Read Zeme Naga HOSIA 11 Bible Online

HOSIA 11 - Zeme Naga bible

HOSIA 11

¹Israel hena’ngka â pechu I hung ze bam de lei, zai Ijip gene a na je I kûpat te lei.

²Penui je I kûranbi-bi, a dagene penui tatbi-bi di de lei; Baal je penui herâtewbe benai heraluîtewbe ramme dage mâ-perîmyibe rube ze penui tewtat ze bam de lei.

³Sede Ephraim je tatchi ra geteigaibe ze â I ne de lei, a ba gene penui je I ne teichu gai de lei; kane I ne penui je tew’mmi gai de lei be penui chî mak te lei.

⁴Ngauka’nggiabe ria ramme gene kehungbe kakbe ria ramme gene I ne penui je nguatat te lei, zai penui hangge I â, penui keza ramme gene heput luakpat’nchagaipeu gum chang di de lei, zai penui dage I keikeu ze penui je guî gai bei de lei.

⁵A dage penui helatwangmeu di daze Ijipram ’mbe penui helatwang dai gu lei, zai Assiriaram zene penui gu heguang chang gu lei.

⁶Hiazutkie zene penui gu namdi ramme peireige gechim gu, penui gu keriekemui châp ramme tew’nsia kam gu, zai penui gu keriengdi ramme lung gene penui je tew’ngga kam ’ndu lei.

⁷A gu ziemmena ramme â, a dagene keliktat ra ran-kadesang lei; chidaze penui hangge guangkâm teleukua gai ’nde lei, zai mî ne de chize lutua ra mak lei.

⁸Hei, Ephraim ’ndaigum ze ningchu I saugaichi ra lau? Hei Israel! ’Ndaigum ze ningchu I balapatkaichi ra lau! ’Ndaigum ze Adma peireige gum ze ningchu tewgaichi ra lau! ’Ndaigum ze Zeboiim peireige gum ze ningchu ketadau tewgaichi ra lau. Chigum tew gai ra a lung gene ’ngnginsin de lei, a lung ge ngauka’nggiabe zene puigit ze bam de lei.

⁹A lumpum-kadesangbe tâ ze I tew gai ra mak lei, Ephraim je I tew’nsia dai ra mak lei; I â ziemmena mak ze Hera daseu, chi Ka’nchipeu ningnui ruage bambepeu daseu, zai tew’nsia ra hangge I â wang ra mak lei.

¹⁰Tingwang chai penui sui gu lei, duilui gum ze pa â ’nra gu lei; eu lei, pa pe kuâ ’nra gu lei, dezai tingbia ’mbene pe na ’mpeumi ramme kedun ze wang gu lei;

¹¹’nruine gum ze Ijipram gene liamkelikrua ze, zai Assiriaram gene depeine gum ze penui liamwang gu lei; zai penui ki lam-lam’mbe I ne penui je tat dai ra lang gai gu lei, ze Tingwang ne kacheu de lei.

¹²Ephraim ne karasa ne, Israel ki choâ ne achu choapelak ’ndi de lei; kane Hera ne Juda je â chî’mmi ze lamui rei lei, zai ka’nchipeu kuâpheu ze lamui rei lei.