Read Zeme Naga EZEKIEL 19 Bible Online

EZEKIEL 19 - Zeme Naga bible

EZEKIEL 19

¹Chipau peireige du, Israelme gu heguangme hangge kadesuibe leu nang tew gai lau:

²Duilui ramme ruage ning pui ze ’ndaigumbe duiluipui se lau! Pa bepoine ’mpâm ze duiluiseipoine ramme ruage jeikela-la lei.

³Bepoine kat pa ne ’mpâmchu de lei, duiluisei peranchibe chang di de lei, mâ-nîmteu ra getei gai bei, ziemmena je nîmteupeu chang di de lei.

⁴Heramzatme ne pe rasam seu lu, penui gu hûm gene pechu mi lu, hegeî’ngkap kai lu, Ijipram dei ’mbe pechu penui ne gautat ti de lei.

⁵Pa mâ du tewsuadailaktibe ngau lu dege, pa kaheguîbe ga di dege, kêdabe poine je pa ne lu dai lu, duiluiseipoine hang pa ne tew gai kadai de lei.

⁶Duilui ramme ruage pa tatrua bam de lei, duiluisei peranchibe chang di de lei, mâ-nîmteurabe tak pa getei lu, ziemmena je nîmteube kau chang di de lei.

⁷Penui gu keriengdi ramme tewpâng, penui gu namdi ramme gua’mpiehâmmuî gai, pa ka’nrabe kuâ ne heram lung puigit ti, pa ’nra gai tâne ziemmena hing ze kedun di lei.

⁸Kedeirei heramzatme wang’ndui ze pebâm’nsangne ge ’mpia tew gai de lei, pe peireige penui gu chîak lîm gai lei, penui gu hûm gene pechu nîm lu bam de lei.

⁹Penui gu hegeîria ne keî lu, pechu bangnam ge kai de lei, Babilon heguang tailam teitat ti de lei; penui ne pechu bang gai ’ndi de lei, Israelme gu peloa kedibe ramme ge pe kuâ seu ta de ra hangge zeu.

¹⁰Ning pui â grepchî kiak grepchî merie ge hedui taige linggaibe gum, hedui misongga bambe ziegene bekeî ramme puigit ze pechî ’nchibiak ze la de lei.

¹¹Pebangpui dilangbe zene heguangme gu langsiutui chang di de lei, bekeî ramme hangheu ze peneu misongga ruigit bambe ruage bekeî hu’ntieleng ze bambe ngau de lei.

¹²Kane helumpumbe ne pechu puihuakpat lu, kedei ge pechu tuâkeu gai ’nde lei, tingbia gu tingkai ne tewlai ’nda, zai pechî du tingkai ne guirit ’nde lei, pebangpui kedibe kang de da, zai hemi ne rû ’nde lei.

¹³Chuna â tingkangram ge pebangpui â, tau gai ze la lei, heram changbe zai heram heduigabe gezeu.

¹⁴Pebangpui gene hemi pat ze bekeî benai pechî rûmut ’nde lei, chidadege â bekeî’mpui peranchibe ga di de lei, heguang gu langsiutui hang de ga di de lei. Aize kadesuibe leu lei, kadesuibe ge zierabe leu lei.