Read Zeme Naga EZEKIEL 5 Bible Online

EZEKIEL 5 - Zeme Naga bible

EZEKIEL 5

¹“Zai nang ziemmena na gau, hiazutkie mui liabe tei le lau, peîkezame gu ’nseîne kelei ge chize ne ning peîtam benai ning muimai ze guttua ne lau; zai ’nchu gai ra hedu tei lu hetam ramme ’nchu’nzi gai lau.

²Tam chum (tûm chum) ’nzigaibe ge tam kat â herei tuaguâ ze bambe tingnaimikpui kam dezai keloa zuilung ge hemi ge nang rû gai ra lei, zai tam chum ge tam kat (tûm kat) â nang lu lu ze hiazutkie ne dimdesuirui gai ra lei; zai tam chum ge tam kat â tingkai ne guitua ra nang ’nruk kai ra lei; zai I ne hiazutkie ne gua’nsa gu lei.

³Zai chize kecheîne nang lu lu ze ning paî-leitûn ge lit kai le lau.

⁴Zai chigene gêsa â nang lu lu ze hemi zuilung ge nang tuâ gai ra lei, zai hemi ne chize rû ne lau; zai chigene Israelme ki leine ge hemi chu gu lei.

⁵Tingwang HERA ne acheu ze sa lei; Aize Jerusalem keloa lei, heramzatme zuilung ge I kai gai lei, zai heguangram ramme ne pechu guâling ze bam ra I ne kai lei.

⁶Zai Jerusalem â heramzatme sua â helungriaksia’nteu ze a gu samrambe ze penui ka’nggi lei, zai pehuâzie ge heram ramme bamme gu sua â a gu hingde rawgaibe â sia bi lei ze penui ka’nggi lei. A gu samramgaibe ramme penui lu mak, zai a gu hingde rawgai’ndibe ramme luî ge penui bam mak daseu.

⁷Chidadege Tingwang HERA ne acheu ze rang lei: Ningnui huâzie ge heramzatme lungguâme sua â ningnui â hekuâpheumakbe pungbi-bidibe ziegene, zai a gu hingde rawgaibe ge ningnui bam mak, zai a gu samrambe ningnui lutei mak, kane ningnui huâzie ge heramzatme gu samrambe luigum ze ningnui tewbe ziegene de lei, acheu zeu;

⁸chipauziegene Tingwang HERA ne acheu ze rang lei, Pie le lau, I ne du ningchu lugailak lei, heramzatme mikngau gene ningnui peireige samrambe kai gu lei.

⁹Zai ning dage ngaukatenetbe tâ leine tew ze bambe ziegene mâdau de I tewgaimakbe tâ, zai chigumbe tâ mâtew-tewsede I tewdaimakrabe tâ zat ning peireige I tew gai gu lei.

¹⁰Chidaze ningnui ruage penui peume ne penui name je teu gu, zai pe name ne penui peume je teu gu lei; chigum ze ningnui je I ne samram gai gu lei; zai ningnui ruage ’nsakpatme leine je guatimrarip kai gu lei.

¹¹Chidadege I keringbe Rapeu chang gum ze, aize Tingwang HERA gu sam lei, Pelingsing ze nang ne a gu kakellumbe paîki tewhebâ ze ning dage kaheteîbe luilung leine, zai mi ngaukatenetbe bambe ziegene a mik ne ningchu ngaumaumeluisui lei, zai ningchu ngauka’nggiabe du ga lei, ningchu I ne deî’ngga kam ’ndu lei.

¹²Ning gume bau bau chum ge bau kat â herarît ne penui chai gu, zai ning dage bamme tak-râkûm ne kemei-meichat ku lei; zai ning hiage bau chum ge bau kat â hiazutkie gene kau gu lei; zai bau chum ge bau kat je â pebâm’nsangne ge guatimrarip kai ’ndu lei, zai penui chai hiazutkie ne I gua’nsa gu lei.

¹³“Chigum ze a râtabe tewpui gai gu, a lumpumbe penui peireige ’ntau gai gu lei, dezai a lungsêt chang gu lei; zai I Tingwang ne penui peireige a lumpumbe tewpui gai bei dezai helunggut ze mâ-ranglia lei be penui chî gu lei.

¹⁴Chize runne makze, ning huâzie ge bamme heramzatme zai chige tatkaime mikngau ge sâuhammuî’ndibe bâm zai kateliabe bâm chang ra I ne ningchu tew gai gu lei.

¹⁵Chidadege a râta-desang, zai a lumpum-desang dezai ningchu tewsâ-desang gu lei, zai ning peireige samrambe kai bei dezai ning huâzie ge heramzatme ne telia gu, zai ngauheteî, zai ngauhingrim ra chang gu lei. Chize I Tingwang ne rang de lei.

¹⁶Ningnui dage mi ngauhingbe herakûm gu bai’mpitu, chize ne ningnui je tew’nsia ra I lang gai gu lei; zai herakûm ze ningnui dage ranbi-bi ra I tew gai gu lei, zai ningnui gu hetak katimzibe I ne tew’ntau ’ndu lei.

¹⁷Chidadege ning dage herakûm benai hekaune ramme I lang gai gu lei, zai ning name je hekaune ne ’nsia gu, zai herarît hejailuabe ne ning dage naî wang gu lei; zai ningnui peireige hiazutkie huachu gai ra tew gai gu lei, I Tingwang ne rang lei,” ze kacheu de lei.