Read Zeme Naga DANIEL 7 Bible Online

DANIEL 7 - Zeme Naga bible

DANIEL 7

¹Babilon gu heguang Belshazzarbe heguangchuraibe tingkum ge Danielbe keliâbe ngau de lei, pe jeî ge pa jeibe luage keliâbe pa ngau de lei; dadege pe mang pa raw de lei, zai mâ-betâudibe ramme ranglia de lei.

²Danielbe ne acheu sa ze, “Tingmuî ge keliâbe I ngau lei, zai pie le lau, tingmik medai gu tingkai sungkling pengêudibe peireige guiwang de lei.

³Zai sungkling gene hekaune kedibe medai, kat-kat je mâ de ’nzuâ mak ze penui pat te lei.

⁴Railangbe â duilui luigum ze keliengdi kan pung lei; pe kan ramme ’ngkeîpat mak tâne I pie bam lei, kedei gene pechu teichu gai lu, ziemmena gum ze pe pî kena ne sap ra tew gai bei de lei, zai ziemmena lung tak pechu pei bei de lei.

⁵Zai pie le lau, hekaune kêdabe pakenabe â hegum luigum lei, zai pe pî ne sap lu, zai pe mui ge peturapak kechum pe geu ne ’ngkam lu bam lei. Pechu, ‘Chu lu hemei teu’ngkie le lau,’ ze acheu rang gai lei.

⁶Chipau chângge I pie lage, kêdabe keriakau luigum ze pe ching ge ’nruine kan medai pung lei, zai chi hekaune peî â medai la lei. Zai pe dage samram ra rezie pei gai bei de lei.

⁷Chipau chângge tingmuî ge keliâbe I ngau de lei, ni, hekaune medai ze mi hing-kadesangbe kau, zai peranchi-kadesangbe kau ramme lei; zai hegeî geu kedibe pung lei; chi ne mâ-teu ze kelauriam-riam, ’ngkîtak-tak ze teu lei, ’nsakpatbe padesuine â pe pî ne kutchim ’ndi lei; hekaune keraîbe ramme gene â peluî châmcheî lei, bekie kereu pung lei.

⁸Pe kie ramme bambe tak I ’nning lage, pie le lau, ni, pe kie ramme ruage pe kie kêdabe pe kie kecheîne ze puakpat lei, zai keraîbe kie chum â pe kie pîbang gene ’ngkeîtat ti de lei; zai pie le lau, aipau kie ge pe mik ramme ziemmena mik gum bam lei, zai pe mui du pung lei, mâ-mâ sam kedibe sa lei.

⁹I senpie lage, Heguang bâmra ramme pebâmrabe ge kai de lei, reheime Wangpeu ne bâm kat ge ka’ntau de lei; pe paî â kebun gum ze hâ lei, pe peîtam â mâ-geû gum ze hâ lei; pe gu heguang-bamrâ â hemi melei gum lei, zai timriang pigua â hemitaube gum lei.

¹⁰Pe suagene hemi geuki ze luapat te lei, changme ne pe guâ ’nggua ze bam lei; chang kereu tum chang kereu pe suage sap te lei, samrambe bam de lei, zai leisi ramme latpat te lei.

¹¹“Chipau luage mâkie gene sam kedibe sabe kuâ ziegene I senpie bam de lei, hekaune je tewchat lu, pe pum tew’nsia ’ndi de lei, zai hemitaube ge rû ra peigaibe riâ I pie bam de lei.

¹²Zai hekaune kêdabe ramme â penui kaheguangbe ze lutua ’ndi de lei, kane penui keringbe ze ting kat zai, hî kat hangge ’nzuak kai bei de lei.

¹³Tingmuî keliâbe gene I mâ-ngau lei, zai pie le lau, tinggîm kemua gene hangkat ziemmena na luigum ze wangkeu lu ze, reheime Wangpeu dage pa wang de lei, zai pe suage pechu penui ne teiwang’nna gai de lei.

¹⁴Zai samrambe pengêudibe, kaheguangbe, pechu pei bei de lei. Chidezai ziemmena zat leine, zai pedeime leine, zai helad leine ne pe guâ ’nggua ra hangge zeu; zai pa kaheguangbe â betingbeta bam gu lei, ga dai ra mak lei, pe ram â mâtew-tewsedu sia dai ra mak lei.

¹⁵“I Danielbe a pum ge a lung ’nning kahereu lei, keliâbe ne achu tewkakeleu lei.

¹⁶Sapme ruage hangkat dage wang’nna lu, airamme leine gu parimba gesang achu ranglia ra I ne ’nneu gai de lei. Dadege pa ne achu ranglia de lei, zai parimba de achu ranglia de lei.

¹⁷‘Ai hekaune ramme pengêudibe medai ze, heguang medai kedei gene patrabe ze de lei.

¹⁸Kane Hulangpeu gu ziemmena ka’nchime ne heguangram ze lu gu lei, zai heguangram ze betingbeta penui ne ’nram ze bam gu, betingbeta betun mak ze bam gu lei,’ ze acheu zeu.

¹⁹“Chidadege hekaune medai rasam peling I chî lei, hekaune keraîbe ramme gene peluî châmcheî ze mi ngauhing-kadesangbe kau ramme, pe geu ramme â hegeî lei, zai pa’nchîn ramme â kangngâgeî lei, pa mâ-teube â kelauriam-riam ze ’ngkîtak-tak ze teu lei, zai ’nsakpatbe padesuine ramme â pe pî ne kutchim ’ndi lei;

²⁰pe peî ge bekie kereu benai pe kie kêdabe pat te lei, zai keraîbe kie kechum â ’ngkeîtattibe rasam, zai chipau kie ge hemik ramme benai pe mui la lei, mâ-mâ kedibe sam ramme sabe pe kangme suadu pengêudi-bi lei.

²¹Zai I senpie bam de lei, zai chipau kie ne ziemmena ka’nchime je kaherei de lei, zai penui je duî lu de lei.

²²Chidadege reheime Wangpeu wang lu, Hulangbe gu ziemmena ka’nchime dage samrambe benai tingnaimikpui wangchang mak tâne heguangram ze ’nram bam ra pei bei de lei.

²³“Aigum ze pa ne rang de lei: ‘Hekaune medai ze kedeirei ge heguangram medai lei, chize â heguangram leine gene châmcheî lei, kedeirei pelane pa ne teu kam ’ndu lei, chaîchim ’ndu zai tewdesuirui ’ndu lei.

²⁴Bekie kereu â, heguang kereu aipau heguangram gene pat ku lei, zai penui chaige kêdabe kat pat ku lei: keraîbe gene pa â châmcheî gu lei, zai pa ne heguang kechum je tewkau gu lei.

²⁵Zai Hulangpeu gu pa ne tingkang gu lei, zai Hulangpeu gu ziemmena ka’nchime je chaigesip kû; zai beting benai hingde tewkeli ra tew gu lei, zai ziemmena ka’nchime je pe ba kangge kum chum ze bepi hang pei gai gu lei.

²⁶Chidezai samrambe bam gu lei, zai pa heguangram ze teitat tu, zai tew’ngga kam ’ndu lei.

²⁷Heguangram ramme gu tingkehube kangge tâtewchibe benai pengêudibe zai samrambe ze Hulangpeu gu ziemmena ka’nchime dage pei gai gu lei; pa kaheguangberam â betun dai ra mak lei, heguangram leine ne pe guâ ’nggua gu, zai pe kuâ pheu ze bam gu lei,’ acheu zeu.

²⁸“Aigene pe rasam kam gai de lei. I Danielbe â I ka’nningbe ne a lung hereu-desang di de lei, a ju du hâmrei tai de lei; acheusedu sam ze â a lung ge tei la lei,” ze kacheu de lei.