Read Zeme Naga EZEKIEL 31 Bible Online

EZEKIEL 31 - Zeme Naga bible

EZEKIEL 31

¹Zai tingkum kereu ze kat kum gu, pakechumbe kêu hezie raîlangbe mai ge Tingwang gu sam a dage wang de lei, acheu sa ze,

²“Ziemmena na gau, Ijip heguang Pharaobe benai pe gu ziemmena baudime dage salia lau: “Nang ning ngeudibe ze châu je ka’nzuâ lau?

³Pie le lau, nang â Lebanon ge kedarchingbang peluiyibe bekeî ramme pakezui kaumang, pebang getualieng, betunroi bepuâksûne ze ting tûngchangbe gum ze bam ra I ne ningchu tew gai gu lei.

⁴Hedui ne chize chîng ra tew gai bei de lei, zai kedei ge hedui ne chize huchu ra tew gai bei de lei, chige chingbang linggaibe ge hedui ne luaguâ lei, chingbang zat leine hedui ne luaguâ ra tew gai bei de lei.

⁵Chidadege hênam gu chingbang ramme sua â hu’ntierie lei, hedui misongga luaguâ ra tewgaibeibe ziegene bepuâk pat dege bekeî ramme du maîtie pat lei.

⁶Tinggîm ge liamruabe ’nruine ramme leine bekeî ramme ge penui chippua gai lei, hekaune zat leine bekeî ramme kangge penui poine ’nna gai lei, pakezui kangge heramzat kedime leine lung ze bam lei.

⁷Pema ramme hedui misongga bambe ge hiamchang ze bambe ziegene pebang di ze peluiyi, zai bekeî ramme du tie sang tie lei.

⁸Hera gu merie ge kedarbang ne chi je helitchi lak lei. Chingkeleu bang keî du chipau pe keî ramme gumbe ga lei, plan bang gu pekiâng ramme du chigumbe ga lei, Hera gu merie ge chigumbe chingbang peluiyibe mâ de ga lei.

⁹Pekeî ramme misongga bam ra I ne tewgaibeibe ne peluiyi lei, chidezai Hera gu Eden merie ge chingbang bambe leine ne hemimeu ze bam ra hangge zeu.

¹⁰“Chidadege Tingwang Hera ne acheu ze rang lei, nang dichu ze hu sang hu ze, ning keî’ngkap ramme chîngchu ze betunroî ze kemâu tungchang bam di de lei.

¹¹Pa kesiabe ziegene I ne pechu kelipat kai bei de lei, heramzatme ruage peranchipeu ba ge pechu pei gai bei de lei, pa tâ-kesiabe tewbe luigum ze pe peireige tew gai gu lei.

¹²Hesangzieme ruage ngauhingbe heramzatme ne kuîkau gu, heki ramme peloa kedibe ramme ge zai pebakchuak ramme ge kâukeu gai gu lei; zai pekiâng ramme batbe ramme ze ramloa gu ’nggeuki ramme ge tuâtiam bam gu lei; zai kedeirei gu ziemmena ramme pa kezuikang gene zuapat lu ze pechu sâu ’ndu lei.

¹³Tinggîm ge liamruabe ’nruine ramme aipau siadibe peireige bam gu lei, zai ramloa gu hekaune ramme bekeî ramme peireige bam gu lei.

¹⁴Chidadege hingbang leine heduitering ge bam lu ze huchu ze penui hube ze ’nning’ndi mak ra, zai penui keîrang ramme du chigum ze penui buâ pungpak bam dai mak ra, zai hingbang leine hedui saklube ne huchu ze kemâu riâ ge bam dai mak ra lei, kedei sîng ge kechaime bambe kuiki chuklangbe ge ziemmename ruatat ra, kechaibe ne penui je nîm kam ’ndi daseu, penui ’nteumena je kechaibe ge lang gai ’ndi daseu.

¹⁵“Tingwang Hera ne acheu ze rang lei: Kechaiberam ge nang wangkeube mai ge kedei sîng gu hedui chukbe ne pechu puîhap ku lei, ’nggeuki ramme heduiluabe I ne tew’nsau ’ndu, hedui misongga ze sungmang bam du lei, Lebanon ne pechu puîhap kai ra I ne tew gai gu lei, ramloa gu chingbang ramme pe ziegene hegui kam di de lei.

¹⁶Pa kâukeube kuâ ne heramzatme kedun ra I ne tew gai gu lei, zai mâ-kuiki gechukbe ge wangkeudime benai pechu Kechaiberam ge I ne tuâkeu gai bei dezai neu; Eden gu hechingbang ramme leine, Lebanon gu hechingbang yilangbe kelânglube, hedui saklume leine, kedei kum lam ge bamme leine lungtemi ze penui bam gu lei, eu lei, pa kezui kangge bamme ze heramzatme ruage penui ga gai gu lei.

¹⁷Hiazutkie ne bichat’ndime leine benai penui Kechaiberam ge wangkeu gu lei.

¹⁸Eden gu hingbang ramme ruage di ze tiebe pengêudibe nang gumbe châu la lau? Kane Eden gu hingbang ramme benai ningchu kedei kum lam tuâkeu gai gu lei, hiazutkie ne bichat’ndime benai rumgetenmakme dage nang tuâ bam gu lei. “Aize Pharaobe benai baudime je rang lei,” ze Tingwang Hera ne kacheu de lei.