Read Zeme Naga DANIEL 4 Bible Online

DANIEL 4 - Zeme Naga bible

DANIEL 4

¹Heguang Nebukadnezzarbe ne ziemmena leine, pedeime leine, zai kedeirei ge helad zat leine dage sam rang gai de lei: Ningnui peireige desieyibe pung-ze-sa ze peize bam lau.

²Hulangbe Hera ne achu mâ-mâ mi ningdaulakbe tâ ramme teiliabe ralia ra yi lei, ze I ’nning gai lei.

³Pa ne mâ-mâ teiliabe ramme pengêudi-desang, zai ningdaulak-desang lei! Pe gu Heguangram â, betunmakbe heguangram lei, pe gu samrambe â, reheipiakeu tâne bam bam gu lei.

⁴I Nebukadnezzarbe â a ki ge temichai ze bam de lei, zai a gu heguang-bamrak ge a ngeudi ze bam lei.

⁵Hemang mi kehingbe mang ka’mmi de lei; a jeî ge I ka’nningbe benai a peî ge keliâbe ngaube ne achu tewhingrim gai bei de lei.

⁶Chipauziegene Babilon ge ziemmena kaningchingme leine a suage wang ra, zai a mang rimba ranglia ra samdie gai bei de lei.

⁷Dadege kahekame, kaningchingme, Kaldiame, zai hepaudapieme wang de lei; zai a mang penui je salia bei de lei, kane hemang rimba penui ne achu rangliachi lak tai de lei.

⁸Nâlangbe ge Danielbe a dage wang de lei, a rapeu ji gum pungpeu, pe ji, Belteshazzarbe, pe dage ka’nchibe hera ramme gu herui bampeu je a mang salia de lei;

⁹“Hei Belteshazzarbe, kahekame ruage dilangpeu gau, ning dage ka ’nchibe hera ramme gu herui bam bei dadege mâ- ’nningchanglakbe tâ ramme tew ra ning hangge â mâ de hung mak lei be I chîlube ziegene aige I ne a mangkammibe la de lei; chize sakeligaibe tak ze achu ranglia gai lau.

¹⁰I jei bambe luage keliâbe ze aigum lei; pie le lau, kedeirei zuilung ge hingbang kedibe, pehut du hu-sang-hu ze I ngau de lei.

¹¹Hingbang chîngchu ze peranchi bam di de lei, zai peroî ze ting tûnghi bam di de lei, zai kedeirei ge bamme leine ne chi hingbang je ngau kam lei.

¹²Peneu ramme yi-desang zai pechî du kie-desang lei, chige haimena teu ra bam lei; hekaune ramme pe gu kezui ge ’nseu ra ngau lu lei, ’nruine liamruabe ramme bekeî ramme ge tâujei lei, zai hemeipum keringbe leine je pa ne guî ze bam de lei.

¹³“A jeî ge I jeibe luage keliâbe I ngau de lei, pie le lau, tinggîm ’mbene kereîpeu ka’nchipeu wangkeu de lei.

¹⁴Perankai ’nrung ze acheu sa ze, ‘Hingbang kuîkau lu bekeî ramme duatua ne lau, zai peneu ramme ’nzuttuâ ne, zai pechî ramme â ’nrukrarip ne lau, zai bekang gene hekaune ramme peize tat kam de lau, zai ’nruine liamruabe ramme du bekeî ramme gene peize liamtat kam de lau.

¹⁵Kane hingbang mui â kedei ge sâudiak kai be lau, hegeî benai kangngâgeî ne tewbe hegeîria ne timpei ka’nchiapbe zeu ning ge kei gai be lau; zai tinggîm kezikdui ne tewchim gai be lau, pe damrabe â hekaune ruage kedei gu timpeizeu ge peize bam lau;

¹⁶zai pe lung â ziemmena lung tak gene peize tewkeli ne lau, pe dage hekaune lung tak peize pung de lau; zai pe peireige tingkum sena peize wangchang de lau.

¹⁷Aipau tâwangchangbe ze kereîpeu gu samde lei, zai ka’nnangbe tâ ze â ka’nchibe gu sam ne chang lei; Hulangbe ne ziemmena kaheguangbe peireige samram ze la lei, pe suî’nning ne pa ne peineime je pei, zai nâlangbe ge du teichugaichi duî lei be keringme leine ne chî le lau,’ ze sa gai de lei.

¹⁸Aipau hemang ze I Nebukadnezzarbe ngau de lei, nang Hei Belteshazzar, parimba ze achu ranglia gai zu lau. A gu heguangram lungge kaningchingme leine ne parimba ze achu rangliachi ta di de lei; kane nang â chî dui lei, nang ge ka’nchibe hera ramme gu herui la daseu,” ze acheu zeu.

¹⁹Chidadege Danielbe pe ji, Belteshazzarbe ze kûbepeu, luakat â pe duângga di de lei, pa ka’nningbe ne pechu tewrîn ’ndi de lei. Heguang ne pechu, “Belteshazzar, hemang benai parimba rangliarabe ne ning lung tewhereu se lau,” ze kacheu de lei. Belteshazzarbe ne pechu, “A wang gau, hemang ze ningchu hemimeume hang peize chang de lau, zai parimba rangliabe ze ning teureime hang peize chang de lau.

²⁰Hingbang nang ngaube chîngchu ze hubi-bi ze ting tûnghi bam di de lei, kedeirei ge haimena ne ngau kam de lei,

²¹zai peneu ramme ngauyi-desang, zai pechî du kie-desang lei, chige haimena teu ra ngau lu lei; zai hekaune ramme pa kezuikang ge bam, zai ’nruine liamruabe ramme bekeî ramme ge tâujei lei.

²²Hei heguang, chize nang de lei; nang ze dichu da, zai ning ranchi, zai ning ngeudibi-bi ze ting tûnghi ze bam di de lei, zai nang kaheguangbe ze tingmik leine chang di de lei.

²³Zai tinggîm gene kereîpeu zai ka’nchipeu wangkeube pa ngau de lei; zai pa ne sa ze, ‘Hingbang kuîkau lu tew’nsia ne lau, kane pe mui â hegeî benai kangngâgeî ria ne keî lu ze timpei buanung bambe ge sâudiak kai be lau, zai tinggîm kezikdui pe peireige peize keu gai lau, zai pe damrabe â hekaune ruage peningkâm ge tingkum sena chang mak tâne peize bam lau,’ kacheube ze,

²⁴parimba rangliabe ze â aize de lei, Hei heguang gau, Hulangpeu gu samde ze a wangpeu heguang peireige wangchang de lei;

²⁵ziemmena ruagene ningchu kelipat kû, zai peningkâm gu hekaune ramme ruage ze ning bam chang ze bam gu lei, getum gum ze timpei teu ra ning chu tew gai gu lei, zai tinggîm kezikdui ne ningchu tewchim gu, zai Hulangpeu ne ziemmena gu heguangram peireige pa ne samram ze bam lei be, zai pa ne chize pei nei-neime peireige pei gai lei be nang chî mak tâne tingkum sena bam gu lei.

²⁶Hîngmui ze kedei ge sâudiak kai ra sam diegaibe luigum ze tinggîm gene samram lei be nang chipatbe mai gene seu ze ning hangge ning sam ze mautaluisui bam du de lei.

²⁷Chidaze Hei heguang gau, Hei I ne laddeitewbe sam lu gai lau, hemui tâ tewbe sâu lu, tâ peling tew lau, nang tâ-kesiabe tewbe kelei ge kelaksiame peireige hungka’nggiabe tâ tew gai lau; dezai nang temi ze ning hang yi gu lei,” ze acheu bei de lei.

²⁸Airamme heguang Nebukadnezzarbe peireige wangchang di de lei.

²⁹Kêu kereu ze kena kam dege Babilonram gu heguang kisîam kehube ge heguang â tatrua bam di de lei.

³⁰Heguang ne, “Ai Babilon pengêudibe ze a ranchi ne heguang bamrabe bâm hang zai heguang ngeu-tew’ndi ra, zai peluiyi ra I ne tew gai mak ti lau?” ze pa kacheu de lei

³¹Aipau sam ze heguang mui gene sapat ra tew gai dege, tinggîm ’mbene sam wangkeu ze, “Hei heguang Nebukadnezzar, ning dage sam wangkeu mui de lei: Heguangram ze ning dagene rimna de lei.

³²Ziemmena dagene ningchu kelipat kai gu de lei, nang bamrabe bâm â hekaune ruage nang bam gu lei; kum sena chang mak tâne getum je gum ze timpei teu ra ningchu pei gu lei, Hulangpeu ne ziemmena gu heguangram peireige pa ne samram bam lei be, zai pa ne chize pei nei-neime dage pei gai lei be nang chî mak tâne tingkum sena bam gu lei,” ze kacheu de lei.

³³Chipau luage airamme Nebukadnezzarbe peireige wangchang di de lei, ziemmename ruagene pechu kelipat kai bei ze bam de lei, getum gum ze timpei pa teu di de lei, zai tinggîm gu kezikdui ne pe pum tewchim ze bam de lei, zai pe peîtam ramme keliengdi kan ramme gum buapat ti de lei, zai pa’nchîn ramme ’nruine pî’nchîn gum chang demak tânai.

³⁴Hezie ’nsang gai dege I Nebukadnezzarbe a mik rakpat lu ze tinggîm ’mbe I piechu de lei, I gechîbe a dage wangchang kadai de lei, Hulangpeu je I toa de lei; betingbeta ring ze bampeu je I toa ze pe ngeutew de lei, pa samrambe â, rehei leine peireige samram ze bam lei, zai pe gu heguangram â rehei gene rehei bam daseu;

³⁵zai kedeirei ge kelungme leine je mâ-hangge du chak kai mak lei; zai tinggîm hereikangme ruage, zai kedeirei ge kelungme leine pe suî’nning gene bam lei, mi-mige ne du pe ba dei’ntauchi lak lei, zai pechu, “Nang ’ndaikau tew lau,” ze du sachi lak lei.

³⁶Chipau lua sing ge I gechîbe a dage wang dai di de lei; zai I kaheguangberam ngeutew’ndi ra, a ngeudirabe benai peluiyibe a dage wang kadai de lei; zai a gu kaladdeime benai a gu heguangsinme a dage penui zuawang de lei; zai I kaheguangbe ramme ze tew’ntip kai lu ze hengêutewbe kedibe a dage peisuâ gai bei de lei.

³⁷Dadege I Nebukadnezzarbe ne tinggîm gu heguang je toa de lei, pe luntew ze pengêutew de lei; zai pe tatew leine gesang lei, zai pe gu ’mpuî leine ’nzei lei; gechîrettewme je â pa ne tew’ncheikeuchi duî lei.