Read Zeme Naga EZEKIEL 23 Bible Online

EZEKIEL 23 - Zeme Naga bible

EZEKIEL 23

¹Tingwang gu sam a dage wang kadai de lei, acheu sa ze,

²“Ziemmena na gau, ’mpuimi hangna ze pui kat na lei.

³Penai heleurupchube ting gene penai pum zuateu ze Ijipram ge lung de lei, penai heleudau gene hepumzuateube tâ tew ze bam di de lei, penai heleurupchu gai dege penai gapâ penui ne deîtau ze bam de lei, zai penai heleurupchube gapâ ge penui ne deîtau’nsui bam de lei.

⁴Zai penai ruage chîngbipui ji â, Oholale, zai pe kina pui ji â, Oholibale lei; penai hangna ze â a gu chang di de lei, penai na ’mpuimi ramme, zai ’mpeumi ramme lungkeu de lei. Zai penai ji Oholale ze Samaria lei, zai Oholibale ze Jerusalem lei.

⁵“Zai Oholale â a gu chang lu pe gu hepumzuateube tâ tewtat ze lungkelaprua ze Assiriame je pa ngau’nrai bam de lei.

⁶Hereikangme ne gieremangbe paîni kai, zai laksaibe ramme benai samde diegaime ramme penui ’nteumena penui luirâ-yi, hekunching chuame hekun ramme chingchua lei.

⁷Chigum ze Assiria rehangyime leine dage pe pum pei gai ze pe gu hepumzuateube tâ tew ze bam de lei.

⁸Zai pa heleurupchube gapâ ge penui ne deîtau’nsui, zai ngua’nrai’nsuibeibe ziegene Ijipram gene lungkakelapbe pa sâu mak ze pe hepumzuateube tâ tew bam de lei.

⁹Chidadege pa ngauka’nraime Assiriame ba ge pechu I pei gai bei de lei.

¹⁰Pe paîni gâutua nan ze pumlâng bam de lei, pe name ’mpeumi ramme, zai ’mpuimi ramme je â penui ne teitat ti de lei, zai pechu â hiazutkie ne bichat ’ndi de lei, ’mpuimi ramme ruage penui ne pechu samramgaibe rasam salumteu bam de lei.

¹¹“Zai pe kinapui, Oholibale ne pa sua â pe sipui â siabibe ngau lu ze, pa heppumzuateube tâ tewbe ge pe sipui sua pa â lungkelap’nteu di de lei.

¹²Assiriame huâzie ge heram gu kanguame besuitewme, laksaibe ramme, zai samramme, hereipuâ kai’nsangsiaklume, kahereime, zai hekunchingchuame je ngau’nrai ze nguarua bam lei.

¹³Dadege pa hebâ di ze bambe I ngau lu de lei, zai penui ’mpuî kat ge tatme chang de lei.

¹⁴Zai pa hepumzuateube tâ tewbe ze ranbi-bi di de lei; Kaldiame ’mpeumi luî paîgiebe ne kerugaibe luî ze ’mbie ge rawgaibe pa ngau lu dege chiramme deze,

¹⁵penui kia ge kiakâk kak lu, penui peî’nggau peluiyibe kai lu, penui ’nteumena luî ze saibe ramme luigum, Kaldia ge penui je lungkeugaibe ram Babilonme luigum ze pa ngau gai de lei.

¹⁶Pe mik ne penui je pa ngau lu dege pa ngau’nrai di de lei, dadege Kaldiaram ’mbe hepâupaume dage pe sam kelâ gai de lei.

¹⁷Chidadege Babilonme pe dage ngauka’nraibe jeî ge penui wang gai de lei, penui hangleutewbe ne pechu penui ne tewhebâ ’ndi de lei, penui ’nrailei di, penui je pa ngaulei di de lei.

¹⁸Dadege â pa pa hepumzuateube tâ tewbe ze ’ndûlang ze pe pumlâng liabe chang di de lei, pe sipui je I ngaulei di gum ze pechu du I ngaulei di de lei.

¹⁹Kane pa heleudau ge Ijipram ge pa hepumzuateube tâ tewbe pa chibambe ziegene lungkelapranbi-bi di de lei.

²⁰Zai pechu ngua’nrai ze bamme gu ze hekunmerângsei gu lang bam ra, zai penui dagene mâ-patbe ze du hekunmerângsei gu patbe kie pat ra pa lunei de lei.

²¹Chigum ze nang heleudau ge Ijipme ne ning gapâ deîtau ze bambe ze nang lunei de lei,” kacheu de lei.

²²Chidadege Hei Oholibale gau, aigum ze Tingwang HERA ne rang lei: “Pie le lau, nang ’nraigai’ndime, ning lung gene nang ngauleidime je I ne gecheu gai lu ze pemik ’nsangne gene nguawang gai gu lei.

²³Babilonme benai Kaldiame leine Pekodme, Shoame, Koame, zai penui dage Assiriame leine, zai rehangyime ngau’nchiebuime, kanguame besuitewme, laksaibe ramme, zai samramme, penui ’nteumena ziemmena kedime zai hejidime, penui ’nteumena hekunching chua lu ze wang gu lei.

²⁴Zai penui gu hekie, hengeu, zai kahereibe timriang ramme, merua pungbe timriang ramme, zai baudime wang’ndui lu ze ningchu ’nggi gu lei; zai penui gu hinggei kedibe benai kecheibe ramme tei lu, hetageî peichûp kai lu ze ningchu tuaguâ gu lei; zai penui dage samrambe I pei gai bu lei, zai penui gu samramgaibe luigum ze ning peireige penui samram gai gu lei.

²⁵Ning peireige a lumpumbe pei gai gu lei, zai penui râta-desang ze ning peireige penui ’nggi gu lei, penui ne ning nêu zai ning kun rumtua gu lei, zai ka’nsakme ze hiazutkie gene penui chai gu lei. Zai ning name ’mpeumi ramme, zai ’mpuimi ramme je penui ne teitat tu lei zai ’nsakpatme je â hemi ne rûchat ’ndu lei.

²⁶Zai ning paîni ramme penui ne gâutua ’ndu lei, zai ning keru pemîhungbe, telui, gechâk, gepût ramme penui ne teitat tu lei.

²⁷Zai nang lungkakelapbe benai Ijipram gene hepumzuateube tâ nang tewbe I ne tew’nsau ’ndu lei, chidezai penui tailam ning mik ’nreipie dai ra mak lei. Zai Ijipram je nang chibam dai ra mak lei.

²⁸Tingwang Hera ne acheu ze rang lei: Pelingsing ze nang ngaugailakme, ning lung gene ngauleidime ba sing ge ningchu pei gai gu lei.

²⁹Ningchu ngaugailak-desang ze bam gu lei, nang ’nrî ze tewpatkaibe leine penui ne lutat kam gu, zai ningchu pumlâng sâu gai gu lei, ning pumrua sâudiak kai gu lei, ning pumzuateube pumlâng ’ndûlang ze ralia gai bu lei.

³⁰Aipau tâ ramme ning peireige wangchang gu lei, nang lungkelap ze Jentailme chai suitat lu ze mâ-luîtewbe je kellum ze ning pum tewhebâ’ndibe ziegeneu.

³¹Ning sipui tatbe ’mpuî luî nang du tatbe ziegene pe piak ze ning ba ge I pei gai gu lei, ze kacheu de lei.

³²Tingwang Hera ne acheu ze rang lei: “Ning sipui gu hepiak di ze tiebe gene nang sak ku lei, ningchu telia ze teihenuitew gu lei; hepiak ze puigit la daseu.

³³Nang â kameneube benai ning suisiabe ne puigit bam gu lei, ngauhingbe benai put-hâmmuîgairabe piak ning sipui Samaria gu hepiak zeu;

³⁴nang chize sak kû, chipau piak ze sak kam gu lei, zai ning tam paitua gu, zai ning gabûm getpedak kai gu lei; ze I ne rang lei, ze Tingwang Hera ne kacheu de lei.

³⁵Chidadege Tingwang Hera ne aigum ze rang lei. Nang ne achu ’ngngaî zai achu ning chai ’mbe tuâgai’ndibe ziegene nang lungkakelapbe benai ning pumzuateube tâ tewbe ziegene gesâbe nang lie gu lei,” ze kacheu de lei.

³⁶Tingwang ne a suage rang gai kadai lei, “Ziemmena na gau, Oholale benai Oholibale je nang samram gai ra de mei? Chidaze penai ne ngaukatenetbe tâ tewbe ramme penai je ranglia be lau.

³⁷Penai kahemabe tâ tew lu penai ba ge hejai la lei. Mâ-luîtewbe dage penai hema gai ’ndi de lei; penai na a hang lungkeugaibe ze mâ-luîtewbe hetak hangge peipat kai ’ndi de lei.

³⁸Chipau peireige du achu aigum ze penai tew gai de lei: chipau mai gîmsing ge a gu pebâm ka’nchibe penai ne tewhebâ, zai a gu ’ntakbambe mai du penai ne tewkahebâ de lei.

³⁹Penui gu mâ-luîtewbe dage herâtew ra penai name je tewchatlube chângge du chipau mai gîmsing ge a gu pebâm ka’nchibe tewhebâ ra penai gut ka’nsui lei, pie le lau, a kilûng ge aigum ze penai tew ka’nzie lei.

⁴⁰Zai chi runne mak se ziemmena kedeu ’mbe bamme je kû ra hepâupaume je lang gai bei ze penui wang de lei, penui hang ziegene nang ning runne hedui pia zun gai lu, ning mik ge hemik heu ’nnuk kai lu, zai teluichu pemîhungbe ne nang kakeru de lei.

⁴¹Zai jeî pengêudibe ge nang ’ntau lu, zai besuage mâ-teube-kaira kai lei, chige a gu mâ-perîmyibe benai a gu mâ-châ ’ngking gai bam lei.

⁴²Zai pe dage baudime lung’ntaza ze bambe ’ncheu seu lei, baudime ruage ziemmena ’mpangpaime runne makse tingkangram gene wain kameneume je nguawang bei ze penui ne ’mpuimi kena ba ge heta ramme ’nta gai, zai penai peî ge peichûp peluîyibe luak kai bei de lei.

⁴³“Zai chunage pechu nguakakeleume ’mpeumi ramme ze kahemame mak mei? ze kacheu de lei.

⁴⁴Chigum ze pe dage penui gut ti de lei, hepumzuateupui dage ’mpeumi ramme gutbe gum zeu. ’Mpuimi kena Oholale benai Oholibale dage penui lungkakeleube tâ tew ra gut ti de lei.

⁴⁵Kane ziemmena katelingbe ne kahemabe tâ tewme zai hejai tewpatka’nzieme ’mpuimi peireige samram gu lei, penai â ’mpuimi kahemame hangna daseu. Zai penai ba ge hejai bambe ziegeneu,” acheu zeu.

⁴⁶Tingwang Hera ne acheu ze rang lei: “Penai peireige ’nggi ra baudime je nguawang gai gu, zai penai je tewsâ ra tew gai gu lei.

⁴⁷Zai baudime ne tingchu ne penai je tuâ gu, zai penui gu hiazutkie ne bichat ku, zai penai ki ramme hemi ne rû ’ndu lei.

⁴⁸Aigum ze lungkakelapbe tâ ze heram gene I ne tew’ngga gu lei, ’mpuimi ramme leine lungkakelapbe tâ tew ta ra de lei be chî ra hangge zeu.

⁴⁹Ningnai lungkakelapbe tâ tewbe ramme ningnai peireige peiruî gai gu lei, zai mâ-luîtewbe je kakellumbe hemui hî ze ningnai je peiruî dai gu lei, chidezai I ze Tingwang Hera lei be ningnui chî gu lei,” ze kacheu de lei.