Read Zeme Naga EZEKIEL 30 Bible Online

EZEKIEL 30 - Zeme Naga bible

EZEKIEL 30

¹Tingwang gu sam a dage wang de lei, acheu ze sa ze,

²“Ziemmena na gau, sam ranglia’ntua gai lau, acheu ze sa lau, Tingwang Hera ne acheu ze rang lei, “’Nninghereu zu lau, ‘Chipau mai hangge hing lei hei!’ acheu zeu.

³Chipau mai ze na di daseu, Tingwang gu tingnaimikpui na di daseu; chipau mai ze tingmâube mai hang chang gu lei, heramzatme garabe hî hang chang gu lei.

⁴Ijip peireige hiazutkie wang gu, zai Ethiopia ge lunghereu-kadesangbe bam gu lei, zai Ijipme je tewchat tuâtiam gai ra, zai pe heurâ misongga ze teitattibe, zai heram ze tew’nsiakamgaibe mai dezai neu.

⁵Ethiopia, Put, Lud, zai Arabia, Libia, zai pezat leine lungkebut ze bamme hiazutkie gene kau gu lei.

⁶“Tingwang ne acheu rang lei: Ijip je nguagume leine â, kau gu lei, tâtewchibe peranchi ze ’nning’ndi ze bambe helêukeu gu lei; Migdol gene Siene chang ze hiazutkie ne bikau kam gu lei, zeu.

⁷Heram ramme sâuhammuî’ndibe heguangram ruage namdi sâuhammuî’ndibe kat chang gu lei, zai pe gu namdi ramme ruage heram sâuhammuî’ndibe namdi chang gu lei.

⁸Ijipram ge I ne hemi kai bei ze pechu gume leine je I ne penui je tew’nsia gai bei dezai, I ze Tingwang lei be penui chî gu lei.

⁹“Chipau mai dezai a dagene hepâupaume dui’nnei gene Ethiopiame ’ntîngmakme hing ra tew gai gu lei, zai tewhereu-kadesangbe penui peireige wang gu lei, Ijip kahereube mai ge gum zeu; pie le lau, wang mie de lei!

¹⁰“Tingwang Hera ne acheu ze rang lei: Babilon heguang Nebukadrezzarbe ba ne Ijipram heurâ misongga bambe tew’ngga kam gai gu lei.

¹¹Heram tew’nsia ra pa benai pe gu ziemmena je heramzatme ne ngauhing-kadesangbe teiwang gai gu lei, zai Ijipme peireige hiazutkie huachu gai gu lei, zai heram ze kechaipum ne puigit ze bam gu lei.

¹²Nail geuki ze I ne tewchang ’ndu lei, zai heram ze ziemmena kesiame ba ge zua gai ’ndu lei; zai heram benai pelung ge bambe leine ze Jentailme ba ne heram ze tewhâmmuî ’nde ra tew gai gu lei, aize I, Tingwang ne rang lei.

¹³“Tingwang Hera ne acheu ze rang lei: Mâ-luîtewbe ramme I ne tew’nsia gu lei, zai Memphis ge mâ-luîtewbe ramme I ne tew’ngga ’ndu lei; zai Ijip ge besuitewme mî de bam dai ra mak lei; Ijip ramdei ge kehingbe bam ra I kai gu lei.

¹⁴Pathros je â hênam’mpie ra tew gai gu lei, zai Zoan ge hemi kai gu, zai Thebes je â I ne samram gu lei.

¹⁵Ijip gu keriengdi Pelusium peireige a lumpum ruîkeu gai gu lei; zai Thebes gu baudime je tew’ngga ’ndu lei.

¹⁶Ijip ge I ne hemi kai gu lei, zai Pelusium beted’nsî ze bam gu lei, Thebes ze tewpâng gu lei, zai pe gu kerie ramme tewkau ’ndu lei.

¹⁷On benai Pibeseth keloame rehangme â, hiazutkie gene chai gu lei, zai chige ’mpuimi ramme je â, kebang hang nîmtat tu lei.

¹⁸Ijipme ne besuitew ze bambe I ne tewpâng gai bei, peranchibe ngeudibe suang ze bambe I ne tew’nsau gai bei dezai Tehaphnehes keloa ge naimik muî du lei. Pechu â kemâu ne sung gu lei, zai pe gu heleume je â kebang hang nîmtat tu lei.

¹⁹Aigum ze Ijipram je I ne samram gu lei; dezai I ze Tingwang lei be penui chî gu lei,” ze kacheu de lei.

²⁰Zai tingkum kereu ze kat gu hekêu raîlangbe chipau kêu gu hezie pasenabe mai ge Tingwang gu sam a dage wang de lei, acheu sa ze,

²¹“Ziemmena na gau, Ijip heguang Pharaobe ba I ne tewbet ’nde lei, pie le lau, hiazutkie pa tei dai ra pe baran tew’nchi gai ra reheu ’nnuk kai ze dum gai mak tai lei.

²²Chidaze Tingwang Hera ne acheu ze rang lei, Pie le lau, Ijip heguang Pharaobe je I ka’nggi lei, pe ba yi’mbia benai pe ba bet ti ’mbia ba du I ne tewbet ku lei: zai pe ba gene hiazutkie I ne tewbet ku lei.

²³Zai Ijipme je â heramzatme ruage I ne tewtimrarip ’ndu, zai heguangram leine ’nzirarip kai gu lei.

²⁴Zai Babilon heguang baran I ne tew’nchi gai gu lei, zai pe ba ge a gu hiazutkie I kai gu lei; kane Pharaobe ba I ne tewbet ’ndu lei, zai hejamdibe kau gum ze pe suage pa huaipun ze bam gu,

²⁵zai Babilon heguang baran I ne tew’nchi gai gu, kane Pharaobe ba â kâukeu du lei; zai Babilon heguang ba ge a gu hiazutkie kai gu, Ijip heguang peireige pe ba huachu ze hiazutkie kezap kai dezai I ze Tingwang lei be penui chî gu lei.

²⁶Zai Ijip je â heramzatme ruage tewtimrarip kai gu, zai heguangram ramme leine ge penui je ’nzirarip kai ’ndu lei; chidezai I ze Tingwang lei be penui chî gu lei,” ze kacheu de lei.