Read Zeme Naga DANIEL 10 Bible Online

DANIEL 10 - Zeme Naga bible

DANIEL 10

¹Persia gu heguang Sirabe ne kaheguangbe pakechumbe kum ge Danielbe, pe ji Belteshazzarbe kacheupeu dage sam lia de lei; zai chipau sam ze â peling zai tewkakeleube kedibe ruage kat te lei, kane chipau sam pa ’nningchi zai keliâbe ge pa ne gechîbe la lei.

²Chipau ting ge I Danielbe ’ntakkak kechum sing ze desui ze bam de lei.

³Mâ-teuyibe hetak I teu mak, hemei mei zai wain mei du a muiki ge gut mak ze ’ntakkak kechum chang mak tâne taudui du ’nnuk mak ze bam de lei.

⁴Railangbe kêu hezie ’ngkai ze medai ge ’nggeuki kedibe Tigris kung ge I sapbambe luage,

⁵I ’ngngangchu ze pie gai dege, ni, hangkat linenpaî bâ lu, pe kia ge Uphaz gechâk ka’nchibe ne kak kai lu bam lei;

⁶zai pe pum â beril chu gum, zai pe ju â tingkepitbakpatbe gum, zai pe mik â keleu tauben bambe gum, zai pe ba benai pe pî â kangngâgeî chiamplinglube gum, zai pa samsabe kuâ ramme â baudime kuâ gum lei.

⁷Chi keliâbe ze I Danielbe runne ngau de lei, a dage bamme â keliâbe penui ngau mak lei, kane penui hing-desang di ze pak’mbai kam di de lei.

⁸Chidadege I a runne bam laleu de lei, keliâbe pengêudi-kadesangbe I ngau lu, a rantew ta di de lei; a ju riâ yibe du hâmmuî bam di de lei, mâ de a rantew ta di de lei.

⁹Acheusedu pa ne samsabe kuâ I seu de lei, pa samsabe kuâ I seu lu dege I ’ngkumkeu lu kedei ge a ju ’nsua lu I keikeu di de lei.

¹⁰Pie le lau, achu pe ba ne deî gai bei dege, a kuk benai a ba kedun di de lei.

¹¹Zai pa ne achu, “Hei Daniel, Hera ne ningchu hung-desang la lei, ningchu sam I saliabe chî le lau, sap’ndisi gai lau; ning dage achu lang gai bei de lei,” ze kacheu de lei. Dadege aipau sam pa sa kam gai dege I kedun ze sapchu de lei.

¹²Zai pa ne achu, “Daniel hing se lau, ning Rapeu suage nang kecheiluilung pung ra, zai mâ-’nningchi ra ning lung peigaibe mai gene seu ze ning sam ramme ’ngking lamui lei, ning sam ziegene ning dage I wang de lei.

¹³Persiaram gu heguangsinpeu ne achu hezie ’ngkai ze kat deî’nam de lei; kane pie le lau, angelme ruage besuitewpeu, Mikaelbe ne achu ’ngngâ ra wang de lei; chidadege Persiaram heguang dage I bam di de lei.

¹⁴Bechâng dezai ning gu ziemmena peireige mâ-mâ wangchangrabe nang ’nningchi le ra chuna I wang de lei; keliâbe â bechâng dezai wang gu lei,” ze kacheu de lei.

¹⁵Zai aipau sam ramme pa ne a dage sa bambe luage kedei ’mbe a ju ’ngkum lu ze sam sa mak ze I bam di de lei.

¹⁶Zai pie le lau, hangkat ziemmena na luigum ze a mui deî gai lei; dadege a mui ’ngngapat lu sam sa de lei. A suage sappeu je, “A wang gau, keliâbe ziegene a lung kahereube ne achu duî ’nde lei, mâ de a rantew ta di de lei.

¹⁷A wangpeu guâ ka’ngguapeu ne a pau je ’ndaigum ze ’mpauchi ra lau? A ran mâ de ga da, a chui du lupuilak te lei,” ze I kacheu de lei.

¹⁸Dadege ziemmena luigum bambepeu wang dai lu achu deî gai de lei, zai pa ne a ran tew’nchi gai bei de lei.

¹⁹Dadege achu, “Hei ziemmena gau, Hera ne ningchu hung-desang la lei, hing se lau, nang lunghegeitenai ze bam lau; ning ranchi ze kuu ze bam lau,” ze kacheu de lei. Zai achu pa ne acheu sa bei dege, I a ranchi di de lei. Dadege I ne, “A wang ne sam sa gai lau; nang ne a ran tew’nchi gai bei daseu,” ze I kacheu de lei.

²⁰Dadege pa ne achu, “’Ndaitew ra ning dage I wang mei be chî mei? Chunage Persiaram heguangsinpeu je ’nggi ra I tat dai gu lei; zai I zuapat ti dezai, pie le lau, Gresiaram gu heguangsinpeu wang gu lei.

²¹Kane samsang leisikuak ge ’ndaikau raw gai mei I ranglia gu lei: Aipau ramme deu ge mi-mi ne du achu ’ngngârabe kau ’ngga lei, ningnui gu heguangsinpeu Mikaelbe runne lei.