Read Zeme Naga EZEKIEL 37 Bible Online

EZEKIEL 37 - Zeme Naga bible

EZEKIEL 37

¹Tingwang ba a peireige wangkeu gai de lei, Tingwang gu Herui ne achu ngua lu ze, bekâm sûngngangkelî ge teikeu gai bei de lei; chige kechaime ra ramme puigit bam lei.

²Dadege kechaime ra ramme ruage pa ne achu ngua lu ze, tat-hiârua de lei, zai pie le lau, chi bekâm poine ge kechaime ra ramme ne misongga tuâtiam bam lei; zai pie le lau, kechaime ra-rie ramme periehê bam di de lei.

³Pa ne achu, “Ziemmena na gau, aipau ra ramme ringdaichi duî mei?” ze kacheu de lei, Dadege I ne pechu kak ze, “Hei Tingwang Hera gau, nang ne chî lei,” ze acheu bei de lei.

⁴Dadege pa ne achu, “Aige kechaime ra ramme dage sam pau gai lau, zai penui je salia lau, Hei kechaime ra ramme gau, Tingwang gu sam ’ngking le lau.

⁵Tingwang Hera ne ai kechaime ra ramme dage acheu ze rang lei: Pie le lau keringbe chuilu ningnui dage gut ra I tew gai gu lei, zai ningnui ring dai gu lei.

⁶Zai ningnui dage ningnui ’nnaria I kai gu, zai ningnui peireige hemeichie ramme buachûm ra I ne tew gai gu, zai ningnui gei ne chûm kam gu lei; zai ningnui dage keringbe chuilu I kai gu, dezai ningnui ringchu gu lei, chidezai I ze Tingwang lei be ningnui chî gu lei,” ze kacheu de lei.

⁷Chidadege achu samde peigaibe luigum ze I ne sam pauliâ gai de lei. Zai I ne sam pau gai bei dege, chige hekuâ bam di de lei, zai pie le lau, ’ngngaikeriang-riang ze bam di de lei; zai kechaime ra ramme wanghelua lu, kechaime ra ramme pe ra-ra ge ’ntuk ti de lei.

⁸Zai I pie gai dege penui ’nnaria ramme bam di, zai penui pumchie ramme penui pum ge chûm di de lei, kane penui dage penui chuilu ga lei.

⁹Dadege pa ne achu, “Keringbe chuilu dage sam pau gai lau, ziemmena na gau, keringbe chuilu dage sa gai lau, Tingwang Hera ne acheu ze rang lei: Hei keringbe chuilu gau, tingkai medai gene wang ze tewchat’ndime peireige keringbe chuilu ’mmut kai lau, penui ringdaichi le ra hangge zeu,” ze kacheu lei.

¹⁰Chigum ze achu samdiegaibe luigum ze I ne sam pau gai de lei, zai keringbe chuilu ze penui dage gut ti de lei, dadege penui ringchu di de lei, zai penui pî ne sapdam bam di de lei; baudi penui bam di de lei.

¹¹Chidadege pa ne achu, “Ziemmena na gau, ai kechaime ra ramme ze Israelbe kiduîme kam de lei, pie le lau, penui ne sa ze, ‘Anui ra ramme â changku di de lei, anui kaheguîbe mâ de ga di de lei, anui je â dângtua’nchichiak ’ndi de lei,’ ze kacheu de lei.

¹²Chidadege penui dage sam pauliâ lau, zai acheu ze ranglia lau, Tingwang Hera ne acheu ze rang lei: Pie le lau, ningnui gu heraw ramme I ne lat kai ze ningnui gu heram ramme gene I ne ningnui je kuakchu gai gu lei, Hei a gu ziemmena gau, Israelme ramdei ge I ne ningnui je nguagut kai gu lei.

¹³Zai ningnui gu heraw ramme I ne latpat kai ze ningnui gu heraw ramme gene ningnui je I ne kuakchu gai bei dezai, Hei, a gu ziemmename gau, I ze Tingwang lei be ningnui chî gu lei.

¹⁴A gu Herui ningnui lung ge I kai gu lei, dezai ningnui ring gu lei, zai ningnui ramdei sing ge ningnui je I ne kai gu lei, chidezai I Tingwang ne salube, I ne chize tew gai de lei be ningnui chî gu lei,” ze Tingwang ne rang lei.

¹⁵Tingwang gu sam a dage wang de lei, acheu sa ze,

¹⁶“Nang ziemmena na gau, hetui kat nang lu le lau, pe peireige ‘Juda hang, zai Israel chaname pechu ka’ngngâme bau hang,’ ze raw gai lau; zai hetui kêdabe lu lu ze pe peireige, ‘Josepbe (Ephraim gu hetui), zai Israel kiduîme leine pechu ka’ngngame hang, zai pebaume hang,’ ze raw gai lau;

¹⁷zai chi hetui kat chang ra, hetui kena ’ntuk kai lau, dezai chi kena ze ning ba ge hetui kat chang ra hangge zeu.

¹⁸Zai ning gu ziemmena ramme ne ningchu ’mpau ze, ‘Airamme ne ’ndaikau rimba lau, anui je nang teilia mak ra mei?’ ze penui ne acheu dezai,

¹⁹penui je, Tingwang Hera ne acheu ze rang lei, pie le lau, Josepbe gu hetui, Ephraim benai pebaume Israelbe kiduîme ba ge bambe I ne lu gu lei, chize Judabe gu hetui ge I ne ’ntuk kai gu lei, chiramme ze hetui kat hang I tew gai gu lei, dezai a ba ge penui kat chang gu lei.

²⁰Hetui kena ge nang ne rawgaibe ze penui mikngau sing ge ning ba ge bam ra lei.

²¹Dezaine penui je, Tingwang Hera ne acheu ze rang lei, pelingsing ze Israelbe chaname heramzatme ruage penui tatkaidibe bâm gene I ne penui je nguapat ku lei, pemik ’nsangne gene penui je I ne teiwang’ndui gu lei; zai penui ramdei ge I ne penui je nguawang gai gu lei.

²²Zai chipau heram ge Israelram gu peloa kehube ramme ge heramzat kat chang ra I tew gai gu lei, heguang kat ne penui ’nteumena gu heguang chang gu lei, heramzat kena bam dai ra mak lei. Zai heguangram kena chang ra mâtew-tewsedu ’nzipâng dai ra mak lei.

²³Zai penui gu mâ-luîtewbe ramme, ngaukatenetbe tâ tewbe ramme, zai hede ka’ngkabe ramme ne penui je tewhebâ ze bam dai ra mak lei; kane penui lungbe bâm ramme gene penui je I ne ’nripat kai gu lei, zai chige penui hechai’ngngîn ze hemuitewbe gene I ne penui je ’nripat kai gu lei. Chidezai penui ze a gu ziemmename chang gu, zai I ze penui Rapeu chang gu lei.

²⁴“A guâ ka’ngguapeu Dabidbe ne penui peireige heguang chang gu lei, zai penui ’nteumena peireige melireîpeu kat bam gu lei, zai a gu samrambe kangge penui suiyi ze bam gu lei; zai a gu hingde rawgaibe ramme penui lutei gu, zai penui tew gu lei.

²⁵A guâ ka’ngguapeu Jakobbe dage heram I peibe, ningnui paume lung ze bambe ge penui lung ze bam gu lei, chige betingbeta penui benai penui name, zai penui chaname lung ze bam gu lei, zai a guâ ka’ngguapeu Dabidbe ne betingbeta penui gu heguang chang ze bam gu lei.

²⁶Chipau peireige du penui dage desieyibe gu samde I tew gai gu lei; zai penui dage betingbeta hangge samdiegaibe chang gu lei, penui je I ne ’nnam gai gu, zai penui pung-ze-sa ze bam gu lei, penui ruage ka’nchibe betingbeta hang I teichu gai gu lei.

²⁷Zai I bambeki du penui dage bam gu lei, zai I ze penui Rapeu chang gu, zai penui a gu ziemmena chang gu lei.

²⁸Zai penui ruage betingbeta hangge a gu ka’nchibeki tew gai dezai, I ze Tingwang Iasraelme je tewka’nchipeu lei be heramzatme ne chî gu lei,” ze kacheu de lei.