Read Zeme Naga EZEKIEL 25 Bible Online

EZEKIEL 25 - Zeme Naga bible

EZEKIEL 25

¹Zai Tingwang gu sam a dage wang de lei, acheu ze sa ze,

²“Ziemmena na gau, Ammonram ’mbe ning ju ’nsua lu ze penui peireige sam ranglia’ntua gai be lau.

³Zai Ammonme dage salia lau, Tingwang Hera gu sam ’ngking le lau, Tingwang Hera ne aigum ze rang lei; pebâm ka’nchibe tewhebâgai’ndibe luage, zai Israelram tew’nsia ze sâuhammuîgai’ndibe luage, zai Juda kiduîme je kebang hang nguatattibe luage nang ne, Aha mi suiyi lei, ze kacheube ziegene,

⁴pie le lau, ningnui je tingbia ge bamme dage penui hang tei ra I ne pei gai ’ndu lei, zai ningnui ruage penui tejeîki tew gai gu lei, zai ningnui ruage penui lung ze bam gu lei; zai ningnui gu mâchî ramme penui ne teu gu lei.

⁵Zai Rabba keloa ze put-hutaning hang tew gai gu lei, zai Ammonme ramdei ze kaurui bâm hang tew gai gu lei, chidezai I ze Tingwang lei be ningnui chî gu lei.

⁶Tingwang Hera ne acheu ze rang lei; Israelme ram peireige ning suiyi’nta ze ning ba gekeu zai nang ’nsumchai ze ning lung leine ne peize sia gai de ra ning suiyi’nta ze bambe ziegene,

⁷pie le lau, ning peireige a bahuâ kai gu lei, zai kêdabe heramzatme ba ge ningchu hereichâ hang gum ze I ne pei gai ’ndu lei: zai chipau heram dei gene ningchu I ne tew’ngga ’ndu lei, dezai I ze Tingwang lei be nang chî gu lei.

⁸“Tingwang Hera ne acheu rang lei, Moab ne, Ni, Pie le lau, Juda kiduîme â heramzat kêdame gum kam lei, ze acheubeibe ziegene,

⁹Moabme gu heramrai reîbe namdi ramme je herei ra namdi pengêudilangbe Beth-jeshimot, Baal-meon, zai Kiriathaim je latla gai gu lei.

¹⁰Zai tingbia ge bamme ziemmename hang chang ra Ammonme je I pei gai gu lei, zai Ammonme je â heramzatme ruage chî ta du de lei.

¹¹Moab peireige I ne samram gu lei, dezai Tingwang ze I lei be penui chî gu lei.

¹²“Tingwang Hera ne acheu ze rang lei, Edomme ne Juda peireige hekûmtew ze tâ-kesiabe pelane penui ne tewgaibe ziegene,

¹³Tingwang Hera ne acheu ze rang lei, Edom peireige a bahuâ kai gu lei, chige ziemmena benai kaurui ramme je tewchat kam ’ndu lei: chize gua’mpiezîng ’ndu lei, Teman keloa gene chu ze Dan keloa riâ chang ze hiazutkie gene penui chai gu lei.

¹⁴Zai a gu ziemmena Israelme ba ’nteu lu ze Edom peireige a kûmtew gu lei, zai penui ne I a râtabe benai a lumpumbe luigum ze Edom peireige penui ne tâtew gai gu lei. I ne hekûmtew gai lei be penui chî gu lei, ze Tingwang ne kacheu de lei.

¹⁵“Tingwang Hera ne acheu ze rang lei, Philistinme hekûmtew ra peu ze penui teurei chang ze bamme peireige hemimeube, katîmphibe lung pung ze hekûmtewbe ziegene,

¹⁶Tingwang Hera ne aigum ze rang lei, Pie le lau, Philistin peireige a bahuâ kai gu lei, Kerethme je bichat kam ’ndu lei. Sungkling kung ge bamme ka’nsakme je du tew’ngga kam ’ndu lei.

¹⁷A lumpumbe ne penui je ’ngngiam ze, penui peireige hekûmtew gu lei: chigum ze penui peireige I ne hekûmtew gai bei dezai I ze Tingwang lei be penui chî gu lei,” ze kacheu de lei.