Read Zeme Naga EZEKIEL 38 Bible Online

EZEKIEL 38 - Zeme Naga bible

EZEKIEL 38

¹Zai Tingwang gu sam a dage wangchang de lei, acheu sa ze,

²“Nang ziemmena na gau, Magog ram gu Meshek benai Tubal ruage besuitewpeu dilangpeu Gog ’mbia ning ju ’nsua lu ze pe peireige sam pau’ntua gai be lau.

³Tingwang Hera ne acheu ze rang lei: Pie le lau, Hei Meshek benai Tubal gu besuitewpeu dilangpeu Gog gau, ningchu I ka’nggi lei.

⁴Ningchu I ne zu’nreiwang dai gu lei, ning mui ge kakuai ne guak lu ze ningchu gaupat ku lei; nang benai ning gu hereikangme leine, hekun ramme, hekunchingchuame, hereipuâ kaika’nsangme, hereikang baudime, hegeîluîkie ramme, zai hinggei ramme, zai hiazutkie ramme tei’nsangsiak lu zeu;

⁵zai penui dage Persia, Kus, Put, bam lei; zai penui ’nteumena dage hinggei benai hinggei peichûp bam lei.

⁶Gomer benai pe gu hereikang baudime leine, Beth-togarma tingpeî mik deulangbe ge bamme gu hereikang baudime leine zai pe dage ziemmena misonggame du bam lei.

⁷“’Ntîng le lau, zai teleukua le lau, nang benai ning dage pebau wangka’nduime gau, penui je pie’ntingkua ze bam lau.

⁸Naimikpui misonggabe châng dezai ningchu kûwang gu lei, tingkum pelane tattibe châng dezai herei gene penui je ’nripat lu, heramzatme misonggame ruagene penui je nguapat lu, penui wangka’nduibe ram Israel gu kedeiloa ramme, ’ndâge sâuhammuî’ndibe heram ge penui ’nggiwang dai gu lei; chige lungme â heramzatme gechâm-châmbe gene wang ze penui ’nteumena kehingbe ga ze, bamzêune ze lung la lei.

⁹Herâtingkai wang gum ze nang guâwang gu lei; nang benai ning dage hereikang baume leine, zai ziemmena baudime ne kemâu gum ze heram ze chûmgit ze bam gu lei.

¹⁰“Tingwang Hera ne acheu ze rang lei: chipau mai dezai aigum gu lei; ning lung ge mâ-ka’nningbe wang gu lei, tâ-kesiabe tew ra nang ’nningpat ku lei;

¹¹chidezai ‘Keriegabe keloa ramme ze I ne gua gu lei, zai lungzeunetew ze bamme penui ’nteumena kerie ga, kerie’ngkam benai ’ngkamchâp hegeî ne tew mak ze bambe keloa ramme ze I gua gu lei,’ ze nang acheu gu lei.

¹²Nupteu ra, hereichâ ramme lu ra, zai heram gua’mpielube chângge lungwangkadaime zai heramzatme ruagene teiwang ’nduigaibe ziemmena peireige, zai kauruidung benai merua ramme kedeirei zuilung ge penui heurâ misongga bambe peireige ning bahuâ kai ra nang ’nning gu lei.

¹³Sheba, Dedan, Tarshis gu helîkahedetme, zai penui gu keloa ramme ningchu, ‘Nang hereichâ sut ra wang mei? Ning gu hereikangme bau je ngua lu anui heurâ rui ra, gepût, zai gechâk rui ra, zai kauruidung benai anui heurâ ramme, merua ramme misongga ze nupteu ra wang mei?’ ze acheu gu lei.

¹⁴“Chidadege ziemmena na gau, sam pau’ntua gai lau, zai Gog je, Tingwang Hera ne acheu ze rang lei: Chipau mai dezai a gu ziemmena Israelme zeûne ze yi ze lung dezai nang ning lung ’ngngai gu lei.

¹⁵Chidezai nang bambe bâm tingpeî deulangbe gene nang wang gu lei, nang benai ning dage bamme ziemmena misonggame, penui ’nteumena hekun chingchua lu ze, hereikang baudime peranchime zai pebau gekieme wang gu lei.

¹⁶Kemua ne heramloa hiamchûmgit bam gum ze a gu ziemmena Israelme peireige nang nupwang gu lei. Zai bechâng dezai aigum gu lei, a gu heram ze ’nggi ra I ne ningchu nguawang gai gu lei, dezai heramzatme ne achu chî gu lei, Hei, Gog penui mikngau ge nang gene I ka’nchibe teilia bei dezai heramzatme ne achu chî gu lei.

¹⁷“Zai Tingwang Hera ne acheu ze rang lei, ’Ndâge a guâ ka’ngguame Israel gu kemeume ne tingkum misonggabe sua ’mbe sam pauka’ntuame ne penui je ’nggi ra lang gai gu lei, ze saliabe ze rang de mei? acheu zeu.

¹⁸“Zai chipau ting ge aigum gu lei, Israelram je ’nggi ra Gog wang dezai a lumpum teilia gu lei, ze Tingwang Hera ne kacheu de lei.

¹⁹I ’nningtenang ze a lumpum-kadesangbe lua I ne rangba gai ze, chipau mai ge Israelram dei ge keteika’nchibe bam sing gu lei,

²⁰sungkling ge hekâ ramme, liamruabe ’nruine ramme, zai hênam ge hekaune ramme, zai kedei ge liaruabe zat leine zai kedei ge ziemmena bamme leine a suage penui kedun gu lei, peloa kedibe tewkau gu, zai hekâu ramme meikeu gu, zai kerie ramme kâukeu kam gu lei.

²¹A gu kedeiloa ramme gene Gog je ’nggi ra kehingbe zat leine I kûwang gai gu, penui ’nteumena hiazutkie ne pe sikina karai ’nggi gu lei.

²²Zai hejai tewpatbe benai herarît ne pechu I ’nggi gu lei; pa benai pe gu hereikangme, zai pe dage ziemmena misongga bamme peireige tingsim kedibe benai desak ruikeu gu, zai hemi benai hemiheu du ruikeu gu lei.

²³Chigum ze a ngeudibe benai I ka’nchibe ze I teilia gu lei, zai a runne achu heramzatme misonggame mikngau gene chî ra tew gai gu lei. Chidezai I ze Tingwang lei be penui chî gu lei.