Read Zeme Naga EZEKIEL 32 Bible Online

EZEKIEL 32 - Zeme Naga bible

EZEKIEL 32

¹Zai tingkum kereu ze kena, hekêu kereu ze kena gu hezie raîlangbe mai ge Tingwang gu sam a dage wang de lei, acheu sa ze,

²“Ziemmena na gau, Ijip gu heguang Pharaobe hangge kadesuibe leutew gai ze pe suage acheu salia lau, “Heramzatme ruage nang â, duilui perîratbe ting gumbe hang ning runne ningchu ’nning gai ze bam lei, kane nang â sungkling ge Dragon gum lei; ning gu ’nggeuki gene nang hedui pungbapat lei; ning gu hedui ne tewhenau gai bei, ning pî ne ’nggeuki ramme tewhebâ gai bei de lei.

³Tingwang Hera ne acheu ze rang lei: A gu chîak nang benai ziemmena baudime peireige tuâ gai gu lei, a gu chîak ne penui je chakpat ku lei.

⁴Dezaine kedei ge ningchu sâu gai gu, zai kedeiloa ge ningchu I ne tuâpat kai gu lei, zai tinggîm ge liamruabe ’nruine ramme ne ning peireige bam ra, zai kedeirei gu hekaune ramme ne ning dage keduaiteu ze bam ra penui je I ne tew gai gu lei.

⁵Peloa kehube ramme ge ning ji ’nruk kai gu, zai ning pum herum zene bechuak ramme bampui gu lei.

⁶Ning jai luapatbe zene kedei zuâ gu lei, zai peloa kehube ramme ge du, zai ’nggeukâm ramme ge ning jai ne pui gu lei.

⁷Nang kebabe I ne tew’mmit kai bei dezai, zai tinggîm ze I ne kebanam ’ndu lei, zai hegi ramme muî de ra tew gai gu lei; zai naimik je kemâu ne sungnam ra tew gai gu lei; zai hekêu ne pa ’mbi kebabe pei ra mak lei.

⁸Tinggîm gu kebabe leine ning peireige I ne kemuîbe hang tew gai gu, zai ning ramdei ge kemuîbe I ne kai gu lei, ze Tingwang Hera ne rang lei.

⁹“Heramzatme dage nang chimakbe mâ-tewka’nsiabe I ne teiwang gai bei dezai ziemmena misonggame lung I ne tewhereu gai gu lei.

¹⁰Eu lei, ziemmena misongga ningdaulak ra I tew gai gu lei, penui suage a gu hiazutkie kedetplik kai bei dezai ning ziegene penui gu heguangme du hing-desang ze penui duângga ze bam gu lei; nang kâukeube mai ge ziemmena ’nteumena ne penui keringbe ga de ra hing ze penui kedun gu lei.

¹¹Tingwang Hera ne acheu ze rang gai daseu: Babilon heguang gu hiazutkie ning peireige wang gu lei.

¹²Zai heramzatme mi ngauhing-kadesangbe zatme, hereikang peranchime, herei zeu chîme gu hiazutkie gene ning gu ziemmena baudime kau ra I tew gai gu lei, “Zai Ijipram ngeudibe penui ne sut-tat tu lei, zai ziemmena baudime je tew’nsia ’ndu lei.

¹³Hedui misonggabe ’nggeukâm ge hekaune leine I ne tew’ngga kam ’ndu lei; ziemmena pî ne hedui tewhenau dai ra mak lei, zai hekaune pî ne du hedui tewhenau dai ra mak lei.

¹⁴Chidezai hedui ze I ne tew’nchi gai dai gu lei, zai penui gu ’nggeuki ramme ze mâ-châ gum lua ra I tew gai dai gu lei, ze Tingwang Hera ne rang lei.

¹⁵Ijipram ze I ne tew’mpiehâmmuî gai bei, zai chige lungpuigit bambe I ne tew’ngga kam gai dezai, chige lungme je I ne tew’ngga kam gai dezai I ze Tingwang lei be penui chî gu lei.

¹⁶Aize kadesuibe leu, penui ne pechu huî ze desuirabe leu hang chang gu lei; heramzatme na ’mpuimi ramme ne Ijip je puîhap ku lei, zai ziemmena ’nteumena ne pechu puîhap ku lei, ze Tingwang ne rang lei,” ze kacheu de lei.

¹⁷Zai tingkum kereu ze kena kum gu hekêu raîlangbe gu hezie kereu ze mengeu mai ge Tingwang gu sam a dage wang de lei, acheu sa ze,

¹⁸“Ziemmena na gau, Ijipme ziemmena baudime hangge hap’nrung zu lau, pa benai heramzatme heji di pengêudime na ’mpuimi ramme je kedeisîng kechaime bambe kuiki chukbe ge penui je tuâkeu gai ne lau:

¹⁹‘Châu peireige ning luî yi-ka’ngkeu lau? Wangkeu zu lau, rumgetenmakme ruage jei du lau,’ kacheu de lei.

²⁰Pe dage pe gu baudime du tuâtiam ze bam gu lei, hiazutkie ne bichat’ndime ruage penui kau gai gu lei.

²¹Kechaime ram ge pechu ka’ngngâme, gechime ruage pe ranchime ne sa ze, ‘Rumgetanmakme, hiazutkie ne bichat’ndime dage penui jei ra wangkeu de lei,’ ze rang lei.

²²“Chige Assiriame benai pebau leine la lei; zai penui gu heraw ramme ne pechu bamguâ lei, penui ’nteumena je tewchat ’ndi de lei, hiazutkie gene penui kâu di de lei,

²³penui gu heraw ramme â kechaime bambe kuiki chuklangbe ge la lei, zai pe gu heraw hiage pe gu baudime ne bamguâ lei; penui ’nteumena je tewchat ’ndi de lei, hiazutkie gene penui kâu di de lei, keringme gu heramdei ge ngauhingbe tâ-kesiabe penui tew ze bam de lei.

²⁴“Chige Elam benai pe gu heraw hiage pe gu baudime ne bamguâ lei; penui ’nteumena je tewchat ’ndi de lei; hiazutkie gene penui kau di de lei, kedei ’ngkum ge rumgetenmakme keringme gu heramdei ge ngauhingbe tâ-kesiabe tewme dage penui wangkeu di de lei; chuna penui mâu-miê pung lu ’ngngam ze kechaime bambe kuiki chukbe ge wangkeume dage penui wangkeu di de lei.

²⁵Tewchat’ndibe ruage pa benai pe gu baudime jeî hang penui ne teleu gai de lei; penui gu heraw ramme ne pechu guâ ze bam lei, penui ’nteumena rumgetenmakme, zai hiazutkie ne bichat’ndime; keringbe gu heramdei ge ngauhingbe tâ-kesiabe penui tewbambe ze, kechaime bambe kuiki chukbe ge wangkeume benai penui mâu-miê pung lu ’ngngam ze wangkeu de lei; tewchat’ndime ruage penui je kai bei de lei.

²⁶“Chige Meshek benai Tubal, zai penai gu baudime benai penui bam de lei; penui gu heraw ramme ne chize bamguâ lei, penui ’nteumena rumgetenmakme, hiazutkie ne bichat’ndime lei; keringbe gu heramdei ge penui ne ngauhingbe tâ-kesiabe tew gai daseu.

²⁷Rumgetanmakme peranchime kâudime, hereika’nggibe merua ramme benai gehenna ge wangkeudime penui gu hiazutkie ramme penui ’ngkûm lu, kane penui ra peireige hinggei kaime dage penui â bam mak lei; penui â keringme gu heramdei ge peranchime ngauhingme chang daseu.

²⁸Eu lei, rumgetenmakme dage nang sia kam di ze tuâ bam gu lei, hiazutkie ne bichat’ndime dage nang â jei gu lei.

²⁹“Chige Edom, zai pe gu heguangme benai pemuipuame leine bam gu lei; penui ranchi leusedu hiazutkie ne bichat’ndime dage tuâ bam gu lei, rumgetenmakme kechaime bambe kuiki chukbe ge wangkeudime dage penui tuâ bam gu lei.

³⁰“Chige tingpeîme gu heguangme penui ’nteumena zai Sidonme leine, tewchat’ndime ruage wangkeu ze penui bam gu lei; penui ranchi ze ngauhingbe chang ze bam leusedu, penui ’ngngam ze rumgetenmakme hiazutkie ne bichat’ndime ruage penui tuâ bam gu lei, zai kechaime bambe kuiki chuklangbe ge wangkeume benai penui ’ngngam ze bam gu lei.

³¹“Pharaobe ne penui je ngau dezai pe runne pe lung tewtemi ze bam gu lei, pe gu baudime je hiazutkie ne tewchat’mdime bau je ngau dezai neu, ze Tingwang Hera ne kacheu de lei.

³²Keringme gu heramdei ge pa ne kehingbe bam ra tew gai bei daseu, chidaze hiazutkie ne bichat’ndime rumgetenmakme ruage bam ra pechu kai gu lei; Pharaobe benai pe gu ziemmename leine jeu, ze Tingwang Hera ne kacheu de lei,” ze kacheu de lei.