Read Zeme Naga EZEKIEL 47 Bible Online

EZEKIEL 47 - Zeme Naga bible

EZEKIEL 47

¹Dadege heraki kemui ’mbe pa ne achu nguapat te lei, zai pie le lau, kellumki kemui pî gene hedui tingbia ’mbia luapat lei, kellumki â tingbia ’mbia pe ma puaka’nsua daseu; hedui â herâtewbe-kaira tingpî ’mbia kellumki kang gene luapat lei.

²Dadege tingpeî keriekemui ’mpuî gene pa ne achu nguapat lei, tingbia ’mbia pe ma puaka’nrikbe keriekemui riâ pa ne achu nguapatchang de lei; zai chige hedui tingpî ’mbia luapat bam de lei.

³Chidadege pe ba ne mâ-ka’ndeube ria tei’nduâpat lei, chi ziemmena ne tingbia ’mbia pat lu sâu chang kat ’ndeu gai de lei, zai hedui huak ze pa ne achu nguaka gai de lei; hedui mi pî’nggua riâ hangchang lei.

⁴Zai sâu chang kat pa ’ndeu kadai de lei, zai hedui gene achu pa nguatat kadai de lei, mi kuk riâ hedui hangchang di de lei. Zai sâu chang kat pa ’ndeu gai kadai lei, zai pa ne achu hedui gene nguapat te lei, hedui ze a kia riâ hangchang di de lei.

⁵Zai sâu chang kat pa ’ndeu gai kadai de lei, chize I kapatchilakbe geuki chang di de lei, hedui chuktibe ziegeneu; ’nggeuki hedui chuk ze huakkachi lak ti de lei, hedui ge zak makchai ai.

⁶Pa ne achu, “Ziemmena na gau, aize nang ngau de mei?” ze kacheu de lei. Dadege pa ne ’nggeukung ’mbe achu nguapat kai de lei.

⁷Zai chigene I helatpat dege, pie le lau, ’nggeukung tâluî, ’nggeukung kena lam heching bâm ramme misongga bam de lei.

⁸Chidadege pa ne achu, “Aipau hedui ze heram gene tingbia ’mbia luatat ze Araba ’mbe luakeu de lei, zai heduilua’ndanggaibe sungkling ge aize gutchang dezai hedui karchibe chang dai gu lei.

⁹Zai ’nggeuki luagaibe bâm leine ge mâ-keringbe, ka’ngngaibe zat leine ring gu lei. Chige hedui luakeugaibe ziegene hekâ ramme chige misongga bam gu lei; sungkling gu hedui tew’nchi ra, zai hedui luagaibe bâm leine ge hekaubena leine ring le ra chipau hedui ze lua gai daseu.

¹⁰Zai sungkling kung ge hekânimme sapbam gu lei; En-gedi gene En-eglaim riâ chang ze chige penui chiâk gibe bâm chang gu lei, penui gu hekâ zat ramme â Mediterranean sungkling gu hekâ zat kiege ze hekâ misongga bam gu lei.

¹¹Kane dechup benai ’ndeu â tew’nchi gai ra mak lei, tejaibâm hang sâudiak kai gu lei.

¹²Zai ’nggeukung tâluî chingbang zat leine ailia giam benai wîgiam sapperiabang bam gu lei, zai peneu ramme hegui ra mak lei, zai perachî du ’nchi mak ta ra mak lei, pebâm ka’nchibe gene hedui luakeu ze hedui zuâ bambe ziegene penui rachî pekiâng ’nsangne ’nchi gu lei. Penui rachî â tewrabe hetak, zai peneu ramme â reheu hang chang gu lei,” ze kacheu de lei.

¹³Tingwang Hera ne acheu ze rang lei, “Aize Israel zat kereu ze kena ruage heram ’nzirabe tak lei: Josepbe â dam na ngau gu lei.

¹⁴Heram ’nsamrap ze ningnui ngau kam gu lei; ningnui peume suage a ba huachu lu ze I ne deseulube ziegene aipau ramdei ze ningnui ne nguaheurabe ramdei chang gu lei.

¹⁵“Aize heram leine gu heramrai chang ra lei: tingpeî ’mbia ge, Mediterranean sungkling gene Hethlon tatkapelabe ’mpuî gene Hamath pechuak tat kai ze Zedad chang lei;

¹⁶Berotha gene Damaska benai Hamath ramrai sûngngang ge bambe Sibraim, Hauran ramrai pî ge bambe Hazer-hattikon chang lei.

¹⁷Chidadege heramrai â Mediterranean sungkling gene Damaska ramrai pî Hazar-enon chang gu lei, zai tingpeî ’mbia â Hamath ramrai ge ’nti gai lei, aize tingpeî ’mbia gu heramrai hang lei.

¹⁸“Zai tingbia ’mbia â Hazar-enon gene Hauran benai Damaska kak, zai Gilead benai Israel zai Jordan geuki kak, zai Jordan geuki luî ’nti ra lei; zai tingbia ’mbia sungkling gene Tamar riâ chang ra lei, aize tingbia ’mbia gu heramrai hang lei.

¹⁹“Zai tingpî ’mbia gu heramrai â, Tamar gene Meribath-kades riâ chang ra, zai Ijip ’nggeuki luî-luî gene kedibe sungkling riâ chang ra lei, aize tingpî ’mbia gu heramrai hang lei.

²⁰“Zai tingrun ’mbia gu heramrai â, Mediterranean sungkling, zai tingbia ’mbia gu heramrai gene ’ntipat ze Hamath ze katlam ’mbia changbe riâ lei, aize tingrun ’mbia gu heramrai lei.

²¹“Israelme zat bambe luigum ze ningnui ruage aipau heramdei ze ningnui ’nzi ra lei.

²²Zai aigum ra lei, ningnui ruage heram zat gechâmme, hesangme chang ze wang lungdime pe nâu, pe name bamdime hangge du heram ’nzi gai ra lei, Israelme zat ruage du heram nguaheume chang ra lei.

²³Zai ningnui acheu ze tew ra lei, chige hesang lungwangme hangge heram nang pei ra lei, ze Tingwang Hera ne rang lei.