Read Zeme Naga EZEKIEL 43 Bible Online

EZEKIEL 43 - Zeme Naga bible

EZEKIEL 43

¹Tingbia ’mbia kemui puaka’nsuabe keriekemui ge pa ne achu nguawang gai bei de lei.

²Zai pie le lau, Israelme Rapeu ngeudibe tingbia ’mbia ne wang mui de lei, pe kuâ ze â hedui kedibe kagesuâkbe kuâ gum lei, zai kedei â pa pengêudibe ’mbi ne sireba bam de lei.

³Keliâbe I ngaube tak ze namdi tew’nsia ra wangkeube gum, zai Kebar geukâm ge keliâbe I ngaube gum lei, dadege â I kâukeu ze ’ngkum gai di de lei.

⁴Zai tingbia ’mbia puaka’nsuabe keriekemui gene Tingwang ngeudibe kellumki ’mbe gut te lei;

⁵zai Herui ne achu nguachu lu ze helungbe sîam ’mbe achu teigut kai bei de lei; zai pie le lau, Tingwang ngeudibe ne kellumki puigit ti de lei.

⁶Zai hangkat a taige sapbambe luage mige ne kellumki gene achu ka’mpaube I seu de lei;

⁷achu, “Ziemmena na gau, aize a gu heguang-bamrâ bambe bâm, a pichaî bam lei, Israel chaname ruage betingbeta I bamrabe bâm lei; a ji ka’nchibe ze Israel kibaume penui ruagene mei, penui gu heguangme ne mei, penui lungkakelapbe ne mei, nune penui gu heguangme kechaipum ne mei ne tewhebâ dai mak ra lei;

⁸penui gu namsûng ze a gu namsûng taige tew gai gu, zai penui gu kemuichia ze a gu kemuichia taige kai gu lei, zai penui benai a kakge ’mbie ne bamnam gu lei, penui ne ngaukatenetbe tâtewbe ne a ji ka’nchibe tewhebâ ’nde lei; chidadege â a râtabe ne penui je I tew’ngga ’nde lei.

⁹Zai chuna gene seu ze peize penui gu heguangme ramme gu kechaipum tei lu ze a dagene kedeu ’mbe kai ne lau; zai heraluîtewbe ramme je kellum ta lau; dezai betingbeta penui ruage I bam bam gu lei.

¹⁰“Nang ziemmena na gau, heki kedibe luî ze Israel kiduîme je teilia be lau, penui tâ-kesiabe ramme tewbe ziegene peize penui ’ngngam ra hanggeu; zai penui tatew tak ze ’ndeu lu ze teilia be lau.

¹¹Zai penui tatew ramme leine gene penui ’ngngam dizai â kellumki bambe tak luî ze ’nritliâ be lau, zuapatbe kemui, zai gutbe kemui ramme, betâu tew ra kedâgaibe, teirabe tak, besie-hingde rawgaibe, zai teirabe tak penui mikngau sing gene rawlia gai lau; teirabe tak leine penui lutei ra, zai tewrabe teirabe tak leine penui tew kam ra lei.

¹²Aize kellumki gu hingde lei: kedeiloa kedibe ramme aize tuaguabe deiloa leine ze ’nchilangbe chang ra lei. Pie le lau, aize kellumki gu hingde lei.

¹³“Herâtewbe-kaira ka’ndeube pedit-petâ desau ne ka’ndeube ze aigum lei, (sâu kat kacheube ge sâu kat ze bapei kat lei), pehut ge sâu kat, zai pedit ge sâu kat, zai bekung ge tingkeu kat ne bekak-kakge kaichu’nguguâling gai lei.

¹⁴Zai herâtewbe-kaira (herâtewbe ’mmang) hut ze aigum lei: kedei ka’ngkingbe gene herâtewbe-kaira dungbe pî ’ngkangbe pigua riâ ge sâu na lei, peseu ge sâu kat, bekung cheibe gene kedibe riâ ge sâu medai ra lei; zai pedit â sâu kat ra lei.

¹⁵Zai herâtewbe ’mmang â pehut sâu medai, zai chi herâtewbe ’mmang ge bekie medai sum gai ra lei.

¹⁶Zai herâtewbe ’mmang â petâ ge sâu kereu ze kena, zai pedit ge sâu kereu ze kena ra lei, pemik medai ’nsamrap ra lei.

¹⁷Pekung dungbe ge petâ sâu kereu ze medai, zai pedit gu châu medai ge sâu kereu ze medai-dai ra, pekung-gua desau pi ne guâling ra, zai pedung pî ge sâu kat ne guâ ra lei, zai desua â tingbia ’mbia ’nsua ra lei,” ze kacheu de lei.

¹⁸Zai pa ne achu ranglia lei, “Ziemmena na gau, Tingwang Hera ne acheu ze rang lei: Herâtewbe-kaira tew kam lu dezai chize tei ze tewrabe tak aigum ze tew ra lei: Rûkambe-râtewbe peipat ra, zai hejai kezin gai ra lei.

¹⁹Lebime zat tingku Zadokbe kiria ne a guâ ’nggua ra, a dage wangka’nname dage hemui-râtew ra getumsei poine nang pei ra lei, ze Tingwang Hera ne rang lei.

²⁰Pe jai gêsa nang ne lu ra lei, zai herâtewbe-kaira gu mâkie medai ge zai bekung gu mik medai ge, zai pekung-gua peireige hejai ’nzau gai ra lei; chigum ze herâtewbe ze hejai ne tew’nchi ra, zai diepat’nchi gai ra lei.

²¹Zai hemui-râtew ra getumsei nang lu lu, pebâm ka’nchibe gene hela ’mbe chipau tâ tew ra hangge kedâ’ntuagailube gene rû ra lei.

²²Zai pa-kenabe mai ge kemei’nsei heziâkgabe, kahemuibe-râtew ra peipat ra lei; chidezai getumsei ne tewka’nchi gum ze kemei’nsei ne herâtewbe-kaira tew’nchi ra lei.

²³Zai herâtewbe-kaira nang tew’nchi lu dezai getumsei heziâkgabe benai kemei’nsei heziâkgabe pedung ruagene lu lu ze nang peipat ra lei.

²⁴Tingwang masuage pualia ra lei, zai tingkupeu ne ’nchaî terup kai ra lei, zai Tingwang dage rûkambe-râtewbe hang nang peipat kai ra lei.

²⁵Hezie sena nai’nsangne kemei ne hemui-râtew ra nang kedâ ra lei; zai getumsei benai meli’nsei pedung ruagene kena heziâkgabe penui ne peipat ra kedâ ra lei.

²⁶Herâtewbe-kaira penui tew’nchi ra hezie sena ’nnang gu lei, dezai herâtewbe-kaira ze diepat’nchigaibe chang gu lei.

²⁷Zai aipau tingnaimikpui ramme kam dezai, hezie padesatbe mai gene tingkume ne rûkambe-râtewbe ramme benai desieyibe-râtewbe ramme herâtewbe-kaira ge peipat chu ra de lei, dezai ningnui je I ne lu gu lei,” ze Tingwang Hera ne rang lei.