Read Zeme Naga EZEKIEL 39 Bible Online

EZEKIEL 39 - Zeme Naga bible

EZEKIEL 39

¹“Zai nang ziemmena na gau, Gog je sam acheu ze pauliâ lau, Tingwang Hera ne acheu ze rang lei! Pie le lau, Meshek benai Tubal peireige besuitewpeu dilangpeu nang Gog je I ka’nggi lei;

²ningchu I ne tei’nreiwang dai gu lei, zai tingpeî deulangbe gene ningchu I ne nguawang gu lei, zai Israelme gu peloa dibe ramme peireige ningchu teiwang gai gu lei;

³dezai ning ba heku’mbia ba ge bai’mpicha ze getautua ’ndu, zai ning ba hezat’mbia ba gene bai’mpitu ramme I ne tewkeu ’ndu lei,

⁴zai Israelme gu peloa dibe ramme ge nang kau gai gu lei, nang benai ning gu hereikangme bau leine, zai ning dage baudime bamme bau du chai kam gu lei; zai ’nruine ramme hemeiteube zat leine ne, zai hênamkang ge hekaune kesiabe zat ramme ne ning pumji peize teu kam ne ra pei gai gu lei.

⁵Zai ’nduloa ge nang chai ze kâukeu gu lei, I Tingwang Hera ne rang daseu.

⁶Zai Magog benai pe ramdei sungkling kung ge desieyi ze lungzêune ze bamme dage hemi I lang gai gu lei; dezai I ze Tingwang lei be penui chî gu lei.

⁷“Zai a gu ziemmena Israelme ruage a ji ka’nchibe teilia gai gu lei, zai a ji ka’nchibe tewhebâ ze bam dai ra I pei ra mak lei; chidezai heramzatme ne I ze Tingwang lei, Israelme gu ka’nchipeu lei be penui chî gu lei.

⁸Pie le lau, chize wang mui da, zai chize wangchang gu lei, Tingwang Hera ne rangliabe sam lei, chize I ne sagai’ndibe naimikpui de lei.

⁹“Chidezai Israelme gu namdi ramme ge lungme zuapat ku lei, zai penui gu hereimerua ramme sâudiakkaibe ramme hemi hetak hangge hinggei kedibe ramme, zai hinggei kecheibe ramme, zai bai’mpicha ramme benai bai’mpitu ramme, zai hengeu ramme benai depuî-ngeu ramme teiwang ’nduigaibe tingkum sena penui rû gu lei.

¹⁰Chidezai hênam gene penui hechingria dai ra mak, ’nrêu ge hingbang penui kuî dai ra mak, kane hereimerua ramme ne heching gum ze penui dik ku daseu. Hereichâlume gu hereichâ penui ne lu gu, zai nupteume gu penui ne nupteu gu lei, ze Tingwang Hera ne kacheu de lei.

¹¹“Zai chipau mai dezai aigum ze wangchang gu lei, Israelme ram ge Gog je baigairabe bâm hang I pei gu lei, sungkling gene tingbia ’mbia Abarim ge zeu; zai tebeîtewme je chigene tewnam gu de lei, Gog benai pe gu hereikang baudime je chige bai gai gu daseu. Chidadege chipau bâm ze Hamon-gog Kâm ze penui ne kû gu lei.

¹²Zai Israel kibaume ne penui ram tew’nchi ra kechaipum ramme ze kêu sena penui ne bai gu lei.

¹³Heramdeiname leine ne chime gu kechaipum ramme ze bai gu lei; zai I keduîbe mai ge penui ngêutew’ndi gai gu lei, ze Tingwang Hera ne rang lei.

¹⁴Heram tew’nchirabe hangge heram ge kechaipum baikammakbe ramme bai ze heram ge tatrua bam ra penui ne ziemmena kelâng gai gu lei. Kêu sena kam gai dezai penui peuchu gu de lei.

¹⁵Zai aime bau ze heram ge tatruapat dezai mi-mige du ziemmena ra ngaudau dezai chize Hamon-gog kâm ge kechaibaime ne bai gai mak tâne hangge chipau taige ’nchetrabe sum gai ra lei.

¹⁶(Hamona namdi ze du chige la lei.) Chigum penui ne heram tew’nchi ra lei.

¹⁷“Zai nang ziemmena na gau, Tingwang Hera ne acheu ze rang lei, ’nruine zat leine benai hekaune zat leine je salia lau, ‘Ningnui ’nteumena wang lau; Israel gu kedeiloa peireige kedibe herâtewbe-ngi ningnui hangge kedâgaibe ge ningnui hemei teu gu, zai hejai sak ku lei.

¹⁸Ziemmena pengêudime pumji ningnui teu gu, zai kedeirei ge heguangsinme, meli’nsei ramme, melipoine ramme, zai kemei ramme, getumsei ramme, Bashanram gu kaurui peleuyibe ramme leine jai ze sak ku lei.

¹⁹Ningnui hangge I ne herâtewbe-ngi tewgaibe ge ningnui ’nggeu mak tâne hemeichâ teu gu lei, zai ningnui meneu mak tâne pe jai sak ku lei.

²⁰Chidezai hekun ramme benai pe chingchuame zai ziemmena peranchime, zai kahereime leine gu luube-bâm ge ningnui teu’nggeugit gu lei,’ ze Tingwang Hera ne kacheu de lei.

²¹“Heramzatme ruage a ngeudibe I ne pei dai gu lei; zai heramzatme leine peireige I samramgaibe zai penui peireige a bahuâkaibe penui ngau gu lei.

²²Chipau mai gene seu ze Israelbe kiduîme ne I ze Tingwang penui Rapeu lei be penui chî gu lei.

²³Zai heramzatme ne Israelbe kiduîme â tâ-kesiabe tewbe ziegene penui kebang chang de lei be penui chî gu lei; zai penui ne achu ’nnumtewmakbe ziegene penui dagene a ju tei’mbai ’ndi de lei, chidadege penui teureime ba ge I ne penui je pei gai bei de lei, zai hiazutkie ne penui je bichat ’ndi de lei.

²⁴Penui ’nchimakbe luigum ze, zai penui tâ-kesiabe tewbe luigum ze penui peireige I tew gai de lei, zai penui dagene I ne a ju tei’mbai ’ndi de lei.

²⁵“Chidadege Tingwang Hera ne acheu ze rang lei, chuna â Jakobbe chaname peireige betingyibe teiwang gai dai gu, zai Israelbe kiduîme leine peireige I ngauka’nggiabe bam gu lei, zai a ji ka’nchibe hangge I ne hekêt-kai ze bam gu lei.

²⁶Penui hing ra mî de penui peireige tew gai ra ga ze penui ram ge lungzêune ze penui bambe luage, penui ka’ngngambe leine, zai a peireige kesiatewgaibe leine penui ’ngngaî ’ndu lei.

²⁷Penui teureime ram dei gene heram ramme leine gene I ne penui je nguapat lu ze penui je gekumwang’ndui gai dezai heramzatme misonggame mikngau ge I ka’nchibe penui ge ngau dezai neu.

²⁸Chidezai heramzatme ruage penui kebang chang ze bam ra I ne tewgaibeibe ziegene, zai penui kebang changbe ge katte sâudiak kai mak ze penui ramdei ge penui je I ne nguawang gai daibeibe ziegene I ze Tingwang penui Rapeu lei be penui chî gu lei.

²⁹Dezai penui dagene a ju tei’mbai dai ra mak lei; Israelbe kiduîme peireige a gu Herui I ruikeu gai dezai neu,” ze Tingwang Hera ne kacheu de lei.