Read Zeme Naga EZEKIEL 34 Bible Online

EZEKIEL 34 - Zeme Naga bible

EZEKIEL 34

¹Tingwang gu sam a dage wang de lei: acheu sa ze,

²“Ziemmena na gau, Israel gu melireîme peireige kemeu sam pau gai lau, zai penui melireîme dage ’nsangdu kemeume gu sam pau gai lau, Tingwang ne aigum ze rang lei: Ningnui runne ningnui je guî ze bamme gau! Melireîme â meli ramme je guî mak ra kau mei?

³Pechâ ramme ningnui ne teu lu, zai pegêu ramme ne ningnui paîni tew ze bam, zai peleuyibe ramme ningnui ne gîchat ze bam lei, kane meli ramme je â ningnui guî mak lei.

⁴Peran-gabe je ningnui peran tew’nchi gai mak, zai ka’nrâbe kau je du ningnui tew’mmi gai mak, zai pe pî bettibe kau je du dum gai mak, lietattibe kau je du ningnui gekumwang dai mak; zai gadibe kau je du ningnui peuwang gai dai mak, kane penui peireige ’ngngirang ze ’nchi-chine tâtew ze penui je ningnui ne samram lei.

⁵Penui â rarip ze bam di de lei, melireîme gabe ziegeneu; penui rarip ze bam bei dadege hênam ge hekaune ramme hetak hang chang di de lei.

⁶A gu meli ramme â peloa kehube ramme, zai peloa kedibe ramme ge penui kezittat kam de lei; eu lei, a gu melidung â kedeirei ge rariptat te lei, penui je ’nningkatinggeube kau, zai peube kau mî de ga lei, ze acheu zeu.

⁷“Chidaze ningnui melireîme gau, Tingwang gu sam ’ngking le lau,

⁸I ringbe ziegeneu, ze Tingwang ne kacheu de lei. Pelingsing ze a gu melidung je ’nningkatinggeube kau ’nggabe ziegene a gu melidung â hekaune gu hetak chang gai di de lei; zai a gu melidung je peube kau gabe ziegene a gu melidung ze hênamkang ge mâ-rekaune ne nîmteu ra chang di de lei; kane a gu melireîme ne a gu melidung je guî mak ze penui runne penui je guî di lei.

⁹Chidadege Hei, Israelme gau, Tingwang gu sam ’ngking le lau:

¹⁰Tingwang Hera ne acheu ze rang lei, pie le lau, melireîme je I ka’nggi lei, penui ba gene a gu meli ramme I lu dai gu lei; meli ramme je penui ne guîbe I ne tew’nsau ’ndu lei, zai melireîme du penui runne penui je guî ta du de lei. Penui mui gene a gu meli ramme je I ne lupat ’ndu lei, chidezai penui ze penui hangge hetak chang ta du de lei.

¹¹“Chigum ze Tingwang Hera ne acheu ze rang lei, Pie le lau, a runne a gu meli ramme je I peu gu lei, zai I ne peupat ku lei.

¹²Melireîpeu ne pe gu meli ramme rariptattibe je peu gum ze, melidung ruagene lietattibe je I peupat ku lei; tingmâube mai benai kemuîbe kangge penui rariptattibe bâm leine gene penui je peupat ku lei.

¹³Zai ziemmena ruagene penui je I ne nguapat ku lei; heram ramme gene penui je I nguawang gu lei, penui ramdei ge penui je I ne nguawang gai gu lei, zai Israel gu kedeiloa kedibe ramme ge zai ’nggeuchuak ramme ge, ziemmena ramme lungbe bâm ramme ge penui deteu ra kai gu lei.

¹⁴Timpeizeu yibe ge penui deteu ra I pei gu lei, zai penui taning ze â Israelram gu kedeiloa hube bâm ge la lei. Tejeîbâm yibe ge penui jei gu lei, zai Israelram gu deiloa ramme betak yibe timpeizeu ge penui deteu gu lei.

¹⁵A gu melidung je I ne kereîpeu chang gu lei, zai penui je I ne jei ra pei gu lei, ze Tingwang Hera ne rang lei.

¹⁶Gadibe je I peu gu lei, tatlietattime je I ne nguawang dai gu lei, penui pî bettibe ramme ze I ne dum gu, peran-game je I ne penui ran tew’nchi gai gu lei; kane peleuyi zai peranchibe kau ramme je â I ne reîkua gu lei, zai penui je I ne guî gu, zai samram gu lei.

¹⁷“Chuna ningnui deu hangge, Hei a gu melidung gau, ze Tingwang Hera ne acheu ze rang lei, Pie le lau, a gu meli ramme ruage, zai meli’nsei ramme benai kemei’nsei ramme kakge I ne samram gu lei.

¹⁸Kaurui-taning keyibe ge ningnui je deteu ra kai bei ze, ningnui teutau dui rei mei? Betaning ge ningnui hang ka’nsakbe ningnui pî ne chai’nsia bam ra mei? Zai hedui ka’nchibe ningnui sak lu ze ka’nsakbe ningnui pî ne tewhebâ sing ra mei?

¹⁹Kane a gu meli ramme â ningnui pî ne chaîgetie bambe penui teu ra mei, zai ningnui pî ne hedui tewhebâ’ndibe penui sak ra mei?

²⁰“Chidadege Tingwang Hera ne penui je acheu ze rang lei, Pie le lau, I sing ne meli peleuyibe benai meli perâsiabe I ne pie gu lei.

²¹Ningnui pum ne, zai ningnui keîtoa ne ngeigetie, zai meli peran-gabe je ningnui kie ne ram ze ’ntâugetiebeibe ziegene ningnui ne penui je kumtua de lei,

²²a gu melidung je I ne tew’nring gai gu lei, penui je nîmteu ra pei ta du lei, meli ramme kakge I ne samram gu lei.

²³Penui peireige melireîpeu hangkat I kai gu lei, penui je pa ne guî gu lei, a guâ ka’ngguapeu Dabidbe jeu. Pa ne penui je guî gu, zai pa ne penui je kereîpeu chang gu lei.

²⁴Zai I Tingwang ne penui Rapeu chang gu lei, zai a guâ ka’ngguapeu Dabidbe ne penui ruage besuitewpeu chang gu lei; chize I Tingwang sing ne salia de lei.

²⁵“Zai penui dage desieyibe samhatkaibe I tew gai gu lei, zai heram gene hekaune kesiabe ramme je I ne tew’ngga ’ndu lei, zai hênamkang ge du penui bamzêune bam gu lei, zai hekaloa ge du penui jei dui lei.

²⁶Zai penui benai a gu kedeiloa ’mpei ramme pebâm leine peireige I ne ’nnam gai gu lei; zai beting-panehî ge tingruikeu ra I tew gai gu lei; ’nnamghaibe tingsim rui gai gu lei.

²⁷Zai pening ge hechingbang ramme pechî ’nchi gu lei, kedei gene mâ-hîmra ramme pung-ze-sa gu lei; zai penui gu heram lungge penui bamzêune ze bam gu lei, penui gu guangkâm ramme I ne tewbet ’ndu, zai penui je kebang hang tewgaime ba gene I ne lupat kai bei dezai, I ze Tingwang lei be penui chî gu lei.

²⁸Heramdeime gu hetak chang ta du de lei, zai heramloa gu hekaune kesiabe ramme ne penui je nîmteu ta du de lei; kane penui bamzêune ze bam gu de lei, zai penui mâ-hing ra mi-mige ne tew gai ra mak lei.

²⁹Hêrachibang pe ji sasuang ze bambe I ne teichu gai gu, dezai chipau heram ge herakûm ne tew’nriam ra mak lei, zai heramzatme ne ngau’nna ze bam ra mak lei.

³⁰Zai I ze Tingwang penui Rapeu penui dage I la lei be penui chî gu lei, zai penui Israel kiduîme du a gu ziemmena lei be penui chî gu lei, ze Tingwang Hera ne kacheu de lei.

³¹Zai ningnui â a gu melidung lei, a gu petaning gu melidung lei, zai I ze ningnui Rapeu lei, ze Tingwang Hera ne rang lei,” ze kacheu de lei.