Read Zeme Naga EZEKIEL 44 Bible Online

EZEKIEL 44 - Zeme Naga bible

EZEKIEL 44

¹Dadege pebâm ka’nchibe gu kemui gene hela ’mbe tingbia ’mbia ka’nsuabe lam’mbe achu nguagut kai de lei, kane ’ngkam kainam ’ndi lei.

²Zai Tingwang ne achu, “Aipau ’ngkam â kainam bam gu lei, ’ngkam lat ra mak lei, mi-mige de ai gene gut ra mak lei, Israelme Rapeu Tingwang guttibe ziegeneu; chidadege ’ngkam kainam bam gu lei.

³Kane heguang â Tingwang suage tak teu ra chige ’ntau gu lei; namsûng kemui gene pa gut ku lei, zai chipau kemui gene pa pat dai gu lei,” ze kacheu de lei.

⁴Zai tingpeî gu keriekemui gene kellumki suage achu pa ne nguagut te lei; I pie gai dege, pie le lau, Tingwang gu kellumki ze Tingwang ngeudibe ne puigit ti de lei; zai I kâukeu ze ’ngkum gai di de lei.

⁵Dadege Tingwang ne achu, “Ziemmena na gau, Tingwang gu heki teirabe tak, zai pe gu hingde ramme leine I saliabe ramme ning kun ne ’ngking le lau, zai ning mik ne pie le lau, ning lung ne ’nchet’mmi le lau; pe gu kellumki ge gutrabe tak (hingde ramme) pebâm ka’nchibe gene patrabe hingde ramme ze ning lung ne ’nchet’mmi le lau.

⁶Zai ka’nggime Israel kiduîme sua sing ge nang acheu salia ra lei: Tingwang Hera ne acheu ze rang lei: Hei, Israel kiduîme gau, ningnui telung ngaukatenetbe leine peireige kaisuâ ra,

⁷Jentailme helung lam ge benai hejaipumsie ge rumgetenmakme ne a gu tingku ramme, mâ-châ ramme, zai hejai peipatbe luage a gu heki ka’nchibe, a ki gîmsingbe du tewhebâ ra ningnui ne nguawang gai bei de lei, a gu samdiegaibe ningnui ne tewka’nsiabe gene ningnui telung ngaukatenetbe ramme peize sau de zu lau.

⁸Zai a gu merua ka’nchibe ramme ningnui ne reî mak, kane Jentailme ne a gu kellumki ningnui kelei ge reî ra ningnui ne kelâng gai zeu, ze acheu zeu.

⁹“Chidaze Tingwang Hera ne rang ze, Jentailme helung lam ge benai hejaipum-sie ge rumgetenmakme Israel chaname ruage bamme â a gu ka’nchibe bâm kellumki ge gut mak ra lei, kacheu de lei.

¹⁰“Zai Lebime a dagene tat’ndeudime, Israelme tatlietat ze mâ-luîtewbe je kakellumme ze penui mâu-miê â penui ne pung gu lei.

¹¹Acheusede a gu ka’nchibe bâm ge tâka’ngguame, zai kemui reîme chang ze bam gu lei; zai hekilung ge mâ tâka’ngguame chang gu, zai rûkambe-râtewbe, zai baudime hangge herâtewbe hangge kaurui ramme penui ne tewchat ku lei, baudime tâ ’nggua ze baudime suage penui sap ku lei.

¹²Penui gu mâ-luîtewbe suage penui ne tâ’nggua ze bam zai Israelbe kibaume je penui tewkau ra chang ze bambe ziegene penui peireige I deseu gai ze a ba huachu de lei, penui mâu-miê â penui ne pung gu lei, ze Tingwang Hera ne kacheu de lei.

¹³Chidaze tingku tâ ’nggua ra a dage penui wang’nna ra mak lei, a gu merua ka’nchibe, zai merua ’nchilangbe ge penui mâtew-tewsede wang’nna ra mak lei; kahelêube benai ngaukatenetbe tâ penui ne tewbe ze penui ne pung gu lei.

¹⁴Acheusede kellumki reîme chang ra, chige mâ-tâtewrabe leine, zai tâtew ra ka’nnangbe leine tew ra penui je I ne tew gai gu lei.

¹⁵“Kane Tingkume Lebibe kiria, Zadokbe name, Israel chaname a dagene lietattibe ting ge a gu pebâm ka’nchibe reî’mmi ze reîme ze â a guâ ’nggua ra a dage penui wang’nna gu lei, a dage mâ-châ benai hejai pei gai ra a suage penui sap ku lei, ze Tingwang Hera ne rang lei;

¹⁶a gu pebâm ka’nchibe ge penui gut ku lei, zai a gu leisi-kaira taige a guâ ’nggua ra penui wang’nna gu lei, zai a tâtewrabe penui ne tew gu lei.

¹⁷Zai helungbe teririe lung kemuiki ge penui gut dezai paî petachîambe penui bâ ra lei, helungbe kisîam gu kemuiki ge a tâ ka’ngguabe luage mâ-geû paî bâ mak ra lei.

¹⁸Paî petachîambe peî’nggau penui kai ra lei, zai betachiâmbe paî telong tiebe penui kai ra lei, tebeudui patchibe paî â bâ mak ra lei.

¹⁹Zai rieguabe helungbe sîam gene hela ’mbe baudime dage penui pat dezai penui tâka’ngguabe ge kaibe paî ramme â luakpat lu ze, hekisiâm ka’nchibe ge kai nan ze paîni kêdabe ramme kai ra lei; penui gu paîni ka’nchibe ne baudime je tew’nchi ra mak daseu.

²⁰Zai penui peîtam gutduaktua mak ra lei, zai penui peîtam du ’nzuak’ntie mak ra lei, kane penui peîtam pungbuibe riâ chiap kai ra lei.

²¹Tingkume helungbe kisîam lung ’mbe penui gut dezai wain sak mak ra lei.

²²Kemîpui mei nune tapat’ndipui mei je pe nâu hang lu mak ra lei; kane Israelbe kiria gene rehei piakeube kau leusangka’nchime je mei nune tingkume chaidime nâu kemîpui mei je â penui nguakelaktewchi duî lei.

²³A gu ziemmena je pe kiria ka’nchibe benai ’nchimakbe gechâmbe chî ra penui je getei gai ra lei, zai mâ-mâ ka’nchibe benai ’nchimakbe gechâmbe ngauchi ra getei gai ra lei.

²⁴Sam getube pat dezai penui ne samramme gum ze ram ra lei, zai a gu hingde luigum ze penui samram ra lei, a gu hingde ramme benai rawdiakkaibe sam ramme a gu hengî mai leine ge penui tei’mmi ra lei, zai a gu ’ntakbambe mai ramme ze ’nchichiak ze rei ra lei.

²⁵Penui runne penui je tewhebâ mak ra, kechaipum taige wang’nna mak ra lei; kane pe pui mei nune pe peu mei, pe na mei, pe sikinapeu mei zai pe sikinapui meimakpui hangge â penui runne penui je tewhebâ le duî lei,

²⁶zai pa tewhebâlube chângge pe hangge hezie sena riam gai dai ra lei, chidezai pe ka’nchibe chang ra lei.

²⁷Helungbe sîam rielung pebâm ka’nchibe ge tâ’nggua ra pebâm ka’nchibe ge pa gutbe mai dezai pe gu kahemuibe-râtewbe pa peipat kai ra lei, ze Tingwang Hera ne rang lei.

²⁸“Tingkume dam hang â bam mak ra lei, penui dam hang â I ne chang gu lei. Israelram ge penui heurâ hang ga lei, penui dam hangge I ze de lei.

²⁹Mâ-himlei peipatbe, hemui-râ-tewbe, mâ-tewmaube gu peipatbe, penui tew ra lei, zai Israelram ge mâ-mâ peipat’nchigaibe leine penui hang kam lei.

³⁰Mâ-hêrachi ’nchikeuraibe yibe leine, zai mâ-mâ keyibe peipatbe leine, zai mâ-mâ kedei gene patbe leine tingkume hang kam lei, zai ningnui ki ge ’nnamgaibe bam bam ra tingku langkeuraibe ge yilangbe tingkume hangge ningnui pei ra lei.

³¹Tingkume â ’nruine mei, nune hekaune pe runne chaibe meiji, zai kêdabe hekaune ne tewchatbe herumji mei be teu mak ra lei.