Read Zeme Naga EZEKIEL 29 Bible Online

EZEKIEL 29 - Zeme Naga bible

EZEKIEL 29

¹Tingkum pakereube kum gu pakereube kêu gu hezie kereu ze kena mai ge Tingwang gu sam a dage wang de lei, acheu sa ze,

²“Ziemmena na gau, Ijipram heguang Pharaobe lam ning ju ’nsua lu ze, pe peireige benai Ijipme leine peireige tewsabe wangrabe sam ranglia’ntua gai lau.

³Tingwang HERA ne acheu ze rang lei: “Pie le lau, Ijipram heguang Pharaobe ne Nail geuki ge dragon dibe bambe ze, ‘’Nggeuki ze a gu lei, a hangge I ne tew lei,’ ze kacheupeu je I ka’nggi lei.

⁴Nang kezara ge kakuai ne guak lu, geudi ge hekâ ramme je ning lip ge chia gai gu lei, zai ning lip kakki ge hekâ ramme chiahai gai lu ze geudi gene ningchu I lupat ku lei.

⁵Zai I ne tingkangram ge nang benai geudi gu hekâ ramme leine je tuâ gai gu lei; zai ’nduloa ge tuâdiak kai gu, ning pum kechaipum teiwang ze bai ra mak lei, kane ’nduloa ge hekaune ramme benai tinggîm ge ’nruine ramme hetak hang ningchu pei ’ndu lei.

⁶“Israelbe kiduîme hangge penui â heruapum tui gum ze changbe ziegene Ijipram ge bamme leine ne I ze Tingwang lei be penui chî gu lei.

⁷Penui ba ne ningchu zam bei dege nang ne penui ba’ngkoâk pakpedak kai bei lei; zai penui ne ningchu ’ngngêu gai bei dege nang ne penui kia tew’nsia gai bei ze penui kia kedun ze bam ra chang di lei.

⁸Chidadege Tingwang HERA ne acheu ze rang lei, Pie le lau, ning peireige hiazutkie I teiwang gai gu lei, ning dage ziemmena benai hekaune je tewchat ku lei.

⁹“ ‘Nail geuki ze a gu lei, I ne tew lei,’ ze pa ne kacheube ziegene Ijipram ze sâuhammuî ze heram ka’nruabe chang gai gu lei, dezai I ze Tingwang lei be penui chî gu lei.

¹⁰Chidaze pie le lau, ningchu I ka’nggi lei, zai ning gu ’nggeuki je I ka’nggi lei, Migdol gene Sien riâ Ethiopia heramrai chang ze Ijipram ze hênam ’mpiedibe, zai heram ka’nruabe chang ra I tew gai gu lei.

¹¹Chige ziemmena pî ne tatpela ra mak, zai hekaune pî du chige tatpela ra mak lei; zai tingkum hedai lungge mî de chige lung ra mak lei.

¹²Zai piezîngdibe heramme ruage Ijipram je du piezîngdibe bâm chang ra I ne tew gai gu lei; zai namdi sâuhammuîgai’ndibe ramme ruage Ijipram gu namdi ramme ze du kum hedai sâuhammuî gai ze bam gu lei.

¹³“Tingwang HERA ne acheu ze rang lei, tingkum hedai chang dezai tatrarippat lu penui bamdibe bâm gene penui je teiwang’ndui gai dai gu lei.

¹⁴Ijipme kebang nîm’ndime je I ne teiwang gai dai gu lei, penui je lungkeugaibe ramdei, Pathrosram ge helatwang dai ra penui je pei gu lei, zai chige penui â kahelêube heguangram chang ze bam gu lei.

¹⁵Chize helêu’ndilangbe heguangram chang ze bam gu lei, kêdabe heramzatme peireige penui ne hu dai ta du de lei; zai heram zatme peireige penui ne peize samram ta ra penui je I ne tew’nchei-desang gai gu lei.

¹⁶Israelbe kiduîme ne penui chai sui tânege penui mâu ze penui chilube ziegene penui je ’nnum’mmi ta du de lei; kane I ze Tingwang HERA lei be penui chî gu lei,” ze acheu zeu.

¹⁷Zai tingkum ’ngkai ze sena kum gu raîlangbe kêu gu hezie raîlangbe mai ge Tingwang gu sam a dage wang de lei, acheu sa ze,

¹⁸“Ziemmena na gau, Babilon gu heguang Nebukadrezzarbe ne Tira peireige ’nggiranbi-bi ra pe gu hereikangme bau je pa ne rang gai la de lei, zai penui tâ ne tew-tew penui peî keî kam da, zai penui keîtoa du suphuak pat kam de lei, kane pa benai pe gu hereikangme bau hangge Tira je ’nggi ra tâtewbe gene penui hî hangge mâ de timchak kai mak lei.

¹⁹Chipauziegene Tingwang HERA ne acheu ze rang lei: Pie le lau, Ijipram ze Babilon heguang Nebukadrezzarbe ba ge I ne pei gai ’ndu de lei, Ijip heurâ misongga bambe ze lutat kam ’ndu de lei, pa ne sut-tat kam ’ndu de lei; chize ne pe gu hereikangme bau hî hangge chang gu de lei.

²⁰A hangge penui ne tâtewhereugaibe ziegene Ijipram ze penui hî hangge timchak kai de lei, ze Tingwang HERA ne kacheu de lei.

²¹“Chipau mai ge Israelbe kiduîme hangge meli’nsei kie puakpat ra I ne tew gai gu lei, zai penui ruage ning mui I ne lat kai gu lei; dezai I ze Tingwang lei be penui chî gu lei,” ze kacheu de lei.