Read Zeme Naga EZEKIEL 3 Bible Online

EZEKIEL 3 - Zeme Naga bible

EZEKIEL 3

¹Dadege achu, “Ziemmena na gau, nang ngaulube teu zu lau, aipau leisizui ze teu lau, tat ze Israelme kiduîme je salia lau,” ze kacheu de lei.

²Chidadege a mui I ’ngngapat te lei. Zai chi leisizui achu teu ra pei de lei.

³Zai pa ne achu, “Ziemmena na gau, ning bungpui ge teu gai zu lau, aipau leisizui I peibe ze ning bungpui ge kaipuigit kai zu lau,” ze kacheu de lei. Dadege chize I teu gai de lei, chize a mui ge ’ngkuidui gum ze kum ze bam di de lei.

⁴Zai pa ne achu, “Ziemmena na gau, tat ze Israelbe kiduîme je a sam nang tei lu ze penui je salia be lau.

⁵Heramzat helad gechâmme zai helad sahungbe same dage ningchu I lang gai mak lei, kane Israelbe kiduîme dage lang gai lei.

⁶Heramzatme, penui lad nang chî mak, zai helad sahungbe same ruage ningchu I lang gai bei sedu ning sam penui ’ngking gu lei.

⁷Kane Israelbe kiduîme â ’ngking ra mak lei, achu du penui ’ngking nei mak lei: Israelbe kiduîme leine â helung ’ndamdei di ze katingkangme chang daseu.

⁸Pie le lau, chunage nang du penui gum ze ’ndamdei ze nang ’ndeidit di ze bam ra ningchu I tew gai ’nde lei.

⁹Tingchu chibe gum zai hemichu chibe gum ning lung chi ze bam ra ningchu I tew gai gu lei; hing se lau, penui mikpie ge nang ’ngngîn se lau, penui â ka’nggibe kiduîme chang leusedu nang hing se lau,” kacheu de lei.

¹⁰Bepeirei achu pa ne sa’nduâ dai ze, “Ziemmena na gau, ningchu a sam saliagaibe leine ning kun ’ndualie le lau, zai ning lung ge kaigekua le lau.

¹¹Zai nang ning puiname kebang chang ze bamme dage zuamie ze, penui ne ka’ngking mei ’ngking mak mei leusedu, ‘Aize Tingwang HERA dagene sampatbe sam lei,’ ze acheu nang salia lau,” ze kacheu de lei.

¹²Chidadege â Herui ne achu teichu gai de lei, pebâm gene Tingwang ngeudibe chu dadege a chai gene keteika’nchibe kuâ I seu de lei.

¹³Zai chize â, mâ-keringbe kan ramme kat-kat ze deîtaube kuâ, zai bepîgua ramme kuâ, zai chize â keteika’nchibe kuâ gum lei.

¹⁴Zai herui ne achu teichu lu, achu nguatat ti de lei; zai a gu herui ne pe lunggailak luisui ze ngauraudun I tat te lei; kane a peireige Tingwang ba peranchibe gene I tat te lei.

¹⁵Chidadege Telabib ge kebangchangme bau, Kebar geukung ge bamme dage I wangchang de lei, zai chige I ’nningdaulak ze hezie senane penui ruage ’nnai bam de lei.

¹⁶Zai hezie senane chângge Tingwang gu sam a dage wang de lei, acheu sa ze,

¹⁷“Ziemmena na gau, Israelbe kiduîme hangge kereîpeu hang I ne ningchu kelâng lu de lei; chidadege I samsabe nang seu tâne mi kehingbe kedeibe sam a dagene peibeibe ze penui je nang salia ra lei.

¹⁸Helungriaksiapeu je a sam, ‘Nang chai sing gu lei,’ ze I ranggaibe sam chi helungriaksiapeu ring le ra tâsiabe tewbe ’mpuî sâu ra nang ne pechu laddeimakbe ne pe gu hemui ne pa chai dizai â, pe jaipâu mî ze ning dagene I kie sing gu lei.

¹⁹Kane nang ne helungriaksiapeu je laddei bei ze pa helungriaksiabe tak sâu mak zai pa tâ-kesiabe tewbe ’mpuî sâu makchai â, pe gu hemui ne pa chai gu lei, kane nang â ning gu keringbe meupat lu ze bam gu lei.

²⁰Zai ziemmena kapelingbe kau, pa kapelingbe sâu ze hede’ngka dizai â, pechu mâ-’nrap lu ze kau ra I ne kai dizai â pa chai gu lei; nang ne pechu kedeibe peimakbe ziegene pe gu hemui gene pa chai gu lei; tâ peling pa tewgaibe ze chibam dai ra mak lei; kane pe jaipâu mî ze â ning dagene I lu ra ’nnang gu lei.

²¹Kane ziemmena kapelingbe kau je hemui gai mak ra nang ne laddei bei ze pa hemui gai makchai â, pa ring sing gu lei, nang ne pechu laddeibeibe ziegene nang du keringbe ngau gu lei,” ze kacheu de lei.

²²Zai chige Tingwang ba a peireige bam di de lei, dadege pa ne a chu, “Chu lu ze peningkâm ’mbe nang tatchu lau, chigene ningchu I ’mpau gu lei,” ze kacheu de lei. Dadege I chu lu ze peningkâm ’mbe tat ti de lei.

²³Zai pie le lau, chige Tingwang ngeudibe ze Kebar geukung ge pengêudibe I ngaube luigum ze chige saplaleu de lei, dadege chige I kâu’ngkumkeu di de lei.

²⁴Chidadege Herui a dage gut ti de lei, zai a pî ne sap ra tew gai bei de lei. Dadege pa ne achu ’mpau ze, “Tat chu lau, ning ki lungge ’ngkam kainam lu bam lau.

²⁵Hei, nang ziemmena na gau, heria ramme ning peireige tuâ gai gu, zai ningchu pi gu lei, chidezai penui ruagene nang zuapatdaichi lak ra hangge zeu.

²⁶Ning leipak ze ning hak ge kup ra I ne tew gai gu lei, nang ning kuâ pat dai ra mak lei, zai penui je nang sa’nsiachi dai ra mak lei, penui â ka’nggime kiduîme daseu.

²⁷Kane ningchu I ne sam’mpau gai bei dezai I ne ning mui lat kai bu lei, dezai nang ne penui je, ‘Tingwang HERA ne acheu rang lei,’ acheu be lau. ’Ngkingneime peize ’ngking le lau, zai ’ngkinggailakme peize ’ngking se lau, penui â ka’nggibe kiduîme daseu.