Read Zeme Naga EZEKIEL 22 Bible Online

EZEKIEL 22 - Zeme Naga bible

EZEKIEL 22

¹Zai Tingwang gu sam a dage wangchang de lei,

²“Ziemmena na gau, hejai tewpatbe namdi je nang ne samram gai ra mei? Nang ne samram gai ra mei? Ngaukatenetbe tâtewbe leine ralia lau.

³Chidadege Tingwang Hera ne acheu ze rang lei; pe runne zuilung ge hejai tewpatbe namdi, beting wangchang ra hangge ning runne ning peireige hejai tewpatpeu, zai pe runne pechu tewhebâ ra mâ-luîtewpeu gau.

⁴Nang hejai tewpatkaibe gene nang ka’ngkuibe chang de lei, nang mâ-luîtewbe ne ningchu tewkahebâ de lei; ning rî-ting ze nang ne tew’ndui ’nda, zai ning tingkum du betun gai ra kecheîne runne la de lei, chidaze heramzatme ne ningchu teilia ra, zai heram leine ne ningchu teihenuitew ra ningchu tew gai ’nde lei.

⁵Ning hiage bamme benai kedeu ’mbe bamme ne ningchu teihenuitew gu lei. Hei nang mâ-luîlakbe kakebiengbe namdi gau.

⁶“Pie le lau, Israelme besuitewme ziemmena ’nteumena penui tâtewchibe luigum ze hejai runne tewpat kai ra nang ge penui bam de lei.

⁷Ningnui ruage penui pui penui peu je ngau’nna ze bam lei, zai ningnui ruage penui hesangme je tewsâ, zai ningui ruage ka’nggiâne benai kemîpuime je nang tew’ngkui gai ze bam lei;

⁸A gu ka’nchibe merua ramme ze ningnui ne mâ-hangge du ’nning gai mak zai â, a gu ’ntakbambe mai ze nang rei mak lei.

⁹Ningnui ruage hanggesame â hejai tewpat kai ra ’nchoâ ne kelutew rua lei. Zai hanggesame â mâ-luîtewbe je herâtewbe meiji teu teu lei; zai hanggesame â hangleutew ze la lei.

¹⁰Ningnui ruage hanggesame â penui peu nâu je nguajei lei; zai hanggesame â ’mpuimi je penui nîsiabe ting ge nguajei lei.

¹¹Zai hanggesame â pe kining’mpeu nâu peireige kahemabe tâ tew gai, zai hanggesame ne pe mupui je tewhebâ gai lei, zai hanggesame ne pe kinapui, pe peu na heleu’mpui je tewhelêu gai lei.

¹²Zai hanggesame â kegîbe tâ tew ra rangkâng pualiê gai lei, zai hanggesame ne pe kiningme je rangkâng hepuk ra peibe ge beching luteu lei, penui dekum ne pe puina’mpeu dagene sutteu ze pa’ntua luteu lei, zai achu du penui ’ngngaî ’ndi lei, ze Tingwang Hera ne kacheu lei.

¹³“Chidaze pie le lau, ningnui ruage henimteume peireige, zai ningnui ruage hejai tewpatme peireige a ba tezûmtâu gai gu lei.

¹⁴Ningchu ka’nggibe mai ge ning lung ge hereulie ze gîngchi duî mei? Nune ning ba ranchi ze bam le dui mei? ze I Tingwang ne rang lei, zai I tew sing gu lei.

¹⁵Heramzatme ruage ningchu langrua gai gu lei; zai heram ramme ge ningchu kum gai gu lei; zai nang kahebâbe nang kahemuibe ze I ne lutua ’ndu lei.

¹⁶Zai heramzatme kêdame ne ningchu ngau’nna ze bam dezai I ze Tingwang lei be nang chî gu lei,” ze kacheu de lei.

¹⁷Tingwang gu sam a dage wang lei, acheu salia ze,

¹⁸“Ziemmena na gau, Israelbe kiduîme â a hangge betâugabe chang kam de lei, penui ’nteumena gepûtgeî, kangngâgeî, tin-geî, hegeî, zai hegimikchêugeî ramme hemihûnki gene tew’nchi ra langlube bârie gum chang kam de lei.

¹⁹Chidadege Tingwang Hera ne acheu rang lei, pie le lau, ningnui ’nteumena hegeî bârie changkamdibe ziegene Jerusalem ge ningnui je teiwang’ndui kam gai gu lei.

²⁰Gepût, hetageî, hegeî ramme, hegimikchêugeî, zai tin-geî ramme hemihûnki ge kai’ndui lu, hegeîchu ramme langluapat ra hangge hemi tew gai gum ze a râtabe benai a lumpumbe ge penui je teiwang’ndui lu, chigene ningnui je tewluapin ’ndu lei.

²¹Eu lei, ningnui je teiwang’ndui lu, ningnui peireige a lumpumbe hemi tew gai bei ze pezuilung gene ningnui je rûluapin ’ndu lei.

²²Hemihûnki gene gepût rûluabuaklube gum ze ningnui je du chige tewluapin gai ’ndu lei. Chidezai I Tingwang ne ningnui peireige a lumpumbe ruîkeu gai de lei be ningnui chî gu lei, acheu salia lau,” ze kacheu de lei.

²³Zai Tingwang gu sam a dage wang lei, acheu ze rang lei,

²⁴“Ziemmena na gau, Israelme je, ‘Heram tew’nchimakbe bambe nang lei, zai a lunggailakbe mai ge tingruigaimakbe ramdei chang lei,’ ze salia lau.

²⁵Penui ruage pe gu heguangsinme ramme bamme ze â duilui pe gu hetak je ’ngkîkakezitbe duilui zat gum lei, penui ne ziemmena keringbe je du teu lei; penui ne mi heurâ benai kerua pemîhungbe ramme du lu ’ndi lei. Penui ruage kemîpuime misongga bam ra tew gai bei lei.

²⁶Pe gu tingkume ne du a gu hingde penui ne tewka’nsia lei, a gu merua ka’nchibe ramme penui ne tewkahebâ lei; zai ka’nchibe benai tewhebâ’ndibe mâ de penui tewchâm sua mak lei, zai ’nchimakbe benai ka’nchibe gechâmbe ze penui geteilia gai sua mak lei, zai a gu ’ntakbambe mai je chimakbeliangtew lei, penui ruage a ji tewhebâ ze bam de lei.

²⁷Zai penui ruage besuitewme â henei ramme ne hekaune je gua’nsa ze tewchat lu ze kuigetie ze teu gum ze pelingmakbe tewbe gene pegiê ngau ra penui hejai tewpat, zai ziemmena je tewchat lei.

²⁸Zai chi namdi gu kemeume â ’mbie ge ’nnei ’nnukhâ lu, perua ne penui je, ‘Tingwang Hera ne rang lei,’ acheu ze hemangdak karasa ne sa lei.

²⁹Heramdei gu ziemmena ne tewsâ, zai sutteu lei, zai kegame benai kelaksiame je betâumakbe gene tewhereu ze bam, zai hanggesame je betâu-meluisuibe ne tewsâ ka’nsui lei.

³⁰Heram ze tew’nsia mak ra penui ruagene hangkat ne kerie-rie gai ra, zai heram kelei ge anui kakge a suage sap ra, dezai chize I ne tew’nsia mak ra ziemmena I peu da, kane I ngau mak tai lei.

³¹Chidadege a lunggailakbe penui peireige I ruî gai bei de lei, zai a lumpumbe hemi ne penui je rûmut ’ndi de lei, penui tatew luigum ze penui peireige I ne pei gai de lei, ze Tingwang Hera ne rang lei, acheu be lau,” ze kacheu de lei.