Read Zeme Naga EZEKIEL 18 Bible Online

EZEKIEL 18 - Zeme Naga bible

EZEKIEL 18

¹Tingwang gu sam a dage wangchang kadai de lei, acheu sa ze,

²“Israelme ram deu ge aipau samrekum ne ’ndaikau rimba hang ningnui tei’nda gai lau: ‘Penui peume ne grepchî hiabe teu bei ze penui name geu-him di mei?’ ze kacheube zeu.

³Aipau samrekum ze Israelme ruage tei dai ra mak lei, I ringbambe ziegene, ze Tingwang Hera ne kacheu de lei.

⁴Pie le lau, haimena gu keringbe leine ze a gu kam lei; pe peu keringbe du zai pe na keringbe du a gu lei: kahemuibe kau â chai gu lei.

⁵Kane ziemmena teling zai pelingtew ze bam zai ’nchi ze bam zai â,

⁶peloa kehube ge herâtewbe gu pa teu mak, zai Israelme gu herâtewbe ki lam pe mik pie’nrik mak, zai pe kining’mpeu nâu peireige sia gai mak, zai ’mpuimi pe nîsiabe ting ge ’nna mak;

⁷zai mi-mi je du pa ne tewsâ mak, mâ-kahepukme gu ’nchunggaileube peipatkadaibe kau, zai ’nchi-chine sutteu mak, kane ka’njeibe kau je mâ-teu ra pei, zai pe pum pumlâng bambe kau je paî bâ gai zai â;

⁸zai pelâp ngau ra mâ-hepuk ra pei mak, zai pa’ntua du pa lu mak, zai kat-kat kakge samrambe pelingtew zai tâ-kesiabe tew ra pe ba ziêpat makchai â;

⁹a gu hingde rawgaibe luigum ze tew, zai a gu samrambe ’nnum’mmi ze teibe kau â pa ze ziemmena katelingbe kau lei, pa â ring sing gu lei, ze Tingwang Hera ne rang lei.

¹⁰“Kane pe na ’mpeumi lungkeu ze mâ-hegasutteu, zai hejai tewpatbe kau, aigumbe tâ ramme tew dizai â,

¹¹zai pa tewrabe tâ tew mak, peloa hube ge heraluîtewbe meiji teu, zai pe kining’mpeu nâu je tew’nsia ze bam zai â;

¹²zai kelaksia, zai kegame je tewsâ ze bam, zai ’nchi-chine sutteu, zai mâ-mâ-’nchunggaileube peipat dai mak, zai heraluîtewbe lam hemik pie’nrik, ngaukatenetbe tâ tew ze bam;

¹³zai pa’ntua ngau ra rangkâng hepuk ra pei, zai peching luteu zai â, pa ring gu mei? Pa ring ra mak lei. Pa ne airamme ngaukatenetbe tâ tew dizai â pa chai sing gu lei; pe gu hejaipâu ze pa ne pung gu lei.

¹⁴“Kane pe na lungkeu ze, pe peu tâ-kesiabe tewbe leine pa ngau lu ze, pa hing ze chigumbe tâ ramme pa tew mak;

¹⁵peloa kehube ge heraluîtewbe meiji ramme pa teu mak, zai Israelme gu heraluîtewbe lam pa pie’nrik mak, zai pe kining’mpeu nâu je tewhebâ mak,

¹⁶zai mi-mi je du pa ne kesiatew mak zai mâ-mâ-’nchunggaileube lu mak, ’nchi-chine sutteu mak, kane ka’nzeibe kau je pe gu tingku pei, zai pe pum pumlâng bambe kau je paî bâ gai bei,

¹⁷hemui tâ tew ra pe ba getuapat mak, zai peching benai pa’ntua pa lu mak, kane a gu samrambe tâ tew, zai a gu hingde rawgaibe teibe kau chang zai â, pe peu gu hemui ziegene pa â chai ra mak lei, pa â ring sing gu lei.

¹⁸Kane pe peu â miramme je pe jaisit ne tewsâ, pe sikiname gu ’nchi-chine sutteu, zai pe gu ziemmena ruage mâ-yimakbe tewbe ziegene, pie le lau, pe gu hemui ziegene pa â chai gu lei.

¹⁹“Kane ningnui ne ‘’Ndaitew ze pe peu gu hemui ziegene pe na hereu mak ta ra lau?’ ze samka’neu lei, pe na â hingde ne kerangbe tew, zai tâ pelingtew lei, zai a gu hingde ramme riagaidiakbe leine tei’mmi ze tei ze hingde ne kerangbe tew bam de lei, ze acheu dizaine â, ring sing gu lei.

²⁰Tâ-kesiabe tewpeu ne chai ra lei; pe peu gu hemui ziegene pe na hereulie ra mak lei, zai pe na gu hemui ziegene pe peu du hereulie ra mak lei. Kapelingpeu peireige pelingtewbe ze wang gai dai gu lei, zai ziemmena kesiapeu â pa tâsiabe tewgaibe hî ngau gu lei.

²¹“Kane ziemmena kesiabe kau tâ-kesiabe tewbe ramme leine sâu ze helung kahelibe kau, a gu hingde rawdiakkaibe ramme pa tei ze, hingde ne kerangbe pa tew, zai ka’nzeibe pa chang zai â, pa ring sing gu lei; pa chai ra mak lei.

²²Pa ne hedieka’ngkabe leine chibam ta du de lei, pa ne peling tewbeibe ziegene pa ring gu lei.

²³Ziemmena kesiame kechaibe peireige I a suiyibe la semei? Acheu mak lei, pe lung heli lu, ring ze bambe lunei zangno, ze Tingwang HERA ne rang lei.

²⁴Kane katelingbe ziemmena ne pa katelingbe ’mpuî sâu nan ze ziemmena kesiame gum tâ-kesiabe tew zai ngaukatenetbe tâ tew ze bam bei leusedu pa ring bam gu mei? Pa ne tâ peling tewgaibe chibam dai ra mak lei; pa ne ’nnumtewmakbe tâ tew ze tâ-kesiabe tewbeibe ziegene, zai pe gu hemui ziegene pa chai gu lei.

²⁵“Kane ningnui ne, ‘Tingwang ne mâ-tâtewbe ’nzei mak lei,’ ze acheu-cheu lei. Hei Israelme gau, ’Ngking le lau. A ’mpuî ze peling mak mei? Pelingmakbe ’mpuî ze ningnui ’mpuî mak semei?

²⁶Kapelingbe ziemmena pelingtewbe pa sâu nan ze tâ-kesiabe pa tew dizai â chige pa chai gu lei, chi tâ-kesiabe pa tewbe ziegene chige pa chai gu lei.

²⁷Zai ziemmena kesiabe kau tâsiabe pa tewbe gene ’nnuk ti, zai hingde ne kerangbe pa tew, zai peling pa tew zai â, pe runne pechu tew’nring gai dai gu lei.

²⁸Tâsiabe tewbe chî lu ze, hedieka’ngkabe pa sâu’ndibe ziegene pa ring gu lei; pa chai ra mak lei.

²⁹Kane Israelme ne, ‘Tingwang ne mâ-tâ tew’nzei mak lei,’ ze acheu chêu lei. A ’mpuî ze peling mak mei? Hei Israelme gau, A ’mpuî â ’nzei de mak ti lau? Kane ningnui gu ’mpuî ne ’nzei mak te zeî lau?

³⁰“Chidadege Hei, Israelme gau, ziemmena ’nteumena je penui tatew luigum ze ningnui peireige I ne samram gai gu lei, ze Tingwang HERA ne kacheu lei. Ningnui lungheli zu lau, ningnui hedieka’ngkabe tâ tewbe sâu ne zu lau, ningnui tâ-kesiabe tewbe zene ningnui je tew’nsia ra pei gai se lau.

³¹Hedeka’ngkabe tâ tewbe leine ze ningnui sâu kam le lau, ningnui runne ne helungsui karchibe zai helung karchibe teleu le lau, Hei Israelbe kibau gau, ’ndaitew ze ningnui chai ra lau?

³²Ziemmena hangkat kechaibe ge I suiyibe mâ de ga lei, chidaze helatwang dai lu ring ze bam lau, kacheube ze Tingwang HERA ne rangbe sam lei,” ze kacheu de lei.