Read Zeme Naga DANIEL 6 Bible Online

DANIEL 6 - Zeme Naga bible

DANIEL 6

¹Heguang Dariabe ne heguangram ge samram ra, hereikang saibe ramme haî kat ze ’ngkai bam ra yi lei ze kai de lei.

²Zai penui peireige haî peîteime hangchum bam ra, zai penui ruage Danielbe ne dilangbe chang ra, dezai Dariabe hangge mâ de kesiabe bam mak ra, hereikang saibe ramme mâ-mâ sam ’nning ra penui dage pei gai lei.

³Danielbe â helung yi’ngkeukiabeibe ziegene haî peîteime benai hereikang saibe ramme suadu ’ntûlieng di de lei; chipauziegene heguangram leine peireige kai ra heguang ne lunei lei.

⁴Chidadege haî peîteime benai hereikang saibe ramme ne heguangram deu ge Danielbe peireige pedâuyibe penui peu de lei; kane pemâu-pemiê penui ngauchi lak lei; pa â lungsangtew dadege mâ-tewmaube ka’ngkuibe penui ngau mak lei.

⁵Dadege chime ne sa ze, “Pe Rapeu gu hingde deu gene makchai â, Danielbe je kesia’ndamgairabe chui anui ngaupat lak lei,” ze kacheu lei.

⁶Chidadege haî peîteime benai hereikang saibe ramme heguang dage penui wangka’ndui de lei, zai penui ne acheu sa ze, “Heguang Dariabe, betingbeta peize ring bam lau.

⁷Heguangram gu haî peîteime, saibe ramme, zai laddeitewme benai pemuipuame ’nteumena ne hedei gai ze, hezie himreu lungge heguang gu heraluî tewgaibe je runne kellum ra, kêdabe hera mei nune ziemmena mei dage gekietewgaime je â duilui ki ge tuâ gai ra zai namgit ne ra heguang ne hingde kai’ntiprip kai ra anui ’nteumena ne hezuâ gai de lei.

⁸Hei heguang gau, nambe leisi tew’ntip kai zai rawgaibe leisikûm ge heji raw gai zu lau, Medesme benai Persiame gu hingde kelidaimakbe gum ze keli dai mak ra hangge zeu,” ze kacheu de lei.

⁹Chidadege Heguang Dariabe ne rawgaibe leisikûm benai nambe leisi ge heji raw gai de lei.

¹⁰Zai rawgaibe leisikûm ge heji raw gai ’ndi de lei be Danielbe chî lu dege pe ki Jerusalem ’mbia leubaki putka’nrikbe sîam ’mbe gut ti de lei zai besua’ngka pa tewbe luigum ze mai kat ge luachum kukdungkeu lu kellum ze pe Rapeu dage pe suiyibe pau gai de lei.

¹¹Chidadege aime ziemmena wangherua lu, Danielbe â pe Rapeu dage gekietew ze kakellumbe penui ngau lu de lei.

¹²Dadege heguang taige penui wang’nna lu, pechu heguang ne namgaibe leisi sam penui salia de lei, “Hezie himreu lungge, Hei heguang ning dage runne zangno, hera mei nune ziemmena dage mei ze gekietewme je â duilui ki ge tuâ gai ra lei, ze nambe leisi ge heji raw gai ’ndi de mak ti lau?” ze penui ne kacheu de lei. Heguang ne, “Chize gesang lei, Medes benai Persia gu hingde â mâtew-tewsedu tewkeli lak lei,” ze acheu samkak te lei.

¹³Chidadege heguang je penui ne samkak ze, “Juda kebangtewme name ruage hangkat Danielbe â ningchu mâ-hangge du ’nning gai mak la lei, Hei heguang ning gu nambe leisi ge heji rawgaibe ze mâ-hangge du ’nning gai mak lei; mai kat ge luachum pa gekietew ze la lei,” ze heguang je kacheu de lei.

¹⁴Dadege heguang aipau sam seu lu ze pe lunggailak-desang di de lei, Danielbe je ’nripat ra pe lung ge ning bam de lei, naimik kêu makge ’nripat kai ra pa tew de lei.

¹⁵Dadege aime ziemmena ramme heguang suage wangherua lu, heguang je penui ne, “Hei heguang, Medesme benai Persiame gu hingde ze nambe leisi mei nu hingde rawgai’ndibe mei ze heguang ne tew’ntipkai’ndibe ze â kelidaichi lak lei,” ze acheu bei de lei.

¹⁶Chidadege heguang ne samdie gai bei de lei, zai penui ne Danielbe je teipat lu, duilui ki ge penui ne tuâ gai ’ndi de lei. Heguang ne Danielbe je, “Ning Rapeu, pe gua nang ’ngguabampeu ne peize ningchu meupat kai be lau,” ze kacheu de lei.

¹⁷Tingchukâng teiwang lu mâ-kuiki kemui ge kainam gai ’ndi de lei; zai Danielbe deu ge mâ de tewkelidaichi lak ra heguang ne pe gu baroine sing ne, zai pe gu ziemmena kedime gu baroine ne tau gai ze ’nchet kai de lei.

¹⁸Dadege heguang pe ki lam wang lu, mui teseu rei ze bamtingba gai lei; zai pe suî’ntapat lak, zai jeikeu lak ze bam de lei.

¹⁹Dadege hechuasûn ge chu lu ze kelua ze duilui ki ’mbe pa tat ti de lei.

²⁰Duilui ki Danielbe bambe bâm ’mbe pa wang dege, huaipun ze ’nrung ze Danielbe je, “Hei Daniel, Hera keringbe gu kebang gau, ning Rapeu pe gua nang ’ngguabampeu ne duilui ramme dagene ningchu meupatchi lu mei?” ze kacheu de lei.

²¹Danielbe ne heguang je, “Hei heguang gau, betingbeta peize ring bam lau!

²²A Rapeu ne pe gu tinggîm angelme je lang gai bei ze duilui ramme muiki gekapnam nan ze achu mâ de tew’nteu me lei; pa mikngau ge I a mâu ga lei; zai ning peireige du hei, heguang gau, I kesiatewbe ga lei,” ze acheu bei de lei.

²³Chidadege â heguang pe suiyi-desang di de lei, Danielbe je duilui ki gene lupat ra samdie gai bei de lei. Chidadege â duilui ki gene Danielbe je lupat te lei, pechu tewjâmgaibe mâ de ga lei, pe Rapeu je pa ’nnumka’mmibe ziegeneu.

²⁴Zai heguang ne samdie gai bei ze, Danielbe je kesia ’ndamgaime je nguapat lu ze penui benai penui nâu-name je duilui ki ge tuâ gai ’ndi de lei; pe ki sîng kedei wangkeuchang mak ze, duilui ramme ne penui je ’ngkîkedui ze penui ra ramme ’ngkîbatdesuirui ’ndi de lei.

²⁵Dadege heguang Dariabe ne ziemmena ’nteumena hang, pedeime leine hang, zai helad gechâm leine kedeirei ge bambe leine hang leisi raw gai de lei: “Ningnui dage lunghegeikatenaibe pung-ze-sa ze peize bam lau.

²⁶A gu heguangram pebâm leine Danielbe Rapeu je hing ze kedun zu lau, ze samde tew gai de lei. Pa â keringbe Rapeu lei, betingbeta keli dai ra mak, zai pa kaheguangberam ze sia dai ra mak, zai pa kaheguangbe du betun mak ze bam gu lei.

²⁷Pa ne meupat zai pa ne ’nripat kai bei lei; ting-kedei ge ka’nchetbe, tâningdaulakbe pa ne tewlia lei, duilui ramme ranchi gene Danielbe je ’nripatkaipeu jeu,” ze acheu zeu.

²⁸Chidadege Danielbe â Dariabe ne heguang changbe ting ge benai Persia’mpeu Sirabe ne heguang changbe ting ge pung-ze-sa ze bam lei.