Read Zeme Naga EZEKIEL 27 Bible Online

EZEKIEL 27 - Zeme Naga bible

EZEKIEL 27

¹Tingwang gu sam a dage wang kadai de lei: acheu sa ze,

²“Ziemmena na gau, chuna Tira hangge kadesuibe leutew gai lau;

³’Nggeukung ge bambe zat leine gu helîkahedetbe bâm, sungkling kemui ge bambe Tira keloa dage Tingwang Hera ne aigum ze rang gai lei ze rang gai lau: “Hei Tira keloa gau, ‘A dage peluiyibe bambe ze yi’nsangsiak te lei,’ ze nang ne kacheu de lei.

⁴Ning gu heramrai â sungkling zui lungge la lei; kateleupeu ne ning luî ze tew’mmi zun gai bei de lei.

⁵Senir gu chingkeleu chingrumlube pakpi ne ning gu ’nneikuak penui ne tew gai bei de lei; Lebanon gene kedarching pehuîra lu lu ze ning gu ’nneichia hang penui ne tew gai lei.

⁶Bashan gu ’mpuching ramme lu lu ze ramrabe hetîa hangge penui ne tew gai lei; penui ne hepuagim ne ning gu bamtie ramme hang tew gai lei, Sipra sungkling kung gene teiwangbe ze nêu.

⁷Ning gu ’nneipaî lîmgaibe Ijip gene banutpaî yibe heziakpaî teiwangbe zene ’nchetrabe de lei, paî ka’nzaibe Elisha sungkling kung gene teiwangbe ze ning gu ’nnei lîmnambe paî de lei.

⁸Ning gu ’nneichaime ze â, Sidonme Arbadme bau lei; ning dage bamme ziemmename mâ-tewchime bau ze ning gu hereika’nggime bau de lei.

⁹Gebal gu gechîngme zai ’nneikuak chiamchime, ning gu ’nneikuak tewpeu, zai sungkling gu ’nneikuak ramme leine ning dage wang ze helîhedet ze bam lei.

¹⁰“Persia, Lud, Put, ze ning gu hereikangme chang de lei, penui gu hinggei zai penui gu hetageî peichûp kai lu penui ne ning ngeu tewka’ndi de lei.

¹¹Arbad gu ziemmena benai Helekme ne ning gu kerie peireige bamguâ, zai Gamadme ne ning gu kerie kehube bâm ge hekêt-kai ze penui gu hinggei ramme kerie ge guakguâ gai lei; penui ne ning luî tew’mmi zun gai de lei.

¹²“Lungyime gu merua zat misongga bambe ziegene Tarshisme ning dagene helîkahedet lei. Ning gu hechaiki gene penui lui zai zua de lei; gepût, hegeî, tin-geî zai hegimikchêugeî,

¹³Jaban, Tubal zai Meshek ze ning dagene helîkahedet te lei. Ning gu hechaiki ge penui ne helîkahedetbe zat ramme â, ziemmena benai hetageîli ramme de lei.

¹⁴Beth-togarma ne hekun, kahereibe hekun ramme, zai hekunmerângne ramme ne teikahechai de lei.

¹⁵Rhode gu ziemmena ning dagene helîkahedet te lei, sungkling kung bâm ramme â ning gu hechaiki bâm ramme de lei; ning gu merua ramme benai teihechai ra penui ne hepuagim ramme benai eboni ching teiwang bei de lei.

¹⁶Hegeîmerua ramme nang chiampatbe ramme, paî gietikremangbe, litok kilube paî, betachiâmbe paî, koral chu pemîhungbe, emerald chu ramme, zai rubi-chu ramme ne penui teikahechai de lei.

¹⁷Zai Juda benai Israelram ne ning dagene helîkahedet te lei; penui ne minith gu dekuîmeu, hetui, ’ngkuidui, mâ-châdui zai balm heu ramme nang helîkahedetbe hangge pei de lei.

¹⁸Nang ne merua ramme pelane tewpatbeibe ziegene Damaskame ning dagene helîkahedet te lei, zai ning heurâ ramme pelane bambe ziegene Helbon gu wain zai meli gêu hâbe ramme, penui ne teikahechai de lei.

¹⁹Zai ning gu merua ramme hangge Uzal ge wain bambe ne penui hiak te lei; ’nteumaching zai hekupum ramme ne ning gu kela ze hiak kai de lei.

²⁰Dan gu ziemmena ne hekun ching ge kâmbe-paî ze ning gu merua benai ’ngngiak kai de lei.

²¹Arabiame benai kedar ramdei ge kanguame besuitewme, sam ramme ne nang helîkahedetbe melipoine ramme, meli’nsei ramme, zai kemei ramme lui de lei.

²²Sheba benai Raama gu helîkahedetme bau â ning dage la lei; mâ-perîmyibe ramme, zai tingchu pemîhungbe ramme, zai gechâk ne ning gu merua ramme hangge hiak kai de lei.

²³Haran, Kanne, zai Eden, zai Asshur namdi benai Kilmad du ning dagene helîkahedet te lei.

²⁴Aipau kakerube puâ ramme gietikremangbe, heziak ngauyibe paî ramme heria kena ’nneulube ramme, zai heria ramme ne ning dage helîkahedet te lei.

²⁵Tarshis gu ’nneikuak ne ning gu helîkahedetbe merua ramme pungwang de lei, “Sungkling zuilung ge ning gu ’nneikuak puigit ze pengêudilau ze bam de lei.

²⁶Sungkling gene ning gu ’nneichaime ne ningchu hedui-teleu ge ngua gai bei ze, tingbia gu tingkai ne sungkling zuilung ’mbe ningchu guigut kai ’ndi de lei.

²⁷Helîkahedetbe gu ning heurâ ramme, ning gu hechaiki ramme, ning gu helîkahedetbe merua ramme, ning dage bamme ’nneikuak gu hereikangme leine, ’nnei gu heching tâ tewme, ’nnei chaime, ning gu herei ziemmena leine, zai ning gu helîkahedetbe ge nguatâtewme leine, ning dage bamme leine ningchu tewka’nggabe mai ge sungkling sîng ’mbe keu gai di de lei.

²⁸Ning gu ’nneikakereime ka’nrungbe kuâ ne chipau huâzie ge bamme kakedun de lei.

²⁹’Nneichaime leine penui gu ’nnei gene kâu kam di de lei, ’nnei gu sipai leine benai sungkling ge ’nnei kakereime leine sungkling kung ge sap ze,

³⁰zai ning peireige penui hapkadesang de lei, zai penui peî ge ’mbuimoîne bua gai lu, timbun peireige penui jeikakela de lei.

³¹Ning ziegene penui peîtam gutpû lu, miseigiriapaî neu lu ze, ning peireige penui lungsittew ze puîhap te lei, zai hapdesui ze bam lei.

³²Ningchu penui puîhap ze kadesuibe leu acheu ze tew lei: ‘Sungkling zuilung ge Tira je gum ze châu je tew’ngga gai ’ndi lau?

³³Sungkling gene ning gu merua ramme wang bei dege â, ziemmena misonggame lungwângchangbe nang ne tew gai bei de lei; ning heurâ misonggabe benai merua ramme ne kedeirei heguangme je lungyi ze bam ra tew gai bei de lei.

³⁴Chuna â hedui gechukbe sungkling gene ningchu tew’nsia kam ’nde lei; ning gu merua benai ning gu ’nnei kiangname du ning dage kêugut te lei.

³⁵Sungkling kung ge lung ze bamme ne ningchu ningdaulak ti de lei; zai penui gu heguangme ramme hing-desang di ze penui ma hâmmuî di de lei.

³⁶Ziemmename suage helîkahedetme ne ningchu katelia de lei; nang â hingka-desangbe betun-gaibe ge wangchang de lei, zai betingbeta bam dai ra mak lei,’ acheu zeu,” ze kacheu de lei.