Read Zeme Naga EZEKIEL 33 Bible Online

EZEKIEL 33 - Zeme Naga bible

EZEKIEL 33

¹Tingwang gu sam a dage wang de lei, acheu sa ze,

²“Ziemmena na gau, ning ramname je sam salia lau, zai penui je acheu ze sa lau, Heram lungge hiazutkie I ne teiwang gai bei dezai keloaname ruage hangkat je penui gu hekêtkaipeu hang kai bei lêuzai,

³zai heram lungge hiazutkie wangbe pa ngau dezai, ziemmena ramme chî ra hegeîluîkie ’mmut kai bei lêuzai â,

⁴mi-mige hegeîluîkie kuâ seu lu ze mâ-hangge du ’nning gai mak ze, hiazutkie ne wang ze pe gu keringbe lu ne lêuzai â, pe jaipâu â pa ne pung ra lei.

⁵Hegeîluîkie kuâ pa seu lu ze mâ-hangge du pa ’nninggaimakbe ziegene pe jaipâu â pa ne pung ra lei.

⁶Kane hekêtkaipeu ne hiazutkie wangbe pa ngau lu ze hegeîluîkie pa ne ’mmut kai mak bei ze, baudime ’ntîngkua mak ze hiazutkie ne wang ze penui ruage hangkat je tew’ngga ’ndizai â, pe gu hemui ne pa chai leu sedu pe jaipâu â hekêtkaipeu dagene I lu gu lei, ze kacheu lei.

⁷“Chigum ze nang ziemmena na gau, Israelbe kiduîme hangge ningchu hekêtkaipeu hangge I ne kai lei; chidaze a mui gene sam patbe nang ’ngking le lau, herei ’ntîngrabe I ne rangliabe sam ze penui je nang salia ra lei.

⁸Ziemmena kesiapeu je I ne, Hei, ziemmena kesiapeu gau, nang chai sing gu lei, acheu bei, zai pa kesiabe pe gu ’mpuî sâu ra, nang ne dei ze ranglia makchai â, chi ziemmena kesiapeu pa tâ-kesiabe tewbe gene pa chai gu lei, kane pe jaipâu â ning dagene I lu gu lei.

⁹’Ndaigum mei leusedu ziemmena kesia kau je pa kebambe tak keli ra nang ne salia bei ze, pa telung keli makchai â, pe gu hemui gene pa chai gu lei, kane ning gu keringbe nang â meupat lu de lei.

¹⁰“Ziemmena na gau, Israelbe kiduîme je salia lau, ‘Anui gu hemui ramme, zai anui hedieka’ngkabe ramme, zai chiramme ne anui je dapgit ze bam, chipauziegene anui je tew’ngga kam ’nda, ’ndaigum ze anui ring ze bam ra lau?’ ze ningnui kacheu de lei.

¹¹Penui je acheu salia lau, I â keringbe Rapeu Tingwang Hera lei, ziemmena kesiabe kau kechaibe ge mâ de a suiyibe ga lei, kane ziemmena kesiabe kau ne pa kebambe tak sâu nan ze ring bam ra I lunei lei; nang telung tak siabe gene helatwang lau, Hei, Israelbe kiduîme gau, ’ndaitew ze ningnui chai ra lau? ze Tingwang Hera ne sa lei.

¹²Zai nang ziemmena na gau, ning gu ziemmena je salia lau, ziemmena katelingbe kau ne pa hedieka’ngkabe mai ge pa katelingbe ne pechu ’nripat kai ra mak lei, zai ziemmena kesiabe kau du pa tâ-kesiabe tewbe saube mai ge pa kau ra mak lei; zai ziemmena katelingbe kau du pa hemuitewbe mai ge pa katelingbe ne ringchi lak lei.

¹³Zai katelingbe ziemmena je, ‘Nang â ring sing gu lei,’ ze I ne acheu bei ze pa katelingbe je ’nnumtew ze tâ-kesiabe pa tew dizai â pa ne mâ-tâyibe tewgaibe katte I chibam ra mak lei, tâ-kesiabe pa tewbe ge pa chai gu lei.

¹⁴Zai ziemmena kesiabe kau je, ‘Nang chai sing gu lei,’ ze I ne acheu dai bei ze pa ne hemui tâ tewbe sâu ze peling benai hingde ne kerangbe pa tew dizai â,

¹⁵ziemmena kesiabe kau ne mâ-hegasutteulube pa’nchung pa ne peiruî dai bei, zai mâ-hegalube pei dai bei, kelungbesie luî gene pa tat ze bam, tâ-kesiabe mâ de pa tew ta dizai â, pa ring sing gu lei, pa chai ra mak lei.

¹⁶Pa ne tâsiabe tewbe I ne chibam dai ra mak lei, besie hingde luî ze pa ne pelingtew ze bam zai â, pa ring sing gu lei.

¹⁷“Kane ning ramname ne sa ze, ‘Tingwang ne mâ-tâtewbe tak mâ de ’nzei mak lei,’ ze kacheu de lei. Kane penui ne mâ tâtewbe tak ze yi mak lei.

¹⁸Ziemmena katelingbe kau ne katelingbe sâu nan ze tâsiabe pa tew dizai â chigene pa chai gu lei.

¹⁹Zai ziemmena siabe kau ne tâsiabe pa tewbe sâu nan ze, besie hingde luigum ze pa tew zai peling tew zai â, chigene pa ring gu lei.

²⁰Kane ningnui ne, ‘Tingwang ne mâ-tâtewbe tak mâ de ’nzei mak lei,’ ze kacheu de lei. Hei, Israel kibaume gau, ziemmena ’nteumena je penui tatew luigum ze penui je I samram gu lei,” ze kacheu de lei.

²¹Zai anui kebang changbe tingkum kereu ze kena pakereube kêu gu hezie mengeu mai ge, Jerusalem gene pakpatbe hangkat a dage wang lu ze, “Namdi ze kau de lei,” ze pau gai lei.

²²Chi pak’mbiapatlupeu a dage pa wang makge, hegî ge Tingwang ba a peireige bam lei, hechua ge a dage pa wang dege a muiki lat kai bei de lei, a kuâ pat mak ze bam ta di de lei.

²³Dadege Tingwang gu sam a dage wang de lei, acheu sa ze,

²⁴“Ziemmena na gau, Israelram sâuhammuîgai’ndibe ge lungme ne acheu sa ze, ‘Abrahambe â perunne lei, sede heram ze pa ’nram lu lei, kane anui â ziemmena misongga lamui lei; anui ne lung ra heram ze pei sing gai de lei,’ ze kacheu de lei.

²⁵Chidadege penui je Tingwang Hera ne acheu ze rang lei, ningnui â hemeikâng hejai giebe teu lei, ningnui gu mâ-luîtewbe lam ningnui mik piehang ze bam, hejai ningnui tewpat, chidaze heram ze ningnui ngau dui mei?

²⁶Ningnui gu hiazutkie je ningnui ’nnumtew ze bam, ngaukatenetbe tâ tew’nsui, ningnui ’nteumena ne ningnui kiningme nâu je tew’nsia, heram ze ningnui ngau dui mei?

²⁷Aigum ze penui je nang sam salia ra lei, Tingwang Hera ne acheu ze rang lei, I â keringbe Rapeu lei, heram sâuhammuî’ndibe ge lungme â hiazutkie gene penui kau sing gu lei, ’nduloa ge lungme â hekaune ne nîmteu ra pei gai gu lei, kerie lungge bamme, zai hekâuki ge bamme â herarît kesiabe ne penui chai gu lei.

²⁸Zai heram ze I ne sâuhammuî gai gu, pa peranchibe pengêudibe ze ga gai du lei; Israelme gu hekaloa ramme sâuhammuî ra tew gai bei ze, chige mî de tatpela ra mak lei.

²⁹Ngaukatenetbe tâ tewbe ziegene heram ze sâuhammuî ra I tew gai gu lei, chidezai I ze Tingwang lei be penui chî gu lei.

³⁰“Nang ziemmena na gau, kerie hiage zai heki kemui ge ning ramname â acheu salumteu ze lamui lei, ’nteumena ne penui sikiname je, ‘Kei lei, Tingwang ne sam rangliabe ’ngking ra anui tat kei lei,’ ze penui kiam lei.

³¹Zai penui ning dage a gu ziemmena helî gum ze wang gu lei, a gu ziemmena gum ze ning suage penui ’ntau gu lei, ning sam penui ’ngking gu lei, kane penui lu sua ra mak lei; penui mui ne ningchu hung-kadesangbe tewlia gu lei, kane penui lung â penui hang gie ra peu lei.

³²Zai pie le lau, nang â penui hangge kehungbe leu, ’nra, ’ntoî teichime peruak yime ne ziebe gum la de lei, nang samsabe penui ka’ngking dadegeu, kane penui tew ra mak lei.

³³Aize wangchang dezai, zai chize â wang gu de lei—chidezai penui ruage kemeu la lei be penui chî gu lei, ze penui acheu sa lei,” ze kacheu de lei.