Read Zeme Naga EZEKIEL 20 Bible Online

EZEKIEL 20 - Zeme Naga bible

EZEKIEL 20

¹Zai acheulage tingkum sena, pamengeube kêu, hezie kereu mai ge Israelme gechîngme hanggesame Tingwang gu maning ’nneu ra penui wang lu, a suage penui ka’ntau de lei.

²Dadege Tingwang gu sam a dage wang de lei, acheu sa ze,

³“Ziemmena na gau, Israelme gu gechîngme dage acheu ze salia lau, Tingwang Hera ne acheu ze rang lei: Ningnui ne achu mâ-sam ’nneu ra wang mei? I ringbe ziegene ningnui ne achu sam’nneu mak ra lei, ze Tingwang Hera ne kacheu de lei.

⁴Ziemmena na gau, penui je nang ne samram gai ra run de mei? Penui peume ne ngaukatenetbe tâ tewbe ze penui je ranglia be lau.

⁵Zai penui suage Tingwang Hera ne acheu ze rang lei: Israelme bau je I ne kakelângbe mai ge, Jakobbe kiria gene reheipiakeume dage I deseu gai de lei, zai Ijipram dei ge penui je I lia de lei, penui je deseu ze, I Tingwang ningnui Rapeu lei, ze acheu salia bei de lei.

⁶Chipau mai ge Ijip gene penui je nguapat lu ze, penui hangge heram I ne kelânglube, tungdui benai ’ngkuidui ne luabe heram, heram leine ruage yilangbe ge penui je I nguagut ra samhat kai de lei.

⁷Ningnui suage ziemmena ’nteumena mikngau ge ngaukatenetbe heraluîtewbe tuâ ne lau, Ijipram gu heraluîtewbe ne ningnui je tewhebâ se lau, I Tingwang ningnui Rapeu lei, ze I salia lei.

⁸Kane penui ne achu katingkang lei, zai a kuâ penui pheu mak lei. Penui ’nteumena ne penui mik ne ngaube ngaukatenetbe ze penui tuâ mak lei, Ijipram ge heraluîtewbe ramme je penui sâu mak lei, “Chidadege penui peireige a lumpumbe ruîkeu gai be ra, zai penui peireige a râtabe tewpui gai ra Ijipram dei lungge ruî gai ra de mei, ze I kacheu de lei.

⁹Kane a ji hang ziegene I tew de lei, chige lungme mikngau gene Ijipram dei gene penui je nguapat lei be penui chî ra I ne tewliâ gu lei.

¹⁰Chidadege Ijipram sâu ze penui zuapat ra I ne tew gai bei de lei, zai tingkangram ’mbe penui je nguapat kai bei de lei.

¹¹Zai a gu hingde ramme rawgailube penui je pei bei de lei, zai a gu samrambe ramme penui je teilia bei de lei, chiramme penui lutei zai â, chigene penui ring gu lei.

¹²Chi runne makse I benai penui kakge ’nchetrabe hangge ’ntakbambe mai penui je I pei bei de lei, I Tingwang penui je tew’nchigaipeu lei be penui chî ra pei bei de lei.

¹³Kane Israel kibaume ne tingkangram ge achu ka’nggi de lei; a gu hingde ramme raw lu ze peibeibe penui sui mak ze a gu hingde ramme tew’nsia ze bam lei, chigene penui ringrabe hingde zeu, zai a gu ’ntakbambe mai du penui ne tewhebâ ’ndi de lei, “Chidezai tingkangram ge penui je deî’ngga ra a lumpum penui peireige ruî gai be ra mei yi za, ze I kacheu de lei.

¹⁴I ne penui je nguapatbe lua chime zat mikngau sing gene tewhebâ gai mak ra, a ji tewhelêu gai mak ra I tew de lei.

¹⁵Chidadege tingkangram ge deseu ze, penui je heram I peibe ’ngkuidui benai tungdui ne luaberam heram leine gu heram peluî yilangbe ge penui je I nguagut kai ra mak lei, ze kacheu de lei.

¹⁶A gu samrambe ramme penui ne tew’nsia, zai a gu hingde rawgaibe ramme penui lutei mak lei, kane a gu ’ntakbambe mai tewkahebâ de lei, mâ-luîtewbe je penui lung ne peutat bam di daseu.

¹⁷Kane penui je deî’ngga mak ra, I ne penui je ngau’nggia gai bei de lei, tingkangram ge du penui je I tew’ngga kam mak tai de lei.

¹⁸“Kane tingkangram ge I ne penui name je, ningnui peume ne hingde rawgaibe ramme lutei se lau, zai penui gu samramgaibe ramme lutei so, zai penui gu mâ-luîtewbe ramme ne ningnui je tewhebâ se lau,

¹⁹I ningnui Rapeu Tingwang lei, a gu hingde rawgaibe ramme lutei ze hingde ne kerangbe tew lau.

²⁰Zai a gu ’ntakbambe mai ramme ze ’nchi ze rei ra lei, I benai ningnui kakge ’nchetkaibe chang ra lei; dezai I ze Tingwang ningnui Rapeu lei be ningnui chî gu lei, ze kacheu de lei.

²¹Kane ningnui name ne achu ka’nggi lei, a gu hingde rawgaibe ramme lutei mak lei, zai a gu samramgaibe ramme tei’mmi ze tei mak lei, chiramme reî ze teibe gene keringbe penui ngau ra penui tew mak lei, a gu ’ntakbambe mai tewhebâ ze bam de lei; “Chidadege tingkangram ge gum ze a lumpumbe penui peireige ruîkeu gai ra yi gu mei ze I ’nning gai de lei.

²²Kane a ba huachu gai mak lei, penui je I nguapatbe luage heramzatme mikngau gene penui je tewhebâ mak ze a ji hanggene I tew di de lei.

²³Chirunne makse heramzatme ruage penui je hûtimrarip kai be ra, zai heram leine ge penui je ’nzirarip kai be ra tingkangram ge I deseu gai de lei.

²⁴A gu hingde rawgaibe ramme penui ne lutua, zai a gu samrambe ramme penui lutei mak lei; zai a gu ’ntakbambe mai ze penui ne tewhebâ ze bam lei, zai penui peume ne mâ-luîtewbe je kakellumbe gum ze penui mik ne pie bam di daseu.

²⁵Chidadege hingde rawgaibe penui je pei bei de lei, zai chigene penui ringpatlakrabe samrambe pei bei de lei.

²⁶Penui herâtewbe kela ramme ne penui je tewhebâ ra, penui na ’mpeumi lungkeuraibe ramme je hemi ge tuâgaibe gene penui je tewsâ ze ngauhingbe tâtewbe gene nâlangbe ge I ze Tingwang lei be penui chî le ra hangge zeu.

²⁷“Chidadege ziemmena na gau, Israelbe kiduîme je salia lau, zai penui je, Tingwang Hera ne acheu ze rang lei: Ningnui peume ne aigene achu saka’nsia lei, penui ne achu kechoa-keduai tâ tewbe ziegeneu.

²⁸Penui je heram pei ra I deseutewbe ram ’mbe penui je I ne nguagutbe ting ge, kedeiloa kehube ramme benai heching kedibe ramme penui ngau lu dege herâtew de lei; zai penui herâtew ra penui gu kela ramme peipatbe ne I a râta ra tew gai bei de lei. Zai chige mâ-perîmyibe ramme pei gai, zai penui sakrabe kela ramme peipat kai ze ruîpat kai de lei.

²⁹(Chidadege penui je I ne Aipau peloa kehube ge ’ndaikau la ze ningnui tat ka’nsui lau? kacheu de lei. Chigum ze nemai riâ chipau ji ze Bama ze kû la lei.)

³⁰Chidadege Israelbe kiduîme je ranglia be lau, Tingwang Hera ne rang lei, ningnui peume ne tew gum ze ningnui runne ne ngaukatenetbe tâ tewbe ’mpuî ge lunghaila ze bam ra rei mei?

³¹Nemai riâ chang ze ningnui gu kela peipatbe ge ningnui name je hemi ge tuâgai’nsui, ningnui gu heraluîtewbe ne ningnui runne ningnui je tewhebâ ze bam de zeî lau? Ningnui ne achu mâ-neu ra la mei, Hei Israelbe kiduîme gau? Ningnui ne achu mâ’nneu ra pei ra mak lei, I ringbe ziegeneu, ze Tingwang Hera ne rang lei.

³²“Ningnui lung ge ka’nningbe ze mâtew-tewsede wangchang ra mak lei, ‘Heramzatme ramme gum ze, heram ge hezat ramme bamme gum ze anui bam ze heching-tingchu je kellum ze bam kei lei,’ acheu ze ka’nningbe zeu.

³³“I ringbe ziegene a ba ranchi ne, a ba kagetuabe benai a râtabe ne ningnui peireige I heguang ze bam gu lei, ze Tingwang Hera ne kacheu de lei.

³⁴Heramzatme ruagene ningnui je I ne nguapat ku lei, ningnui je ’nzirarip kai’ndibe heram gene a ba ranchi ne, zai a ba getua ze a ratabe ne ningnui je teiwang’ndui gai gu lei.

³⁵Heramzatme gu Tingkangram ge ningnui je I ne nguapat kai gu lei, zai chige ningnui je I ne heju ne heju samram gu lei.

³⁶Ijipram gu tingkangram ge ningnui peume je I ne samram gum ze ningnui je du I ne samram gai gu lei, ze Tingwang Hera ne rang lei.

³⁷I ne ningnui je hetui kanggene tatpela ra tew gai gu lei, zai I ne ningnui je samhatkaibe kangge bam ra nguawang gai gu lei.

³⁸Zai ningnui ruage achu katingkangme, zai hede ka’ngkame je â I ne tew’ngga gai gu lei, zai penui bambe heram gene penui je I ne lupat kai ’ndu lei, kane Israelme ram ge penui mâtew-tewsedu gut ra mak lei. Chidezai I ze Tingwang lei be ningnui chî gu lei.

³⁹“Zai ningnui du, Hei Israelbe kiduîme gau, Tingwang Hera ne acheu rang lei: Ningnui ne a kuâ pheu makchai â, chuna gene seu ze ningnui gu mâ-luîtewbe je ningnui ’nteumena kellum kam zu lau; kane a ji ka’nchibe â ningnui gu kela ramme peipatbe benai mâ-luîtewbe je kakellumbe ne tewhebâ ra mak lei.

⁴⁰“A gu peloa kehube ka’nchibe, chi Israelme gu peloa kehube ge Israelbe kiduîme leine, penui ’nteumena ne a guâ ’nggua gu lei; chidezai chige penui je I ’nchâ gu lei, chige ningnui gu kela peipatbe ramme, helei karchibe ramme, zai chige ningnui herâtew ra peibe leine, zai ningnui gu kela ka’nchibe ramme I lu gai gu lei.

⁴¹Heramzatme ruagene ningnui je I ne lupatkaibe ting ge benai heram leine ge rarip ze ningnui bamdibe gene ningnui je I ne ngua’nduigaibe ting dezai mâ-perîmyibe hangge ningnui je I lu gai gu lei, zai pezatme mikngau ge I ka’nchibe ningnui ruagene I tewlia gu lei, ze kacheu de lei.

⁴²Zai ningnui peume je heram pei ra samhatkaibe Israelme ram ge I ne ningnui je nguagut kai bei dezai I ze Tingwang Hera lei be ningnui chî gu lei.

⁴³Zai chige ningnui kebambe tak zai ningnui tatew ningnui runne ningnui je tewhebâ’ndibe ningnui ’nningdau gu lei; chidezai ningnui tâ-kesiabe tewbe hemui ramme ziegene ningnui runne ningnui je ngautenet ze bam gu lei.

⁴⁴Zai ningnui kebambe tak, helungriaksiabe luigum zai ningnui tâ-kesiabe tewbe luigum ze peiruî mak ze, a ji tew’ndi ra hangge ningnui je tew’nsang gai bei dezai, Hei, Israelbe kiduîme gau, I ze Tingwang lei be ningnui chî gu lei, ze Tingwang ne rang lei,” ze kacheu de lei.

⁴⁵Zai Tingwang gu sam a dage wang de lei,

⁴⁶“Ziemmena na gau, tingpî ’mbia ning ju ’nsua le lau, tingpî ’mbia ’nrik lu ze sam pau gai lau, Negeb ’mbia hênam ge sam pau’ntua gai lau;

⁴⁷Negeb ’mbia hênam je, “Tingwang gu sam ’ngking le lau, Tingwang Hera ne acheu ze rang lei:” Pie le lau, ning dage hemi kai gu lei, ning dage chingbang keringbe leine rû kam gu lei; heching chaibe du: hemimelei tauben bambe ’mmit ra mak lei, tingpî gene tingpeî chang ze gepieme leine je ’nggalai kam gu lei.

⁴⁸Ziemmena ’nteumena ne chize, I Tingwang ne hemi kaibe ngau gu lei; chize ’mmit dai ra mak lei,” ze kacheu de lei.

⁴⁹Chidadege I ne, “Hei Tingwang Hera lei! kacheu de lei. Dadege penui ne achu, ‘Sam’nda ne pa sapeu mak mei?’ ze kacheu de lei,” ze kacheu de lei.