Read Zeme Naga EZEKIEL 9 Bible Online

EZEKIEL 9 - Zeme Naga bible

EZEKIEL 9

¹Chidadege Hera ne ’nrung’nchi ze sagaibe kuâ a kun ne I seu de lei, “Namdi reîme hekie, hengeu tei lu ze ziemmena ’nteumena wang’nna lau,” ze acheu zeu.

²Pie le lau, tingpeî ’mbia keriekemui gutbe gene ziemmena hangseruk gut te lei, penui ’nteumena ne hekie, hengeu, penui tei lu ze wang de lei; zai penui ruage hangkat â linen paî bâ lu, leisiduibung pa ne tei lu ze, penui herâtewbe-kaira hiage penui sapbam de lei.

³Zai Israelme Rapeu ngeudibe ze kerubme bambe gene chu ze kerie’mbang hia sireba bam lei; zai linen paî bâ lu ze leisiduibung teipeu je pa ne kû gai de lei.

⁴Zai Tingwang ne pechu, “Namdi zuilung tatpela ze Jerusalem zuilung tatruatuipik kai lau; zai chige ngaukatenetbe tewbeibe ziegene penui duângga ze hapme telie ge ka’nchetbe pei gai lau,” ze acheu bei de lei.

⁵Zai kêdame je I seube gene salia ze, “Pe chai suitat ze namdi tatruatuipik kai lau, zai tewchat zu lau, ningnui mik ne ngaupai so, zai mâ de ka’nggiabe tew se lau.

⁶Gechîngme, rehangme, zai heleume, zai napoine ramme benai penui pui je tewchat kam ne lau; kane penui telie ge ’nchetkailume taige wang’nna se lau; a gu ka’nchibe bâm gene ningnui tatchu lau,” ze kacheu de lei. Chidadege kellumki suage gechîngme bambe gene putchu de lei.

⁷Dadege pa ne penui je, “Kellumki tewhebâ ne lau, zai pelung ge kechaipum ramme tuâpuigit kai lu ze ningnui pat te lau,” acheu bei de lei. Zai chigene penui pat lu namdi lungge ziemmena ramme je penui ne tewchat te lei.

⁸Zai acheu lage namdi ge ziemmena ramme je penui ne tewchatbe luage a runne chige bam di de lei, a runne kâukeu lu, kedei’mbia a ju ’ngkum lu, “Hei Tingwang HERA gau, Jerusalem peireige ning râta-desang di ze Israelme ruage ’nsakpatme je tew’ngga kam ra de mei?” acheu sa ze I ka’nrung de lei.

⁹Chidadege pa ne achu, “Israelbe kiduîme benai Judabe kiduîme ne tâ-kesiabe tew’ndibe misongga la lei. Heram lungge hejai tewpatbe puigit la da, zai namdi lungge pelingtewmakbe ne puigit ze bam di de lei; zai penui ne ‘Heram je Tingwang ne sâu ’nde lei, zai Tingwang ne mâ de ngau me lei,’ ze kacheube ziegeneu.

¹⁰Zai I ne du a mik ne ngaupai ra mak, zai ngauka’nggiabe du bam ra mak lei; kane penui tâ-kesiabe tewbe mî ze penui peireige peiruî gai gu lei,” ze kacheu de lei.

¹¹Zai pie le lau, linen paî bâ lu leisi duibung teipeu ne Tingwang je, “Nang ne samdiegaibe luigum ze I tew lu de lei,” ze acheu bei lei.