Read Zeme Naga DANIEL 8 Bible Online

DANIEL 8 - Zeme Naga bible

DANIEL 8

¹Heguang Belshazzarbe ne heguang changbe tingkum pakechumbe kum ge I Danielbe dage keliâbe achu teilia de lei, raîlangbe lut ge achu liâlube chângge zeu.

²Keliâbe gene I ngau de lei; Elamram ge Susa namdi ge I bam lei; zai keliâbe gene Ulai geukung ge I bam bambe ngau de lei.

³Dadege a mik raklepchu lu I pie gai dege, ’nggeukung ge, pie le lau, meli’nsei bekie kena pungbe sapbam lei; zai bekie kena ze tie lei; kane bekie kat â kêdabe kie sua â tiebi lei, kane bekie tiebe ze â puakpat nâ lei.

⁴Zai meli’nsei ze naimik keu ’mbia bekie kechap kai, tingpeî ’mbia kechap kai, zai tingpî ’mbia kechap kai bambe I ngau lei; chidadege pe suage hekaune kêdabe mî de saptingkangchi lak ti de lei, zai mi-mige ne meupat kai ra ga di de lei. Pe sui-sui ne bam zai kechî-keditew ze pa bam lei.

⁵Zai acheu ze I ’nning lage, pie le lau, kemei’nsei tingrun ’mbene paktedihang de lei, pa’nzet ne pe pî kedei deîtau mak lei, pe mik kena kakge bekie kat ngaumaumeluisui ze bam lei.

⁶Meli’nsei bekie kena pungbe ’nggeukung ge sapbambe I ngaube tailam kemei’nsei pakwang ze, pe lumpumpat ze, giwang de lei.

⁷Meli’nsei je kemei’nsei ne ka’ntâube I pie bam de lei. Pe lumpum-kadesangbe meli’nsei je gi bei ze bekie kena bet ti de lei. Kemei’nsei je tingkang ra meli’nsei â mâ de perantew ta di de lei, kedei ge pechu ’ntâukâu gai lu pechu kutchim ’ndi de lei; pe kut gene meli’nsei je meupatrabe kau mî de ga lei.

⁸Dadege kemei’nsei ze kechî-keditewbi-bi ze bam de lei; peranchibe luage bekie kena ze bet ti de lei; zai pakelei ge bekie medai ze ngau maumeluisui ze tingmik medai gechiauliâ lei.

⁹Zai kie medai ruage kie kat gene bekie poine puaksuâpat lu, tâtewchibe dichu ze tingpî ’mbia, zai tingbia ’mbia, zai heram pengêudiberam ’mbia kiakzua lei.

¹⁰Zai tinggîm tûngchang mak tâne dichu ze, tinggîm baudime je ka’nggi de lei, chige bamme ruage hanggesame, zai hegi ramme gêsa â tuâkeu lu, penui je kutchim ’ndi de lei.

¹¹Eu lei, tinggîm baume gu heguangsinpeu chang ze pe runne pechu tew’ndi lu ze, nai’nsangne herâtewbe tei’mbia lu ze, pebâm ka’nchibe bâm ze tewkau ’ndi de lei.

¹²Baudime ne nai’nsangne rûkambe-râtewbe gene hemuitewbeibe ziegene pe dage pei gai bei de lei; zai samsang â kedei ge tuâkeu gai ’ndi de lei. Zai mâkie ne tewbe leine yi ze duîtat bam di de lei.

¹³Zai ziemmena ka’nchime kat-kat je mâ-samneube I seu de lei, ziemmena ka’nchibe kau hangkat ne “Nai’nsangne rûkambe-râtewbe ge hede ka’ngkabe, mi duânggabe, pebâm ka’nchibe benai tinggîm baume je kutchim ze bambe deu ge keliâbe teiliabe ze ’ndaitie ge bam ra lau?” ze kacheu de lei.

¹⁴“Hechua benai hegî chang na ze haî chum chang dezai ka’nchibe bâm ze pebâmrabe ge tei’nsap kai dai gu lei,” kacheu de lei.

¹⁵Zai acheu lage, I Danielbe ne keliâbe ngaube rimba chî ra I ’nning lage, luakatne a suage ziemmena gum ze sap laleu de lei.

¹⁶Zai Ulai geu kâm kak gene ziemmena kuâ, “Gabriel, keliâbe rimba aipaupeu chî ra ranglia be lau,” ze acheu kube kuâ I seu de lei.

¹⁷Chidadege I sapbe taige pa wang de lei; pa wang bei dadege I hing-desang di ze, ’ngkum I kâukeu di de lei; kane pa ne achu, “Hei ziemmena na, keliâbe ze kedeirei ting betunrabe teiliabe chî le lau,” ze kacheu de lei.

¹⁸Zai pa ne achu ka’mpaube luage I jei’ngkum lu jeikeu di de lei; pa ne achu deî gai lu, achu kuakchu gai bei de lei.

¹⁹Dadege pa ne, “Pie le lau, bechâng Hera lumpum tudkaibe ge ’ndaikau chang gu mei be I ne ningchu teilia gu lei, chize nâlangbe diegaibe hî hangge chang daseu.

²⁰Meli’nsei pe kie kena pungbe nang ngaube ze Media benai Persiame gu heguangme de lei.

²¹Kemei’nsei ze Gresia gu heguang lei; zai pe mik kena kak ze bekie ngaumaumeluisuibe ze heguang keraîbe lei.

²²Zai chi bekie bettibe bâm gene bekie medai puakchube ze pe gu heramdei kat gene heguangram medai pat ku lei, kacheube lei, kane rezieteibe â ’nzua ra mak lei.

²³Zai penui kaheguangberam betun gai zi ra ge, hedeka’ngkame chang kam dezai pe ma siarak ze mi ngauhingbe heguang sam gechukbe chîbe kau pat ku lei.

²⁴Zai pa tâtewchibe peranchi-desang ze chu gu lei, kane pa tâtewchibe ze pe gu rezie ne mak lei. Pa ne mâ-tew’nsiaka’ndibe bam gu, zai mâ-tâtewbe leine ge duîtat bam gu lei. Ziemmena peranchime benai ziemmena ka’nchime je tew’nsia gu lei.

²⁵Zai pa ningching siabe ziegene choateube ’mpuî ge pa ne duîtat ku lei; pe lung ge pe runne pechu tew’ndi gu, penui lungtemichai ze bambe luage ziemmena misonggame je tew’nsia gu lei. Zai heguangsinme gu heguang je pa tingkang gu lei, kane ziemmena baranchi makbe gene pechu tewbet ’ndu lei.

²⁶Hechua hegî kahereibe gu keliâbe ningchu teiliabe ze gesang de lei; kane keliâbe ze ’ngkim ne lau, chize â betinggetiebe châng ne wangchang gu daseu,” kacheu de lei.

²⁷Zai I Danielbe a jiesia, zai hezie ’ndaikiege mei ze I ’nrâ di de lei; zai I chu lu ze heguang tâ I tew kadai de lei; zai keliâbe je I ningdaulak ze bam zai ’nningchi mak tai de lei.