibe tei bam tâne pa sapchi le ra samria tew gai de lei.)

¹⁵Kane pa ne Ijipram ge heguttewme je lang gai ze, pechu ka’nggi de lei, dezai penui ne pechu hekun ramme benai hereikang baudime pei be ra hangge zeu. Chigum tewpeu ’nreipatchi duî gu mei? Samria tew’nsia lu ze pechu meupatchi duî gu mei?

¹⁶I ringbe ziegene, Tingwang HERA ne kacheu de lei, pechu heguang hang sumgaibe bâm sing ge deseugaibe bâm je naîlatew, zai samdiegaibe ze tewpângbe ziegene Babilon ge pa chai gu lei.

¹⁷Kahereibe bâm ge ziemmena gekieme je tewchat ra hekutchak ze kedeiloa ’ntûm ramme tew gai, zai kerie ramme tew gai bei dezai Pharaobe pe gu hereikang peranchime, zai pebau kedime ne herei ge pechu ’ngngâ ra mak lei.

¹⁸Deseugaibe je naîlatew, zai samdiegaibe ze tewpâng gai bei, zai samhatlube chângge airamme pa tewbe ziegene pa ’nreipatchi ra mak lei.

¹⁹Chidadege Tingwang HERA ne aigum ze rang lei, I ne deseugaibe je naîlatew, zai I ne samdiegaibe je pa ne tewpâng ’ndi daze, I ringbe ziegene pe peireige peiruî gai dai gu lei.

²⁰Pe peireige a gu chîak tuâ gai gu lei, zai a gu ’mpia gene pechu mi gu lei, Babilon ’mbe nguatat kai gu lei, pa tâ-kesiabe tewbe zai a peireige pa kesia tewgaibe chigene pechu I pedeu gu lei.

²¹Zai pe gu hereikangme bau ramme ruagene pakchâmpatme leine je â hiazutkie ne tewchat ku lei, zai ka’nsakme â pebâm’nsangne ge rariptat kam du lei; zai I Tingwang ne rang lei be ningnui chî gu lei,” ze kacheu de lei.

²²Tingwang HERA ne aigum ze rang lei: “Kedar bang hube gu bekeî hulangbe pepuâksûne I lu gu lei, zai pepuâksûne hulangbe ka’nnube I ne lu gu lei, peloa hu’ntielengbe ge chize I ne ling gai gu lei.

²³Israelme gu peloa hulangbe ge chize I ne tau gai gu lei, zai bekeî ramme tumpat kû, zai pechî ’nchi gu lei, zai kedar ze pengêudibe bang chang gu lei; bekang ge hekaune zat leine bam gu lei, zai bekeî ramme kezui ge ’nruine zat leine penui chippua gai gu lei.

²⁴Zai chingbang hube leine I Tingwang ne tei’nnakeu lei be, chingbang nabe ramme I ne teichu lei be zai chingbang ringbe I ne tewchat lei be, zai chingbang chaibe ring ze pebuâ buanungdibe I ne lei be ze ramloa gu chingbang ramme leine ne chî gu lei, I Tingwang ne sagai’ndibe tew gu lei,” ze kacheu de lei.