Read Zeme Naga EZEKIEL 24 Bible Online

EZEKIEL 24 - Zeme Naga bible

EZEKIEL 24

¹Tingkum sekui hekêu kereu chipau kêu gu hezie pakereube mai ge Tingwang gu sam a dage wang kadai de lei, acheu sa ze,

²“Ziemmena na gau, naimikpui ji, nemai tingnaimikpui gîmsingbe ji raw gai lau; nemai tingnaimikpui gîmsing ge Babilon gu heguang ne Jerusalem gua ra tewchu la de lei.

³Zai ka’nggime kiduîme suage aipau sam’nda salia lau, Tingwang Hera ne acheu ze rang lei: Mâ-langbe heli kie gai lau, peize kie bam lau, chige hedui du ruî gai lau.

⁴Hemeikâng ramme chige teiwang kai lau, hemeikâng yibe ramme, pa’ngkoa benai pe ba’ngkoâk perabut yibe ramme ne heli ge kaipui gai lau.

⁵Kauruidung ruagene keyibe gepa le lau, bekang ge chingpi kerigit kai lau, peize lang’mmi lau, pera benai pekâng ramme lang mei’mmi lau, acheu zeu.

⁶“Dadege Tingwang Hera ne acheu ze rang lei, Hejai tewpatbe namdi, ’ntû tewbe heli, ’ntû teusaumakbe heli pe duângga gu lei; mâ du gepa mak ze kat kat ze kuaipat kai lau.

⁷Pa ne tewpatkaibe hejai pe dage lamui rei lei, ’mbuimoîne ne tuâchim ra kedei ge ruî gai mak ze tingchukâng peireige pa ruî gai bei daseu.

⁸Peize a rata tew ra, hekûm tew ra, tingchukâng peireige hejai I ne ruî gai de lei, peize chize tewchim mak ra hangge zeu.

⁹Chidadege Tingwang Hera ne acheu ze rang lei, Hejai tewpatbe namdi â pe duângga gu lei, I ne dekitum kedibe kua gai gu lei.

¹⁰Heching kuagit kai lau, hemitew gai zu lau, hemei langmei zun gai lau, zai langgeta-siak kai lau, zai pera ramme â rû ne lau.

¹¹Dezaine hemi mechingkâng peireige perua kie gai lau; peize rûtewsie gai lau, zai hetageî rû ra hang, dezai chige kêdabe ramme rûluapi gai ne ra, zai ’ntû ramme ze rû’ngga kam ne ra hangge zeu.

¹²Peruângga ze achu tewleisei gai de lei, ’ntû seudeibe rû’ngga mak lei.

¹³Chi ’ntû ze nang lungkakelapbe kahebâbe ze de lei. Ningchu tew’nchi gai bei ze nang ’nchisuamakbe ziegene ning peireige a lumpum ruîkeu gai mak tâne nang kahebâbe gene ningchu tew’nchi ra mak lei.

¹⁴I Tingwang ne rang lei, chize wangchang gu lei, I ne tew gai gu lei, I helat dai ra mak lei, I â ’nzâ ra mak lei, I â a lung keli dai ra mak lei, ning luilung tak benai ning tatew tak luigum ze ning peireige I samram gai gu lei, ze Tingwang Hera ne rang lei,” ze kacheu de lei.

¹⁵Tingwang gu sam a dage wang kadai de lei, acheu sa ze,

¹⁶“Ziemmena na gau, pie le lau, luakatne ning mikngau ge ning mik suiyibe ’mpuimi je I ne nguatat tu lei, nang desui mak ra lei, zai nang hap du hap mak ra lei, zai ning mikdui du zâukeu gai mak ra lei.

¹⁷Reine ze nang huaipun bam lau; nang kechaihuî ze bam se lau, ning peî’nggau kebit kai lo, zai ning pî ge pîchûp kai lo, zai ning mui kelim se lau, kadesuime gu kuaktak nang teu se lau,” ze kacheu lei.

¹⁸Hechuasûn ge ziemmena ramme je I ka’mpau de lei, zai hegî ge a nâu chai di de lei; zai hechua ge samde achu peibe luigum ze I tew de lei.

¹⁹Ziemmena ramme ne achu, “Aigum ze nang ne tâtewbe tak ze ’ndaikau rimba lau, anui je nang rang mak ra mei?” ze penui kacheu de lei.

²⁰Dadege I ne penui je, “Tingwang gu sam a dage wang de lei,

²¹‘Israelme kiduîme je aigum ze salia lau, Tingwang Hera ne aigum ze ranglia lei: Pie le lau, a gu pebâm ka’nchibe ningnui ne ’nchâ ze ’nning’ndilangbe, ningnui mik suiyilangbe, ningnui lung ge luneilangbe ze I ne tewhebâ gai gu lei; zai ningnui name ’mpeumi zai ’mpuimi ramme Jerusalem ge ningnui sâudiakkai’ndime â hiazutkie gene penui kau gu lei.

²²I rangliabe luigum ze ningnui tew gu lei, ningnui mui kelim ra mak, zai kadesuime kuaktak ningnui teu ra mak lei.

²³Zai ningnui peî ge ningnui peî’nggau kebit kai ra lei; zai ningnui pîchûp kai ra lei; zai ningnui desui ze bam se lau, zai hap du hap se lau; kane ningnui gu hemui-helut ziegene ningnui ga gai kam gu lei, zai ningnui kat-kat hangge hap ku lei.

²⁴Aigum ze Ezekielbe ne ningnui hangge dak teilia gu lei, pa ne tew gum ze ningnui tew ra lei, zai aize wangchang dezai Tingwang Hera ze I lei be ningnui chî gu lei,’ acheu zeu.

²⁵“Zai nang ziemmena na gau, penui dagene penui ranchibe, pengêudibe suigut zai penui mik suiyibe, penui lung suitew’nta ze bambe heguangki ramme, zai penui name rehangme, heleume je I ne penui dagene teitattibe mai chang dezai,

²⁶chipau mai dezai ’mbiapatme ning dage hepâu sam pau gai gu lei.

²⁷Chipau mai ge pak’mbiapatme suage ning mui ’ngkakpat ra lei, zai pe suage nang sam sa ra lei, ning kuâneu mak ze nang bam ra mak lei; chidezai penui hangge nang ne dak chang gu lei; zai Tingwang ze I de lei be penui chî gu lei,” ze kacheu de lei.