Read Zeme Naga EZEKIEL 41 Bible Online

EZEKIEL 41 - Zeme Naga bible

EZEKIEL 41

¹Chidadege heraki sûngngang kisîam ’mbe pa ne achu nguagut kai de lei, zai kemuiki kung ramme ka’ndeu de lei; katlam ’mbia kemuikung ramme pedit sâu seruk lei,

²zai kemuiki dit â sâu kereu lei; zai kemuikung biebe â peseu, kena lam ’mbia ge sâu mengeu-ngeu lei; zai pa ne sûngngangkelî ge bambe sîam petâ ze ka’ndeu de lei, sâu hedai lei, zai pedit sâu ’ngkai lei.

³Chidadege helungbe kisîam ’mbe pa gut lu, kemuiki kung ramme ka’ndeu de lei, sâu na lei; zai kemuiki dit â sâu seruk lei; zai kemuikung biegaibe â sâu sena lei.

⁴Zai pa ne hekisiâm petâ ka’ndeu de lei, kemuikung lungge sâu ’ngkai lei, zai pedit sâu ’ngkai lei. Zai pa ne achu, Aize ’nchilangbe bâm de lei, kacheu de lei.

⁵Chidadege pa ne heraki gu ’mbie ka’ndeu de lei, peseu sâu seruk, zai pebia ge bambe kisîam ramme sâu medai gu ne heraki guâling lei.

⁶Zai pekunghia ge bambe kisîam ramme â set chum, kat-kat peireige bam lei, set kat ge hekisiâm himreu-reu lei. Kakellumbeki ’mbie ne tei’nsapkaibe chang mak ra hangge, pebia ge bambe kisîam ramme je tei’nsaprabe hangge beset ramme heki gu ’mbie tewguâling gai lei.

⁷Heki ze tewguabe pebia ge bambe hekisiâm ramme ze heki set hangbi dibi-bi ze tei’nsapkaibe set ramme je teida ze hang lei; heraki gu pebia ge desua tewchu gai de lei, zai chigum ze ’ngkanglangbe set gene ’nreilangbe set ’mbe hangrabe hangge hekakbe set tat kai ze hang de lei.

⁸Kakellumbeki ge pekaira râchugaibe guâling bambe du I ngau de lei; pebia ge bambe kisîam ramme gu dîmchube pung ’ndeugaibe ze â hekupum sâu seruk kau tâ kat lei.

⁹Pebia ge bambe kisîam ramme gu helabe ’mbie â peseu sâu mengeu; zai pekaira râgaibe latlagaibe bâm ze â sâu mengeu lei, heki ge pekaira bambe benai,

¹⁰heki lungge hekisiâm ramme bambe kak ze heki pemik ’nsangne ge pedit sâu ’ngkai lei.

¹¹Zai pebia ge bambe kisîam ramme gu ’ngkam ramme latla bambe ze â, kemuiki kat tingpeî ’mbia, zai kêdabe kemuiki tingpî ’mbia bam de lei; zai latla ze ’nsakkaibe bâm gu pedit ze sâu mengeu ne guâling lei.

¹²Heki gene tingrun ’mbia pebâm ka’nruabe deulangbe ’nrai ge heki kat bambe â pedit sâu riaksena lei; zai heki gu ’mbie â peseu sâu mengeu-ngeu ne guâ lei, zai petâ â sâu riaksekui lei.

¹³Chidadege pa ne kakellumbeki ka’ndeu de lei, petâ sâu haî kat, zai merie lung benai heki zai ’mbie ramme â petâ sâu haî kat lei;

¹⁴tingbia ’mbia heki kemui benai teririe lung gu pedit du sâu haî kat te lei.

¹⁵Tingbia ’mbia ge bambe bielangchâmpatkaibeki ’mbia puaka’nsuabe heki gu petâ benai chi ’mbie taube kena gu petâ ze pa ka’ndeu de lei, chige petâ ze sâu haî kat lei.

¹⁶Kellumki ge sûngngangkelî benai helungbe kisîam zai helabe namsûng ramme ze teleu’nniksik kai de lei, zai chi kechum gu pelane ge hekisiâm tewreu gai ze leubaki ramme kai de lei. Kiziêsua ge kellumki ze hechingpak ramme ne kedei gene chu ze leubaki ramme riâ kûmguâtenaitai gai lei (leubaki ramme kûmnamting gai lei)

¹⁷’ngkam peireige bambe helungbe kisîam ge du, zai hela ge du chize acheu tew gai de lei; zai helungbe kisîam ge ’mbie kûmguabe leine benai heki gu sûngngangkelî ge,

¹⁸kerub benai mêupi bang bambe ze, kerub kena kakge mêupi bang luî tak run ze ’nrit kai lei. Kerub luî hang tewbe leine ge pe ju kena-na tew gai ze,

¹⁹katlam ’mbia ze mêupi bang ’mbia ziemmena ju tei’nrik kai, zai kêda ’mbia ge mêupi bang ’mbia duilui poine luî tei’nrik kai lei. Chiramme ze kellumki pelane ge ’nritguâtuipik kai lei;

²⁰kedei gene chu ze kerub benai mêupi bang ’ngkam peirei riâ ’mbie ge ’nrit kam gai lei.

²¹Kellumki ge kemuiki chia ramme â mik medai ’nsamrap lei, ka’nchibe bâm suage heching ne tewbe herâtewbe-kaira gumbe ka’nzuâbe la lei,

²²pehut â sâu chum lei, zai petâ â sâu na, zai pe dit â sâu na lei, zai pemik ramme, besîng zai pebia ramme heching ne tew lei. Zai pa ne achu, “Aize Tingwang suage bambe mâ-kaira de lei,” kacheu de lei.

²³Helunglangbe kisîam benai ka’nchibe kisîam ge ’ngkam kena-na la lei; ’ngkam kat ge ’ngkampak kena-na la lei.

²⁴Zai kemui ’ngkam kat ge ’ngkam kakedipbe kena-na lei; zai ’ngkam kat ge ’ngkampak kena-na la lei.

²⁵Sûngngang-kisiâm gu ’ngkam ge kerub luî benai mêupi bang luî ’nrit kai gum ze helabe ’mbie ’ngkam ramme ge du ’nrit kai la lei, zai namsûng suage hechingpak ne kegup tewpat kai la lei.

²⁶Zai namsûng gu ’mbie ge leubaki ’ngkam latmakbe leubaki ’ngkam ge mêupi bang luî la lei.