Read Zeme Naga EZEKIEL 46 Bible Online

EZEKIEL 46 - Zeme Naga bible

EZEKIEL 46

¹“Tingwang Hera ne aigum ze rang lei: Helungbe kisîam gu keriekemuiki gu ’ngkam tingbia ’mbia ka’nsuabe ze â tâtewbe mai hezie serukne kainam ra lei, kane ’ntakbambe mai benai hekêu karchibe mai â ’ngkam lat kai ra lei.

²Heguang â teririe hela ’mbene kemuiki gene namsûng ge pa gut lu ze kemuikichia pî ge pa sapbam ra lei; zai tingkume ne rûkambe-râtewbe benai desieyibe-râtewbe ze heguang hangge tew ra lei, zai heguang â keriekemui namsûng ge kellum gu lei; dezai pa â chigene hela ’mbe zuapat tu lei, zai hegî chang mak tâne keriekemui â kainam ra mak lei.

³Kane baudime â ’ntakbambe mai benai hekêu karchibe-ngi mai ge â keriekemui gutbega ge Tingwang suage penui kellum ra lei.

⁴’Ntakbambe mai ge heguang ne melipoine heziâkgabe seruk zai meli’nsei heziâkgabe kat ne Tingwang dage rûkambe-râtewbe peipat ra lei.

⁵Zai meli’nsei kat ze tingku ephah kat-kat, zai melipoine kat ge tingku pa ne peiduibe riâ pei ra, zai ephah kat ge mâ-châ hin kat pei ra lei.

⁶Zai hekêu karchibe mai ge heziâkgabe getumsei poine kat, zai melipoine heziâkgabe seruk, zai meli’nsei heziâkgabe kat pelane heziâkgabe ne peipat ra lei.

⁷Zai tingku peipat ra teleu ra lei, getumsei poine kat ge ephah kat, zai meli’nsei kat ge ephah kat, melipoine ramme pa ne pei duî-duîbe riâ pei ra lei, zai ephah kat ze mâ-châ hin kat kat ra lei.

⁸Zai heguang â namsûng ’mbe gutbe ’mpuîki keriekemui gene pa gut ra lei, zai chipau ’mpuî gene pa pat dai ra lei.

⁹“Kane baudime â kahengîbe mai leine ge Tingwang masuage Hera je kellum ra tingpeî ’mbia gu keriekemui gene gutme â tingpî ’mbia keriekemui gene penui pat ra lei, zai tingpî ’mbia ge keriekemui gene gutme tingpeî ’mbia gu keriekemui gene penui pat dai ra lei; penui gutbe ’mpuî gene helatpat dai mak ra lei, kane penui sua luî tat’nduâtat ra lei.

¹⁰Zai penui gutbe ge heguang du penui ruage teri ra lei, penui gut dezai heguang du gut ra, zai penui pat dezai heguang du pat ra lei.

¹¹“Kahengîbe mai ramme ge, zai ngidi ramme mai ge mâ-himlei peipatbe ge getumsei kat hangge ephah kat, meli’nsei kat ge ephah kat, zai melipoine ramme ge pa ne nei-neibe riâ pei ra lei, zai ephah kat ge mâ-châ hin kat pei ra lei.

¹²Zai heguang ne rûkambe-râtewbe mei nune desieyibe-râtewbe mei ze Tingwang dage pa ne pei gai ra lunei zai â, tingbia ’mbia puaka’nsuabe keriekemui lat kai ra lei; zai ’ntakbambe mai ge tew gum ze rûkambe-râtewbe benai desieyibe-râtewbe tew ra pa ne kedâ ra lei; zai pa tat ti dezai keriekemui kainam ra lei.

¹³“Zai nai’nsangne Tingwang dage rûkambe-râtew ra melipoine heziâkgabe kum kat poine ne hechua ’nsangne tew ra lei.

¹⁴Zai hechua ’nsangne mâ-himlei peipatbe-râtew ra lei, dekuîmoîne hit na zai mâ-châ hit kat ne dekuîmoîne kenei ra teleu ra lei; aize betingbeta Tingwang dage mâ-himlei peipatrabe hingde tew gai lei.

¹⁵Chidadege hechua ’nsangne rûkambe-râtew ra melipoine, mâ-himlei zai mâ-châ kedâkua ra lei.

¹⁶“Tingwang Hera ne aigum ze rang lei: Heguang ne pe name châu-châu dage heram pei gai mei, chize pe heurâ pa ne peigaibe ze pe name hang chang gu lei; chize penui ne pe heurâ nguaheube chang de lei.

¹⁷Kane pe guâ ka’ngguabe kau hangkat dage pe heurâ ne kela chang ze pa peigaibe â, kebang je ripatbe mai riâ chang ze pa tei ra lei; bechâng dezai â heguang dage chize pei dai ra lei; pe heurâ â pe name runne ngau ra chang lei.

¹⁸Aipau peireige heguang ne miramme heurâ sut ra besie mak lei, zai pe lu benai pe ki gene du kelitua ra besie mak lei; hetâram pe dage peigaibe pe gu gene pe na hangge pe heurâ peibe chang ra lei; dezai a gu ziemmena gu hetâram tew’ngga mak ra hangge zeu,” ze kacheu de lei.

¹⁹Tingpeî ’mbia heki puaka’nsuabe kerie gutbe ’mpuî gene tingkume gu hekisiâm ka’nchibe ge achu nguagut te lei, pie le lau, chipau bâm â naimikkeu’nnei helunglangbe ge la lei.

²⁰Zai pa ne achu, “Aize tingkume mâ-langbe bâm lei, mâ-tewmaube-râtewbe benai hemuirâ-tewbe meiji langteube bâm, zai mâ-himlei peipatbe langteube bâm lei, chidezai chi ka’nchibe merua ze helabe kisîam ’mbe teipat ze baudime dage teikebut kai mak ra hangge zeu,” kacheu de lei.

²¹Chidadege helabe kisîam ’mbe pa ne achu nguapat te lei, zai hekisiâm gu mik medai ramme pa ne achu teilia de lei; pelingsing ze hekisiâm mik leine ge kêdabe kisîam lamui lei.

²²Hekisiâm ge mik medai gu besîam cheibibe ramme la lei, petâ ge sâu hedai, zai pedit ge sâu himreu la lei; chi mik medai ze ’nsam kam lei.

²³Zai chige tingchukâng ramme ne hekisiâm leine kaiguâling ze peria-tauperiabang la lei, hekisiâm medai ze ’mbie ne tauguâling la lei; zai mâ-kahelangbe ’mmang ramme tingchu ne peria tauguâlinggaibe pî kangge ’mmang ramme tew gai la lei.

²⁴Zai pa ne achu, “Airamme ze mâ-langbeki ramme lei, kellumki ge tâka’ngguame ziemmena ramme ne peipatbe herâtewbe meiji langrabe bâm lei,” ze kacheu de lei.