Read Zeme Naga EZEKIEL 8 Bible Online

EZEKIEL 8 - Zeme Naga bible

EZEKIEL 8

¹Zai acheu lage tingkum seruk, hekêu seruk chipau kêu gu hezie mengeu mai ge Judame gechîngme a suage ’ntau ze bamme je a ki ge I ngua’ntaubambe luage chige Tingwang HERA ba a peireige wang de lei.

²Chidadege I pie gai de lei, pie le lau, chize ziemmena luigum lei, pe kia luigum ze ngaube gene ’ngkang ’mbe â hemi lei, zai pe kia gene ’nrei ’mbe â ngaube ge pa’mbi peling ze hetageî gum lei.

³Zai mi ba luigum ze getuapat lu, a timduî gene achu tei lu ze, tinggîm benai kedei kakge Herui ne teichu de lei; Hera gu keliâbe gene Jerusalem ge achu teichu gai bei de lei. Jerusalem gene tingpeî keriekemui lung ’mbe achu nguagutchang di de lei; chige hemimeube rapeu luî tewbe kai lei, chize ne hemimeube hangge tew’mpum gai ze bam lei.

⁴Pie le lau, Israelme Rapeu ngeudibe peningkâm ge I ngaube gum ze chige la lei.

⁵Dadege pa ne achu, “Ziemmena na gau, tingpeî ’mbia ’nsua lu ze ning mik heguapiechu gai ni lau,” ze kacheu de lei. Chidadege tingpeî ’mbia ’nsua lu ze, a mik heguapiechu gai de lei, zai pie le lau, tingpeî ’mbia herâtewbe bâm keriekemui gutbe ge hemimeube gu heraluîtewbe bam lei.

⁶Zai pa ne rangsua dai ze, achu, “Ziemmena na gau, ’ndaikau tâ tew mei be nang ngau mei? Israelbe kiduîme ne ngautenet-kadesangbe tâ aige penui tewgaibe, a gu heki ka’nchibe gene kedeu ’mbe I tat te ra penui ne tewgaibe ngau mei? Ai sua kêdabe kedibe ngaukatenetbe nang ngau gu rei lei,” ze kacheu de lei.

⁷Dadege pa ne teririe lung gutbe kemui ’mbe achu nguagut kai bei, zai I pie gai dege ’mbie ge bekiputbe achu teilia lei.

⁸Dadege pa ne achu, “Ziemmena na gau, ’mbie ze kui gai lau,” ze kacheu de lei, zai ’mbie ze I kui gai dege kemuiki chige laleu lei.

⁹Zai pa ne achu, “Gutchu lau, aige tâsiabe ngaukatenetbe penui tewbe nang pie gai ni lau,” ze kacheu de lei.

¹⁰Dadege I gut lu ze chige I pie gai de lei, mârekaune liaruabe zat ramme luî rawgaibe ramme, hekaune ngaukatenetbe luî ramme, zai Israelbe kiduîme gu heraluîtewbe ramme ’mbie ge ’nritkaibe bam de lei.

¹¹Chige Israelbe kiduîme ruage gechîngme ziemmena riaksena penui suage sapbam de lei, zai penui ruage Shaphanbe na Ja-azaniabe sapbam de lei, penui ’nteumena ne mâkuak tei lu ze bam de lei, dadege perîmyibe rube mika ne kalui-lui chu de lei.

¹²Chidadege pa ne achu, “Ziemmena na gau, Israelbe kiduîme gechîngme bau kemuîbe kangge tâtewbe nang ngau mei? Penui ’nteumena ne heraluîtewbe kisîam ge kellum la lei. Penui ne, ‘Tingwang â anui je ngau mak, Tingwang ne heram ze sâu gai ’nde lei,’ ze kacheu daseu,” ze kacheu de lei.

¹³Zai pa ne achu, “Penui tâtewbe chi suane â ngautenet ka’nteube nang ngau ra lamui rei lei,” ze kacheu de lei.

¹⁴Chidadege â pa ne tingpeî ’mbia Tingwang ki gu keriekemui ge nguawang gai bei de lei; zai pie le lau, chige ’mpuimi ramme, Tammuz je huî ze penui hap ze ’ntau bam lei.

¹⁵Chidadege â pa ne achu, “Hei, ziemmena na gau, aize nang ngau mei? ’Nreiwang ze pie gai ni lau, airamme sua â ngaukatenetbe nang ngau gu rei lei,” ze kacheu de lei.

¹⁶Chidadege Tingwang ki gu teririe lung ’mbe pa ne achu nguagut lu, pie le lau, Tingwang ki gu ka’nchibe kemuikegup benai herâtewbe bâm kakge ziemmena hang’ngkai ze mengeu Tingwang gu kellumki ’mbia penui chai ’nrik lu, naimikpat ’mbia penui ju ’nsua lu ze, naimik je penui kellum bam lei.

¹⁷Chidadege pa ne achu, “Aize nang ngau mei, Hei ziemmena na gau? Penui ne ngaukatenetbe tâ tewbe, aige penui tewbe ze Judabe kiduîme hangge mâ-gecheîne mei? Penui ne heram lungge katîmphibe ne tewpuigit kai ’nde lei; chidadege penui ne a lumpum tewgaisua de lei. Ni, penui nêu tenûngbuâ ne penui teisung la lei.

¹⁸Chidadege I du a rata tewlia gu lei; a mik ne penui je I ngaumau ra mak lei, penui je I ngau’nggia ra mak lei; hekuâ’nrung’nchi ze a kun ge penui ’nrung gai sedu I ’ngking ra mak lei,” ze kacheu de lei.