Read Zeme Naga EZEKIEL 7 Bible Online

EZEKIEL 7 - Zeme Naga bible

EZEKIEL 7

¹Tingwang gu sam a dage wang kadai de lei, acheu sa ze:

²“Nang ziemmena na gau, HERA ne Israelme ramdei je acheu salia de lei, Betun-gaibe! Betun-gaibe â tingmik medai ge wang mui de lei.

³Chunage ning hangge hetûn de lei, ning peireige a lumpum wangchang gu lei; ning telungtak luigum ze ningchu I ne samram gai gu lei, ning dage ngaukatenetbe luilung tak leine ziegene ning peireige I ne tewsâ gu lei.

⁴Zai a mik ne ningchu ’nzâ ra mak lei, zai ningchu ngau’nggia ra mak lei; ning telungtak luigum ze ning peireige tew gai gu lei, ning gu ngaukatenetbe ramme ning peireige kêu gai gu lei, I ze Tingwang lei be ningnui chî gu lei.

⁵“Tingwang HERA ne acheu ze rang lei, pie le lau, mi duânggabe ne mi duânggabe wang mui de lei.

⁶Hetûn wang mui de lei, Hetûn wang mui de lei; chize ning peireige zuachu mui de lei; pie le lau, chize wang mui de lei.

⁷Hei, nang heram ge lungpeu gau, ningchu tew’nsia ra ning peireige wang mui de lei, beting wang mui de lei, kakeleube naimikpui wang’nna mui da, keloa kedibe peireige hesuiyi’nta ze ’nrunggaibe kuâ mak zeu.

⁸Chunage a lumpumbe ning peireige ruî gai kelua gu lei, ningnui peireige a râtabe gechim gai gu lei; zai nang kebambe tak gum ze ning peireige I samram gai gu lei, ngaukatenetbe tâ nang tewgaibe ziegene ning peireige peiruî gai dai gu lei.

⁹Zai a mik ne ningchu ’nzâ ra mak lei, ning peireige I ngauka’nggiabe bam ra mak lei, nang kebambe tak luigum ze ning peireige peiruî gai gu lei, zai ning dage ngaukatenetbe tâ tew ze bambe luage zeu; chidezai I Tingwang ne tewsâ lei be ningnui chî gu lei.

¹⁰“Pie le lau, chipau mai zeu! Ni, chize wang mui de lei, ningchu tew’nsiarabe pat mui de lei, ’nzeimakbe pat mui da, kechî-keditewbe besûne tumpat mui de lei.

¹¹Lungkatîmphibe â helungriaksiabe gu hetui chang di de lei; penui je mi-mi je de ’nsak kai ra mak, penui kelakyibe du bam ra mak, penui heurâ du bam ra mak, zai chige mi-mige du pengêudibe kau du penui ruage bam ra mak lei.

¹²Beting wang mui de lei, chipau mai ze wang’nna mui de lei. Keluime je du peize penui suiyi so, zai kezuame je du peize penui lung hereu se lau; pe lumpumbe â haimena peireige la daseu.

¹³Kezuame ringbe ting ge penui gu merua zuagaibe pemî ngau dai ra mak lei, pe lumpumbe â haimena hangge chang daseu; mi-mige du helatwang dai ra mak, penui keringbe ting ge mi-mige de tâ-kesiabe tewme penui ranchi ne ringsua ra mak lei.

¹⁴“Hegeîluîkie penui ne ’mmut kai lu ze haimena ne kedâkua lei, kane mige du herei ra tat mak lei; a lumpumbe ze haimena peireige la daseu.

¹⁵“Hela ge hiazutkie de lei, zai pelung ge herarît benai herakûm de lei. Keloa hela ge bambe kau â, hiazutkie gene pa chai gu lei, zai mi-mige namdi ge bambe kau â, herarît benai herakûm gene chai gu lei.

¹⁶Kane pak’nreipatlume â penui pat lu ze bechuak gu temaune ramme gum ze peloa ramme ge bam gu lei; penui tâ-kesiabe tewbe ziegene penui hap ze bam gu lei.

¹⁷Heba ramme leine pejiesia du, hekuk ramme leine kelip tu lei.

¹⁸Meseigiria paî ne penui neu gu, zai penui hing ze kedun gu lei, penui peî gut ’ndu, zai penui ’ngngam-desang ze bam gu lei.

¹⁹Zai ’mpuîrikki ramme ge penui gu gepût tuâpat kai gu lei, zai penui gu gechâk ze lugailak ze tuâpat ku lei; penui gu gepût benai gechâk ne Tingwang lumpum mai ge penui je meupatchi lak lei; zai chize ne penui teu’nggeuchi lak lei, zai penui bungpui tewpuichi lak lei. Chize â penui tâ-kesiatewbe ziegene ’nrap lu kau ra changbe ziegeneu.

²⁰Penui paîni peluiyibe ne penui ’nrîmyi ze bam di lei; mi ngaukatenetbe heraluîtewbe benai mâ-ngaukaheteîbe ze penui dam hang de lei: Chipauziegene ngaukaheteîbe ze penui hangge I tew gai de lei.

²¹Zai chize nupteu ra hesanggme heram kêdame ba ge I ne pei gai gu lei, zai kedeirei ge helungriaksiame dage chize hereichâ hangge I pei gai gu lei; penui ne chize tewhebâ gai gu lei.

²²Penui dagene a ju kelik tu lei, zai a gu pebâm ka’nchibe penui ne tewhebâ gu lei; hegasut-teume ne chige gut ze tewhebâ gu lei,

²³chize sâuhammuî gai gu lei, “Heram ge hejai tewpat ze hetû-hera ne puigit ze bam, zai namdi lungge katîmphibe ne pui ze bambe ziegene,

²⁴hezat sialangme je I nguawang gu lei, zai penui ki ramme penui ne lu gu lei; penui ranchi je ’nning’ndi ze kedikuâ-kuabe I ne tew’ntau ’ndu lei, zai penui gu pebâm ka’nchibe hebâ gai du lei.

²⁵Mi duânggabe wang dezai lunghegeikatenaibe penui peu gu lei, kane mâtew-tewsedu ngau ra mak lei.

²⁶Pausiaka’nteube peireige pausiabe wang gu lei, ’nchoâsam peireige ’nchoâsam wang gu lei, kemeu’mpeu dagene keliâbe penui ’mmêt ku lei; kane tingkupeu dage hingde du ga de lei, zai gechîngme dage mâ-geteiliabe hang du ga de lei.

²⁷Heguang pe duângga gu zai besuitewpeu lungkahereube paî bâ ze pa bam gu lei, zai baudime ba du kedun gu lei, penui telung luigum ze penui peireige I tâtew gai gu lei, zai penui tatew luigum ze penui peireige I samram gai gu lei; dezai I ze Tingwang de lei be penui chi gu lei,” ze kacheu de lei.