Read Zeme Naga EZEKIEL 45 Bible Online

EZEKIEL 45 - Zeme Naga bible

EZEKIEL 45

¹“Ningnui heram ’nzi dezai kedeibâm kat â, diepatchâm gai ra lei, heramloa kat â Tingwang dage diepat’nchi gai ra lei; petâ ze sâu chang ’ngkai ze mengeu, zai pedit ge sâu chang ’ngkai ra lei, heram pelane ka’nchibe chang ra lei.

²Chige pebâm ka’nchibe hangge petâ-pedit ze sâu haî mengeu-ngeu ra lei, betâ-pedit ’nsamrap ra lei, zai pehiage kedeibâm ka’nruabe bam ra lei, bekak sâu haî mengeu kedeibâm ’nrua ze bam ra lei.

³Zai chige ’ndeulube gene ramloa kat petâ ge sâu chang ’ngkai ze mengeu, pedit ge sâu chang kereu nang ’ndeupat kai ra lei, zai chi ’nchilangbe bâm ge kakellumbeki bam ra lei.

⁴Heram diepatchâmgaibe â pebâm ka’nchibe ge ka’ngguapeu tingku, pe guâ ’nggua ra Tingwang dage wang’nna’nsui ze bamme hang chang ra lei, penui ki bâm hang zai kellumki ka’nchibe bâm hang diepatchâm gai ra lei.

⁵Betâ ze sâu chang ’ngkai ze mengeu, pedit ge sâu chang kereu ra lei, Lebi zat kellumki tâ ka’ngguame, namdi ge bamme hangge diepatchâmgaibe kêdabe penui hangge bam ra lei.

⁶“Heram diepat’ndigai’ndibe taihia ge hekuînâm gu kedeibâm pedit sâu chang mengeu zai petâ ge sâu chang ’ngkai ze mengeu diepatchâm gai ra lei, chize Israel kiduîme leine hang chang ra lei.

⁷“Zai heguang bâm hangge heram diepat’ndibe benai namdi ka’nchibe hiage, zai heram diepat’ndibe sua ’mbia benai namdi hang diepat’ndibe namdi gu heramrai, katlam ’mbia heguang hang hedam bam ra lei, zai katlam ’mbia heram ka’nchibe benai namdi gu kedei bam ra lei; zai heram ka’nchibe benai namdi gu kedei zene herai chang ra lei, pebia ’mbia tingbia benai tingrun ’mbia gu heramrai gene tingbia ’mbia gu heramrai chang ra lei, heram tuak kat bia chang ra lei.

⁸Chize Israelram ge pe dam hang chang ra lei; a gu heguangme ne a gu ziemmename je tewsâ dai ra mak lei, Israel kiduîme pezat gechâm-châmbe luigum ze heguangme ne penui je heram pei gai gu lei.

⁹“Tingwang Hera ne acheu ze rang lei: Hei Israelme gu heguangme gau, bui de lei, katîmphibe benai nupteube sau de zu lau, samrambe ka’nzeibe benai kapelingbe ne samram lau, a gu ziemmena je kelitua ta zu lau, ze Tingwang Hera ne kacheu de lei.

¹⁰“Ka’nchube hedu peling tew ra, zai ephah benai bath du peling tew ra lei.

¹¹Epha benai bath ze ka’nchube ’nsamrap ra lei, chidezai mâ-ka’nchube ge ephah kereu zai â, bath du kereu ra lei, chize homer kereu ge kat te lei, zai homer zene ’ndeu ka’nsambe chang ra lei.

¹²Mâ-ka’nchube aigum ra lei: gerah ’ngkai ge shekel kat lei, zai shekel riakseruk ge mina kat ra lei.

¹³“Nang mâ-peibe ge aigum ze pei ra lei; dekuîmeu gu homer kat ge ephah tam seruk ge tam kat pei ra lei, barlimeu gu homer kat ge ephah tam seruk ge tam kat nang pei ra lei.

¹⁴Mâ-châ peipatrabe tak â kor kat ge bath tûm kereu ge tûm kat pei ra lei; kor kat ge bath kereu lei, homer benai ’nzuâ lei, homer kat ge bath kereu daseu.

¹⁵Israelme gu kaurui-taning yibe ge melidung haî na ge melipoine kat peipat ra lei, chiramme ze mâ-himlei peipatbe-râtewbe, rûkambe-râtewbe, desieyibe-râtewbe ningnui gu hemui-helut lun-gaibe-râtewbe hangge zeu, ze Tingwang Hera ne kacheu de lei.

¹⁶Heram gu ziemmename leine ne Israelme gu heguang dage penui gu kela aigum ze peipat ra lei.

¹⁷Chidadege kahengîbe ramme ge, zai hekêu karchibe-ngi, ’ntakbambe mai, rûkambe-râtewbe, mâ-himlei peipatbe-râtewbe, wain peipatbe-râtewbe ramme, Israelme zat leine gu hengî ting leine gu ze heguang ne kedâkua ra lei. Hemui-râtewbe, mâ-himlei peipatbe, rûkambe-râtewbe, desieyibe-râtewbe zai Israel kiduîme hangge hemui-helut lun-gairabe herâtewbe hangge heguang ne tew ra lei.

¹⁸“Tingwang Hera ne aigum ze rang lei, Hekêu raîlangbe gu hezie kat mai ge getumsei heziâkgabe ne pebâm ka’nchibe tew’nchi ra herâtew ra lei.

¹⁹Tingkupeu ne hemui-râtewbe gu kaurui jai lu lu ze heraki kemuikung ramme ge zai heraliebe-kaira mik medai ge zai helungbe kisîam gu ’ngkam chia ramme ge hejai kenei gai ra lei.

²⁰Zai chipau kêu gu hezie sena mai ge mâ-tewmau mei nune chimakbe ziegene mâ-tewmaube hangge herâtew ra lei, chigum ze kellumki du hejai ne tew’nchi ra lei.

²¹“Zai hekêu raîlangbe ge, chipau kêu gu hezie kereu ze medai mai ge tat’ntuahengi bam ra lei, zai hezie sena lungge haimena ne ’nduihîkaimakbe tingku teu ra lei.

²²Chipau mai ge heguang ne pe runne hang benai pe ramdei ge ziemmena ’nteumena hang hemui-râtew ra getumsei poine pa ne peipat ra lei.

²³Kahengîbe gu hezie sena lungge Tingwang dage rûkambe-âtew ra getumsei poine sena zai meli’nsei sena heziâkgabe ne tew ra heguang ne peipat ra lei, zai hemui-râtew ra nai’nsangne kemei’nsei kat-kat peipat bam ra lei.

²⁴Mâ-himlei peipatbe-râtewbe-kaira ge getumsei kat ge ephah kat-kat, zai meli’nsei kat ge ephah kat-kat pei ra lei, zai chige ephah kat ge mâ-châ hin kat pei’mpam ra lei.

²⁵Pasenabe kêu gu hezie kereu ze mengeu mai kahengîbe du hezie sena ne besua’ngka tew gum ze tew ra lei, hemuikelunbe ngau ra hemui-râtewbe, rûkambe-râtewbe, mâ-himlei peipatbe-râtewbe benai mâ-châ peipatbe leine heguang ne tew kam ra lei.