Read Zeme Naga EZEKIEL 28 Bible Online

EZEKIEL 28 - Zeme Naga bible

EZEKIEL 28

¹Tingwang gu sam a dage wang kadai de lei: acheu sa ze,

²“Ziemmena na gau, Tira gu heguang je, Tingwang Hera ne acheu ze rang lei: “Ning lung ge kechî-keditew ze, ‘I hera lei, sungkling zuilung ge hera ka’ntaube bâm ge I ’ntau la lei,’ ze nang kacheu da, kane nang â ziemmena lei, hera mak lei, ning lung ge hera gum ze ningchingbibe kau lei— ze ’nning gai sedu nang â ziemmena lei.

³Danielbe sua â nang â ningching lei; zai ning dagene hekim sam mâ de tei’mbai mak lei;

⁴nang kaningchingbe benai nang mâ-’nningchibe ne nang kelakyi ze, ning heurâ ramme gechâk zai gepût bam de lei;

⁵nang ningching-kadesangbe ne ning heurâ tewpung lu ze, ning heurâ ramme ziegene ning lung ge gechîrettew di de lei—

⁶chidadege Tingwang Hera ne acheu ze rang lei: Ning lung ge hera gum kaningchingbe hangge ’nninggaibe ziegene,

⁷pie le lau, hesangme mi kehingme heramzatme je ning dage I lang gai gu lei; nang kaningchingbe rachî peluiyibe peireige hiazutkie kezap kai ra, zai ning ngeudibe tewhebâ gai ra wang gu lei.

⁸Mâ-kuiki gechukbe ge penui ne ningchu tuâkeu gai gu, zai sungkling zuilung ge tewchatkaime ruage nang chai gu lei.

⁹Ningchu tewchatpeu dage, ‘I â hera lei,’ ze nang acheu sa le duî mei? Ningchu bichatrapeu dage nang â hera mak lei, kane ziemmena de lei.

¹⁰Hesangme ba gene rumgetenmakme chai gum ze nang chai gu lei; ze I ranglia bei daseu,” ze Tingwang Hera ne kacheu de lei.

¹¹Chi runne makse Tingwang gu sam a dage wang kadai de lei: acheu sa ze,

¹²“Ziemmena na gau, Tira heguang hangge kadesuibe leu acheu ze tew gai lau, Tingwang Hera ne acheu ze rang lei: “Nang â yi’nsangsiak ze bam de lei, nang ningching-desang, zai ning luî yi’nsangsiak ze bam de lei.

¹³Nang â Hera gu merie, Eden ge bam de lei; zai tingchu pemîhungbe gechâm-châmbe zat ramme rubi benai diamond; topaz, beril, karnelian, zai jaspar; sapphir, emerald zai garnet, airamme ne nang â keru ze bam de lei. Ning dage gechâk ne tewbe kakerube kerua ramme bam de lei. Ningchu ’ndamgaibe mai ge chiramme ze ning hangge tewgaikuâ de lei.

¹⁴Ningchu reî ra ’nnukkaipeu, ’Nnukkai’ndipeu kereîpeu kerub dage I ningchu kai de lei; Hera gu peloa kehube ka’nchibe ge nang â la de lei; hemichu zeu ge nang tatpat tatgut ze bam lei.

¹⁵Ning dage hemui-helut peupat mak tânege nang â ning gu ’mpuî ramme ge, ningchu ’ndamgaibe mai gene heziâk ga ze lung de lei.

¹⁶Nang helîkahedetbe ze misongga ze pungpatbe ne ning lung tew’ndi ze ning lung ge ka’nggibe pui di, hemui ge nang kau gai di de lei; chidadege nang hebâdibe ne Hera gu peloa kehube gene ningchu I tuâpat te lei; ningchu tew’ngga gu lei, Hei, kerub kereîme ne hemi gu tingchuzeu ge ningchu sâu gai gu lei.

¹⁷Ning luî yibe ziegene ning lung tew’ndi lu, nang kaningchingbe ngeudibe ne ningchu tewkau de lei; heguangme suage kedei ge ningchu I ne tuâkeu gai bu lei, ningchu penui ne ngau lu penui suiyi ra hangge zeu.

¹⁸Nang helîkahedetbe ge hemuigai’ndibe ne, misongga hemui gai di, zai ning gu pebâm ka’nchibe tewhebâ’ndibe ziegene ning peireige I hemitua gai gu lei, hemi ne ningchu rû gu, kedei ge ningchu tewtimbunmi gai bu lei, gepieme leine mikngau gezeu.

¹⁹Ziemmename ruage ning rasam chilume leine ne ningdaulak ze bam gu lei; ningchu hing kam gu, mâtew-tewsedu nang bam dai ra mak lei,” acheu zeu.

²⁰Tingwang gu sam a dage wang kadai de lei: acheu sa ze,

²¹“Ziemmena na gau, Sidon ’mbe ning ju ’nsua lu sam ranglia be lau,

²²Tingwang Hera ne acheu ze rang lei: “Pie le lau, ningchu I ka’nggi lei, Hei, Sidon ning zuilung ge I a ngeudibe I teilia gu lei; dezai I ze Tingwang lei be penui chî gu lei, pechu I ne samram dezai, zai pe dage I ka’nchibe teilia dezai neu;

²³pe dage herarît I lang gai gu, zai pe gu keloa’ndi ge hejai lang gai gu lei; zai pelung ge kechaipum ramme kâukeu gu lei, mâ-mik ’nsangne ge hiazutkie gene kau gu lei, dezai I ze Tingwang lei be penui chî gu lei.

²⁴“Israelbe kiduîme hangge duakrabe hetubang bam ra mak lei, zai penui huâzie ge penui lung tewhereurabe hetu bam ra mak lei, penui je ngauka’nname ruage zeu; dezai I ze Tingwang Hera lei be penui chî gu lei.

²⁵“Tingwang Hera ne acheu ze rang lei; Israelbe kiduîme â penui lung rariptattibe heramdeime ruagene penui je I ne gekumwang’nduigaibe ting dezai pedeime mikngau ge penui ruage I â ka’nchibe lei be teilia dezai Jakobbe dage I ne peibe heram sing ge penui lung ze bam gu lei.

²⁶Chidezai penui mâ de kehingbe bam mak ze lungtemi ze penui bam du lei; eu lei, penui heki tew gu, grepchî merie tew gu, penui lungtemichai ze bam gu lei, penui huâzie ge penui je ngauka’nname leine peireige I samrambe ting dezai, I ze Tingwang Hera lei be penui chî gu lei,” acheu zeu.