Read Zeme Naga EZEKIEL 4 Bible Online

EZEKIEL 4 - Zeme Naga bible

EZEKIEL 4

¹“Zai nang ziemmena na gau, hegamkâng lu lu ze ning suage ’ngking gai lau, zai chige Jerusalem namdi luî ’nrit kai lau;

²zai Jerusalem guabe luî tew gai lau, kerie hekut suguâbe lui, zai kedeiloa ’ntûm luî tew gai, zai hereikangme gu tejeîki bâm guâbe lui ramme tew gai lau, zai kerie getau’nsiarabe dâng luî tew gai lau.

³Zai hegeîpak nang lu le lau, nang benai namdi kakge hegeî-’mbie hangge sum gai lau; namdi ’mbia ning ju ’nsua ra lei, ’nggi ra tuaguabe luî tak hang tew gai lau, chize ka’nggibe hangge nang ne tew gai lau, aize Israelbe kiduîme hangge dak teiliaka’ntuabe chang gu lei.

⁴“Nang â heku’mbia ’mbeî lu ze jei lau; zai Israelbe kiduîme tâ-kesiabe tewbe ning peireige I ne tuâ gai gu lei; penui gu hemui ziegene hezie haî chum ze riaksekui nang hereulie ze jei ra lei.

⁵Kum kat penui hereulierabe kelei ge naimikpui kat nang ne hereulie ra lei.

⁶Chipau châng dezai nang hezat’mbia ’mbeî lu jei dai lau, Juda kiduîme tâ-kesiabe tewbe hangge hezie hedai nang ne hereulie gai dai ra lei, kum kat penui hereulierabe ge naimikpui kat nang ne hereulie gai ra ning peireige I ne tua gai lei.

⁷Chidadege Jerusalem tuaguabe lam’mbe ning ju ’nrik lu, ning ba kezap ze pe peireige mâ-mâ wangchangbe ranglia’ntua gai lau.

⁸Pie le lau, heria ne ningchu pi gu lei, chidezai nang kerie tuaguabe naimikpui nang tew’nsang gai mak tâne ’ngngaikedetchi lak ra hangge zeu.

⁹Dekuîmeu, barli, teipichêu ramme, kunra, hetui zai tuipin ramme lu le lau, heli kat ge kai lu ze tingku teleu lau. Heku ’mbia nang ’mbeî lu nang jei tâne hezie haî chum ze riaksekui riâ chize ne nang teu ze bam ra lei.

¹⁰Nang mâ-teurabe leine periâ ’ndeu kam ra lei, mai kat ge tingku shekel ’ngkai nang teu ra lei, mai kat ge lua kat nang teu ra lei.

¹¹Zai hedui du ’ndeu lu ze nang sak ra lei, hin kat ge tam seruk ’nzi lu ze tam kat sak ra lei, mai kat ge lua kat nang sak ra lei.

¹²Ziemmena mikngau gene ziemmena bâ ne barli tingku gum ze geta lu ze nang teu ra lei,” kacheu de lei.

¹³Zai Tingwang ne, “Aize Israel chaname luilung tak teilia lei, penui je I ne hesangram ’mbe guatuabe bâm ge heramzatme ruage hetak tewhebâ’ndibe penui teu gu lei,” kacheu de lei.

¹⁴Chidadege “Hei, Tingwang, HERA gau, pie le lau, mâdau du a runne achu tewhebâ gai me lei, I henadau gene chu ze chuna riâ chang ze hekaune pe runne chaibe mei, hekaune mâ ne ’ngkîchatbe meiji mei ze I teu gai me rei lei, mi katenetbe hemei mâdau de a mui ge kai merei lei,” ze kacheu de lei.

¹⁵Chidadege pa ne achu, “Acheuzaine ni, ziemmena bâ kelei ge getum bâ ningchu I pei gu lei, aize ne nang tingku langteu lau,” ze kacheu de lei.

¹⁶Chipau peireige pa ne achu, “Ziemmena na gau, pie le lau, Jerusalem ge hetak teiwangbe I ne tew’nsia ’ndu lei: penui gu hetak leine ’ndeu kam lu ze, mâ-timchâk ze penui hereu ze mâ-teu gu lei, zai hedui du ’ndeu ze penui duângga ze sak ku lei.

¹⁷Hedui benai hetak ramme riâ du penui gu hemui ramme ziegene penui hangge riâ-desang de ra I ne tew gai gu lei.