Read Zeme Naga EZEKIEL 26 Bible Online

EZEKIEL 26 - Zeme Naga bible

EZEKIEL 26

¹Zai tingkum kereu ze kêu kereu gu hezie raîlangbe mai ge, aigum ze Tingwang gu sam a dage wang de lei: acheu sa ze,

²“Ziemmena na gau, Tira keloame ne Jerusalem peireige acheu ze rang lei, ‘Aha! pe deiname gu keriekemui sia da, a hangge latla la de lei; a hangge kegiebe chang gu lei, pa â siamutkeu la de lei,’ ze kacheube ziegene

³Tingwang Hera ne acheu ze rang lei; pie le lau, Hei, Tira, ningchu I ’nggi gu lei, sungkling gu hedui-teleu gesuâkchu gum ze ning peireige nupwang ra heramzatme misongga ze I lang gai gu lei.

⁴Zai Tira kerie ramme tew’nsia gu, zai keriengdi gu tingchutau kehube ramme bakêu gu lei; zai pe dagene kedeinia guttua kam ’ndu lei, zai tingchukâng runne bam ra tew gai gu lei.

⁵Pa â sungkling zuilung ge chiâk puchangbe bâm chang gai gu de lei, ze I ne rang bei daseu, ze Tingwang Hera ne rang lei. Zai pa ze heramzatme hangge hereichâ chang gu lei.

⁶Zai chige lung ze bamme je hiazutkie ne bichat ku lei. Chidezai I Tingwang lei be penui chî gu lei.

⁷“Tingwang Hera ne acheu ze rang lei: Pie le lau, Tira peireige Babilon gu heguang Nebukadrezzarbe, heguangme gu heguang tingpî ’mbene hekun ramme, hekun-timriang ramme, hekun chingchuame, zai hereikang baudime je I lang gai gu lei.

⁸Keloa ramme hereitewbe bâm ge ning name ’mpuimi ramme je hiazutkie ne bichat ku lei, ningchu ’nggi ra kerie-rie gu, zai ning teureime ne kedei puachua gu, zai hekut ramme su gai gu lei.

⁹Ning gu kerie huî’nsia ra pa tew gu, zai ning gu kerie ra gu lei; zai ’nrei ne ning gu hekihube tewkau gu lei.

¹⁰Hekun ramme kiebe ziegene kemût ne ningchu ruichim gu lei; zai hekun hereikang ramme ’ncheu zai timriang benai hekun-timriang ’ncheu ne ning gu kerie ’ngngai gu lei, zai namdi gu kerie badibe gene ziemmena ramme gut dezai neu.

¹¹Zai a gu puidi ramme hekun pî’nchîn ramme ne kut’nsia kam gu lei; zai ning gu ziemmena ramme je hiazutkie ne bichat ku, zai ning gu peranchibe gechia’ndi ramme kedei ge tuâkeu gai gu lei.

¹²Ning heurâ ramme penui ne sut-tat tu, zai ning gu merua ramme penui ne ruitat ’ndu lei; zai ning gu kerie ramme tewbakêu ’ndu, zai nang bamkatemibeki ramme tew’nsia ’ndu lei; zai ning gu tingchu ramme, heching rumlube ramme, zai kedeinia ramme hedui lungge tuâ gai ’ndu lei.

¹³Zai nang heleuziebe ramme tew’nsau ’ndu lei, zai ning gu ’nra kuâ du seu dai ra mak lei.

¹⁴’Ndûlangbe tingchukâng hang ningchu I tew gai gu lei; zai nang zene chiâk gingbe bâm chang gu lei; mâtew-tewsedu ningchu tew’nsapchu gai dai ra mak lei; I Tingwang ne rang daseu ze Tingwang Hera ne kacheu de lei.

¹⁵“Tingwang Hera ne Tira keloa dage acheu ze rang lei: ning dage tewchatbe bam dezai, zaine kahejamme ’nrung dezai zai nang kâukeube kuâ seu dezai sungkling kung ge bamme kedun mak ra mei?

¹⁶Chidezai sungkling kung ge heguangme leine penui gu heguang-bamrâ gene wangkeu lu penui mechua pengêudibe ramme luakpat lu, zai penui gu heziakpaî gâupat lu ze kakedunbe ne penui paî chang ze bâ gu lei; kedei ge penui ’ntau gu, zai penui kedun bam gu lei. Zai penui ningchu ’nningdau ze bam gu lei.

¹⁷Zai kadesuibe leu penui ne ning hang ’mpuak kai gu lei: ‘Hei, hejidibe namdi, sungkling ge peranchipeu, nang benai ning ramname chige bamme leine peireige kehingbe tewgaipeu, ’ndaizeuge sungkling gene nang ga gai di se lau?

¹⁸Nang kâukeube mai ge sungkling kung ge bamme kakedun de lei, eu lei, sungkling ge duiluakangua ramme nang tatrimna di ze penui lunghereu bam de lei,’ kacheu de lei.

¹⁹“Tingwang Hera ne acheu ze rang lei, Namdi gua’mpie’ndibe, mî de bamtadibe namdi chang ra I ne tew gai dezai, ning peireige hedui gechukbe I teiwang gu lei; zai hedui kedibe ne ningchu naîchim gu lei;

²⁰chidezai kechaime bambe kuiki ge wangkeume ’ndâting gu ziemmename dage ningchu I tuâkeu gai gu lei, zai kedeikum lam’mbe siakamdime ruage kechaime bambe kuiki ’mbe wangkeudime dage bam ra I ningchu tew gai gu lei, chidezai ning dage lung dai ra mak, zai keringme ruage nang bam dai ra mak lei.

²¹Nang hing-desang ze bam ra tew gai gu lei, nang bam dai ra mak lei; ningchu peu sedu mâtew-tewsedu ningchu ngau dai ra mak lei, ze Tingwang Hera ne kacheu de lei,” ze kacheu de lei.