Read Zeme Naga EZEKIEL 36 Bible Online

EZEKIEL 36 - Zeme Naga bible

EZEKIEL 36

¹“Nang ziemmena na gau, Israel deiloa ramme je sam ranglia lau, ningnui Israel deiloa ramme gau, Tingwang gu sam ’ngking le lau,

²Tingwang Hera ne acheu ze rang lei: Ning peireige ning teureime ne, ‘Aha!’ ‘’Ndâge peloa hube ge herâtewbe bâm ramme ze â anui gu chang de lei,’ ze penui ne kacheube ziegene,

³sam salia lau, Tingwang Hera ne acheu ze rang lei: Ningnui je penui ne gua’mpie lu ze, heramdei ’nsakpatbe ze penui hang chang de ra, pebâm’nsangne ge ningnui je naî ’nde lei; zai heladkiebe benai ketiakbe bambe ziegene ningnui je nguatat tu lei.

⁴Chipauziegene ningnui Israel deiloa ramme gau, Tingwang Hera gu sam ’ngking le lau, kedeiloa kedibe ramme, peloa ramme ’nggeuki ramme, kangrum ramme, zai sâuhammuî’ndibe bâm ramme, namdi gua’mpie’ndibe ramme, zai pehuâzie ge heramzatme ring ze ’nsakpatme ne ngau’nna ze kedunggetie ze nupteu ze bamme aime dage Tingwang Hera ne acheu ze rang lei;

⁵chidadege Tingwang Hera ne acheu ze rang lei: Heramzatme ’nsakkaidiakme benai Edom ne naîlatew ze penui lung leine ne hesuiyi’nta ze a gu heram lungmakbe ge penui runne ne kelâng lu ze nupgut ze heram sutme peireige a lumpumbe hemi tau gum ze I sam sa lei.

⁶Chidadege Israelme ram peireige sam pau’ntua gai lau, kedeiloa kedibe ramme, peloa ramme, ’nggeuki ramme, zai kangrum ramme je Tingwang Hera ne acheu ze rang lei: Pie le lau, heramzatme ne naîlatewbe ningnui hereulie ze bambe ziegene a lumpum-desang ze sam I sa lei.

⁷Chidadege Tingwang Hera ne acheu ze sa lei: Ningnui huâzie ge heramzatme helêukeu sing gu lei be I ne deseu gai de lei.

⁸“Kane ningnui ne, Hei, Israel Deiloa ramme gau, bekeî ramme tumpat ku lei, zai a gu ziemmena Israelme hangge ning chî ’nchipat ku lei; penui ki lam helat dai zi gu daseu.

⁹Pie le lau, I ningnui hang la lei, ningnui tailam I ’nsua bam gu lei, ningnui dage pu gu zai ningnui dage helei ’nruk kai gu lei;

¹⁰ningnui peireige ziemmena I tewpung gai gu lei, Israelbe kiduîme leine zai ’nteumena je du tewpung gai gu lei; namdi ramme ge penui bam gu lei, zai siadibe bâm ramme tewchu dai gu lei;

¹¹zai ningnui peireige ziemmena benai hekaune tewpung gai gu lei, zai penui pung-ze-sa gu lei, zai tingtie ningnui bambe luigum ze bam dai ra ningnui je pei gu lei, bepîbang ge ningnui bamraibe ting ge sua â ningnui yi ra I tew gai gu lei; dezai I ze Tingwang lei be ningnui chî gu lei.

¹²Eu lei, a gu ziemmena Israelme ne ning peireige tatrua ra I tew gai gu lei, zai penui ne heram ’nram ze bam gu, zai nang ze penui heurâ chang gu lei; zai chuna gene seu ze penui chaname heluîhing mak ze bam dai ra mak lei.

¹³Tingwang Hera ne acheu ze rang lei: ‘Nang ziemmena je teupeu, zai heramzatme name je du sut-tatkam’ndipeu’ ze ziemmena ne kacheube ziegene,

¹⁴ziemmena je nang teu ta lau, zai ning ramzatme name je tew’ngga ta lau, ze Tingwang Hera ne rang lei.

¹⁵Heramzatme ne ningchu naîlatewbe nang lie ze bam dai ra I ne lun ra mak lei, zai miramme ne ningchu saka’nsiabe du lie ze bam ra mak lei; zai ning ram zatme kau du kau dai ra mak lei,” ze Tingwang Hera ne rang lei.

¹⁶Tingwang gu sam a dage wang lei: acheu sa ze,

¹⁷“Ziemmena na gau, Israel kiduîme penui ram ge lungbe ting ge penui kebambe tak ze penui tatew gene penui ram ze tewhebâ lu ze bam de lei; a suage penui kebambe tak ze ’mpuimi penui nîsiabe ting ’nchimakbe gum ze chang lei.

¹⁸Chidadege heram ge penui ne kegîbe tâ tew, zai mâ-luîtewbe ne penui je tewhebâ’ndibe ziegene penui peireige a lumpum ruîkeu gai bei de lei.

¹⁹Heramzatme ruage penui je I ne langrarip kai bei de lei; zai heram leine ge penui je hûrarip kai bei de lei; penui kebambe tak benai penui tatew luigum ze penui peireige I ne samram gai bei de lei.

²⁰Penui tatkaibe bâm leine ge, heramzatme dage penui wanglung gai dege a ji ka’nchibe penui ne tewkahebâ de lei, ‘Aime bau ze Tingwang gu ziemmena lei, acheusedu pe ram gene penui â zuapat ti de lei,’ ze penui peireige kacheube ziegeneu.

²¹Acheusede Israel kiduîme ne heramzatme ruage a ji ka’nchibe tewhebâ gai ze, I ’nninghereu la lei.

²²“Chidaze Israel kiduîme je acheu salia be lau, Tingwang Hera ne acheu ze rang lei, Hei Israel kiduîme gau, I tâtewgairabe ze ningnui hang ziegene mak lei, kane ningnui tatkaibe heramzatme ruage ningnui ne a ji ka’nchibe tewhebâgaibeibe ziegene lei.

²³A ji ngeudibe, heramzatme ruage ningnui ne tewhebâ’ndibe ze I ne tew’nchi gai gu lei; chidezai penui je penui mikngau ge ningnui je I ne tew’nchi gai bei dezai I ze Tingwang lei be penui chi gu lei.

²⁴Heramzatme ruagene ningnui je I ne nguapat ku lei, heguangram leine gene ningnui je I ne teiwang’ndui gai gu lei, ningnui ramdei sing ge ningnui je I ne nguawang gai gu lei.

²⁵Zai ningnui peireige hedui ka’nchibe I ne kezin gai gu lei, dezai ningnui ’nchi du lei, ningnui mâ-luîtewbe gene zai ningnui kahebâbe leine gene ningnui je I ne tew’nchi gai gu lei.

²⁶Helung karchibe ningnui je I pei gu lei, zai ningnui dage kaningchingbe lungtak karchibe I kai gu lei; zai ningnui gu hemeipum gene tingchu lung I ne lutua ’ndu lei, zai hemeipum lung pei gai gu lei.

²⁷Zai ningnui lung ge a gu herui kai gu lei, zai a gu hingde rawgaibe ge ningnui tat ra, zai a gu samde tewgaibe ramme ningnui pheu ze lutei ra I ne ningnui je tew gai gu lei.

²⁸Zai ningnui paume je heram I peigaibe ge ningnui lung gu lei, zai ningnui a gu ziemmena chang gu, zai I ze ningnui Rapeu chang gu lei.

²⁹Ningnui kahebâbe leine gene I ne ningnui je ’nripat kai gu lei, zai mâ-helei kaikeu ra ningnui je I pei gu lei, zai pung-ze-sa ra I pei gu lei, zai ningnui peireige herakûm wang ra mak lei.

³⁰Ningnui gu herachi bang ramme, zai ningnui gu mâ-hîmra ramme pung-ze-sa gu lei, zai heramzatme ruage ningnui je herakûm ne tewhelêu ze bam ra mak lei.

³¹Chidezai ningnui hemui’mpui ge tattibe, zai ningnui kebambe tak yimakbe ramme ningnui ’nningdau dai gu lei; ningnui tâ-kesiabe tewbe ramme, zai ngaukatenetbe tâ ramme tewbe ziegene ningnui runne ne ningnui je tenet ku lei.

³²Ningnui hang ziegene aize I tewrabe mak lei, ze Tingwang Hera ne rang lei, chize ningnui chî le lau, ningnui telungtak je ningnui ’ngngam ze, ningnui lunggailak ze bam lau, Hei, Israelbe chaname gau.

³³“Tingwang Hera ne acheu ze rang lei, ningnui ne tâ-kesiabe tewbe leine gene ningnui je I ne tew’nchigaibe mai dezai namdi ramme ge ningnui lungwang dai ra, zai pebâm sâuhammuî’ndibe tewchu dai ra tew gai gu lei.

³⁴Chige tatka’ngguakme mikngau ge tingtie’ngkage sâuhammuî’ndibe bâm chang leusedu penui ne chipau heram ge tâtew-teu dai gu lei.

³⁵Zai ‘Aipau ramdei ze sâuhammuî ze bambe ze Eden merie gum chang dai de lei; zai namdi ramme sia kam di, zai sâuhammuî’ndibe ge lungwang dai ze kerie tewzun ze la de lei,’ ze penui acheu gu lei.

³⁶Chidezai ningnui huâzie ge heramzatme lungguâme ’nsakpatme mikngau ge, Tingwang ne kedei bâm sâuhammuî’ndibe ge tewchu gai dai, zai hechibang ramme tau gai lei be penui chî gu lei; I, Tingwang ne sa gai ’ndi de lei, zai chize I tew sing gu lei.

³⁷“Tingwang Hera ne acheu ze rang lei: Aize du Israel kiduîme ne penui hang I tew gai ra a dage kie ra I ne pei gu lei; penui gu ziemmena je kauruidung gum ze hingkeu ze bam ra hangge zeu.

³⁸Jerusalem ge herâtew ra ngidi mai kauruidung misongga ze bam gum ze, siadibe namdi ramme ge baudime misongga ze puigit bam gu lei, chidezai I ze Tingwang lei be penui chî gu lei,” ze kacheu de lei.