Read Zeme Naga EZEKIEL 42 Bible Online

EZEKIEL 42 - Zeme Naga bible

EZEKIEL 42

¹Dadege tingpeî ’mbia helabe kisîam ’mbe pa ne achu nguapat te lei, zai kellumki rielung gene katlam ’mbia hekisiâm ’mbe pa ne nguagut kai bei de lei.

²Zai tingpeî ’mbia hekisiâm petâ sâu haî kat, zai pedit ze sau rengeu,

³kehube sîam lung ze sâu ’ngkai, zai helabe sîam gu ’mpuîki hang tewgaibe katlam ’mbia ’nreibe kisîam hang tewbe heki set sîam chum tew gai la lei.

⁴Hekisiâm ramme kakge sâu kereu, zai petâ sâu haî kat lei; zai penui ’ngkam ramme â tingpeî ’mbia puaka’nrik lei.

⁵Zai heki hulangbe kisîam ramme â chei bi lei, sûngngang benai ’ngkangbe kisîam ramme gene pelane ’ndeu’ndibidibe ziene bekak cheibi di lei.

⁶Chipau ki ramme â ’nreibe kisîam zene heki set chum chang di dadege helungbe kisîam gu gechia gum chang mak lei, chipauziegene ’nreilangbe kisîam ramme ’ngkangbe kisîam benai sûngngang kisîam sua â gechia ze kaika’ndeu de lei.

⁷Zai hekisiâm helabe gu ’mbie tedirielung kat-kat je teidabe hekisiâm ramme petâ ge sâu rengeu lei.

⁸Tedirielung gene helabe kisîam â sâu rengeu lei, zai hekisiâm ze kellumki lam’mbe puaka’nsuabe ze â, petâ sâu haî kat lei.

⁹Hekisiâm kehube ’ngkang hela ge ’mbie tauchube gene hela ge tingbia ’mbia ’mbene gutbe ’mpuî la lei.

¹⁰Tingbia ’mbia gu teririe gu ’mbie puadangbe ge hekisiâm ramme du larei lei;

¹¹chipau kisîam ramme suage ’mpuî tatbe du tingpeî ’mbia gu hekisiâm ramme lam’mbe tatbe ’mpuî ramme gum lei; petâ benai pedit du, zai kemuiki patbe ramme benai mâ-mâ ramme pebâm bâm ge kaibe tak ramme, zai ’ngkam ramme du ’nzuâsiak lei, tingpî ’mbia puaka’nrikbe runne châm lei.

¹²’Ngkangbe kisîam ramme ge gutbe kilûng gu puidi tingpî ’mbia ge hekisiâm ramme bambe kangge tingbia ’mbia ge kemuiki kat la lei.

¹³Dadege pa ne achu salia ze, “Tingpeî ’mbia benai tingpî ’mbia gu hekisiâm ramme kerie lung je teidabe â tingkume herâtewbe-kaira ’nchilangbe ge mâ-teu ra Tingwang dage wangka’nname kela peipatbe ’nchilangbe tingkume bau mâ-teube bam lei; zai ’nchilangbe merua kaikanduibe bâm lei, teurabe diepat’nchigaibe, mâ-himlei peipatbe, hemui-râtewbe zai mâ-tewmaube-râtewbe ramme penui ne diepat’nchi gai lei, chipau bâm â ka’nchibe bâm daseu.

¹⁴Chige tingkume ka’nchibe bâm ge penui gut dezai penui tâ ka’ngguabe paîni chige sâudiak kai mak ze chigene hela ’mbe tedirielung ’mbe penui zuapat mak ra lei; chige penui baudime hang tâka’ngguabe paîni ramme â sâudiak kai ra lei, chiramme â diepat’nchilube paîni ramme daseu. Penui paîni ramme helei lu dezai baudime ruage penui wang ra lei,” ze kacheu de lei.

¹⁵Zai kellumki lung pa ne ’ndeu kam gai lu dege, tingbia ’mbia puaka’nsuabe keriekemui gene pa ne achu nguapat kai de lei, zai kellumki dit ze ’ndeu’ngguareu gai de lei.

¹⁶Tingbia ’mbia pa ne ka’ndeube hekupum zuâ ne ka’ndeu de lei; chize hekupum ne ’ndeu gai dege sâu haî mengeu lei.

¹⁷Zai pa ’nreiwang lu ze tingpeî ’mbia ka’ndeu de lei, chize hekupum ne ’ndeu gai dege sâu haî mengeu lei.

¹⁸Zai pa ’nreiwang lu ze tingpî ’mbia ’ndeu gai dege sâu haî mengeu lei.

¹⁹Zai tingrun ’mbia pa ’ndeu gai de lei, zai hekupum ne ’ndeu gai dege sâu haî mengeu lei.

²⁰Mik medai gu chize pa ’ndeu gai de lei, zai ka’nchibe bâm benai ’nchimakbe bâm kakge ’mbie bielangchâmbe bam lei; petâ ge sâu haî mengeu lei, zai pedit ge sâu haî mengeu lei.