Read Zeme Naga EZEKIEL 2 Bible Online

EZEKIEL 2 - Zeme Naga bible

EZEKIEL 2

¹Dadege pa ne achu, “Ziemmena na gau, ning pî ne sap kai lau, ningchu sam I salia gu lei,” ze kacheu de lei.

²Zai achu pa ne sam saliabe luage herui a dage gut ti de lei, a pî I sapchu ra achu tew gai bei de lei; chi achu ka’mpaube kuâ I seu de lei.

³Dadege pa ne achu, “Ziemmena na gau, Israelbe chaname, ka’nggibe deiname, achu ka’nggime dage ningchu I lang gai de lei: penui benai penui peume ne nemai riâ chang ze a gu hede ’ngka ze lamui lei.

⁴Penui â ’ndamdei ze hekuâpheumakbe rehei lei, chidadege penui dage tat ra ningchu I lang gai de lei; zai penui je nang ne, ‘Tingwang HERA ne acheu ze rang lei,’ ze acheu be lau.

⁵Zai penui ne ka’ngking mei nune ’ngking mak mei (penui â ka’nggibe daseu) leusedu penui ruage kemeume kiduîme la lei be penui chî gu lei.

⁶Nang ziemmena na, penui je nang hing se lau, zai penui sam je nang hing se lau, ning hangge meitikchiria benai hetupet gum chang leusede, zai heruîmegapui ruage nang bam sede hing se lau. Penui â ka’nggibe kiduîme chang leusedu penui sam je hing se lau, penui sam benai penui telungtak je nang hing se lau.

⁷Zai penui ne ka’ngking mei, nune ’ngking mak mei leusede penui je a sam nang salia ra lei: penui â ka’nggime kiduîme daseu.

⁸“Kane nang ziemmena na, ningchu ’ndaikau I salia mei nang ’ngking le lau; ka’nggime kiduîme gum ze nang â ’nggi se lau, ning mui ’ngngapat lau, ningchu I peibe nang teu lau,” ze kacheu de lei.

⁹Dadege I pie gai dege, pie le lau, a tailam pe ba getuapat te lei, pie le lau, chize leisizui lei;

¹⁰chize a suage rapat kai de lei. Pelung ge benai hela ge sam rawgai’ndibe la lei, chige kehapbe benai kadesuibe leu ramme, zai mi duânggabe rasam raw gai lei.