Read Zeme Naga HOSIA 1 Bible Online

HOSIA 1 - Zeme Naga bible

HOSIA 1

¹Aize Tingwang ne Be-eribe na Hosiabe dage Uzziabe, Jothambe, Ahazbe zai Hezekiabe ne Judaram gu heguang changbe zai Joasbe na Jeroboambe ne Israelram ge kaheguangbe ting ge sam ranggaibe ze de lei.

²Tingwang ne Israelme je Hosiabe dagene sam ranggairaîlangbe ting ge, Hosiabe je Tingwang ne, “Tat ze lungkahailapui je ning nâu hang lu le lau, zai ning name du pa gum ze haila gu lei, heramme ne kahailabe tâ tew ze Tingwang je sâu gai ’ndi daseu,” ze rang gai de lei.

³Chidadege pa tat ze Diblaimbe na Gomerle je pe nâu hang lu de lei, zai pa ’mpung ze pe hangge ’mpeumi napoine lungkeu de lei.

⁴Tingwang ne Hosiabe je, “Pe ji hang, Jezrilbe ze ’ntak kai lau; Jezril ge Jehu ki ne kegîbe tâ tewgai’ndibe ziegene Israelme gu heguang peireige a kûmtewrabe mâtie dai ra mak daseu, Israelbe kiria ge kaheguangbe I ne tew’nsau ’ndu de lei.

⁵Zai chipau mai ge Israelme gu hetubaimpi ze Jezril kâm ge I ne rîaubet ’ndu lei,” kacheu de lei.

⁶Gomerle ’mpung dai ze pe na ’mpuimi napoine lungkeu de lei. Zai Tingwang ne Hosiabe je, “Pe ji hang Loruhamale ze ’ntak kai lau, Israelbe kiria peireige penui je lun ra I ngauka’nggiabe bam dai ra mak daseu,

⁷kane Juda ki peireige â, I ngauka’nggiabe bam gu lei, zai I Tingwang penui Rapeu ne penui je ripat kai gu lei, zai penui je ripatkairabe ze â hetubaimpi gene ra mak, hiazutkie gene du mak, herei ka’nggibe gene du ra mak, hekun ramme gene du mak zai hekunchingchuame ziegene du ra mak lei.” Ze kacheu lei.

⁸Pe na Loruhamale je tungsaudibe châng dege Gomerle ’mpung dai ze pe na ’mpeumi napoine lungkeu de lei.

⁹Dadege Tingwang ne Hosiabe je, “Pe ji hangge, Loammi ze ’ntak kai ra lei, Israelme â a gu ziemmena mak zai I â penui Rapeu mak daseu,” ze rang gai lei.

¹⁰Acheuleusedu Israelme â sungkling gu hegitmoîne seikamlak zai ’ndeukamlakbe gum ze bam gu lei; zai aigum ze wangchang gai gu lei, chidezai penui peireige, “Ningnui â a gu ziemmena mak lei,” I acheu sagai’ndibe ’nchui ge penui peireige, “Ningnui a keringbe Rapeu name de lei,” ze acheu gu lei.

¹¹Zai Juda benai Israel gu ziemmename je teiwangherua gai gu lei, penui ruage besuitewpeu hang hangkat je penui kai gu lei; zai penui ram ge penui lungyi ze ka’ntuabe ngau dai gu lei. Jezril gu tingnaimikpui â di-desang gu daseu.