Read Zeme Naga HOSIA 10 Bible Online

HOSIA 10 - Zeme Naga bible

HOSIA 10

¹Israelme â perachî ’nchikeuka’mmibe grepchî hiâm de lei. Perachî pungbi-bipat tâne herâtewbe-kaira ramme pa tew’ngkiebi-bi gai lei; pe ram ze ’ntuahangdibe gum ze pe gu kechia’ndi ze du teleu’mmibi-bi gai de lei.

²Penui ’nningmau de lei; chuna â penui mâu ze penui ne pung himchang gu de lei. Tingwang ne penui gu herâtewbe-kaira ramme tewkau ’ndu, zai penui gu gechia’ndi ramme tew’nsia ’ndu lei.

³Chunage â penui, “Tingwang je anui hingmakbe ziegene anui gu heguang ga lei, zai heguang zene anui hangge pa ne ’ndaikau tewchiduibe la lau?” acheu sa gu daseu.

⁴Pemîgabe sam ramme runne penui sa lei; perua ne kadeseube ramme ge penui samhatkaibe ramme tew gai lei; chidaze helu ge heningpube gepeupâkui ramme gene reheu kesiabe ramme puakpat gum ze samrambe puakpat ku lei.

⁵Beth-aben gu getumpoine ziegene Samaria ge lungme kakedun de lei. Pe gu ziemmena ne chize desui gu lei, zai chi heratluîtewbe je kakellumbe tingkume ne chipau je puîhap ku lei, chipau gu pengêudibe chigene gadibe ziegeneu.

⁶Eu lei, chipau merua ze du Assiriaram ’mbe heguang kedipeu hangge kela pei gai ra teitat tu lei. Ephraim je tew’ngngam gai bu lei, zai pe gu heraluîtewbe je Israel ’ngngam du lei.

⁷Sungkling peireige mâ-telei gum ze Samaria gu heguang â ga gai du lei.

⁸Israelram gu hemui, Aven gu pebâm hube ramme ze tew’nsia ’ndu lei, hetubang benai heturia ramme ne penui gu herâtewbe-kaira peireige puakpat kû lei; dezai penui ne peloa hube ramme je, “Anui je ruichim gai lau,” ze acheu, zai kedeiloa ramme je, “Anui peireige dap kai lau,” ze acheu gu lei.

⁹Gibea ge bambe ting gene nang â hemui gai ’ndi de lei, Hei Israelram, chigene penui tewchu di de lei, Gibea ge herei ne penui je gua’nchuchang mak ta ra semei?

¹⁰Hekuapheumakbe ziemmena peireige kedeibe pei ra I wang gu lei; zai penui gu hemui-helut dêt na bamdibe ziegene penui je kedeibe pei gai dezai heramzat ramme ne penui je tuaguâwang ra tew gai bu lei.

¹¹Ephraim â, chinlube getumsei chêuneibe kau chang ze bam de lei, zai pe guang peluiyibe ze I ne ’nzâ gai ze bam de lei; kane Ephraim je I ne guangkâm luak kai gu lei, Juda hening pu himchang gu lei, Jakob pe runne pe hangge hening kedaiwang himchang gu lei.

¹²Ningnui hang-hangge kapelingbe ling gai lau, hungka’ntipbe rachî gat le lau; chi pugai’ndibe kedei ze kedaiwang gai zu lau, aize Tingwang je peurabe nehî chang di daseu, chidezai pa wang ze ningnui peireige tewka’nringbe ruîgaichi le ra hangge zeu.

¹³Ningnui ne hemui-helut ling gai de lei, ningnui ne ka’ngkuibe rachî gat lu de lei, ningnui ne karasa rachî luteu lu de lei. Ningnui gu hekuntimriang bambe ramme benai ningnui gu ziemmena gekuume misongga bambe geze ningnui ’nnumtew di dadegeu,

¹⁴chipauziegene ningnui gu ziemmena ruagene herei’ncheu zuapat ku lei; zai ningnui gu keriengdi ramme tew’nsia kam ’ndu lei, kahereibe mai ge Shalmanbe ne Beth-arbel tew’nsia ’ndi gum zeu; hêpuime benai penui name je niakdesuirui ’ndu de lei.

¹⁵Chigum ze ningchu du tew gai gu lei, Hei Israel ki gau, nang sia-desangdibe ziegeneu. Chi gechibe wangbe gene Israelme gu heguang je tew’ngga’nzaû gai gu lei.