Read Zeme Naga HOSIA 12 Bible Online

HOSIA 12 - Zeme Naga bible

HOSIA 12

¹Ephraim â tingkai je gekumka’ndui lei, zai naimikpat ’mbia gu tingkai je pa â gua’nsa himmuî lei; kechoa-keduaibe benai ’nggî-kahegeibe penui â tewpung lei; Assiriaram dage penui nguahelîkahedet lei, zai mâ-châdui ze Ijip ’mbe pungtat kai lei.

²Juda peireige Tingwang ne chau’ngkuigaibe lamui lei, zai Jakob je â pe gu ’mpuî luigum ze tewsâ gu lei, zai pe tatew ramme luigum ze pechu peiruî gai gu lei.

³Henabâm lung gene du pe sikinapeu pîmesui pa zam lei, zai pa chîngchu dege Hera je pa kahekang lei.

⁴Angel’mpeu je hepua ze pa ne duî lu de lei, pa hap ze pa luneibe ngau ra ’ngit te lei. Bethel ge Hera je pa kahedau de lei, zai chige Hera ne pechu nguaka’mpau de lei—

⁵baudime Rapeu Tingwang, Tingwang ze pe ji lei:

⁶“Chidaze nang, ning Rapeu ’ngnga gene helatwang zu lau, kehungbe benai ka’nzeibe tei’ntip zu lau, zai ning Rapeu je kuâ’mmi ze bam lau.”

⁷Helîkahedetpeu, hedu pelingmakbe ramme teipeu je pa â tewsâ nei lei.

⁸Ephraim ne rang ze, “Acheuleusedu I â lungyi da, zai a runne a hangge a heu gekuagit kai lu de lei, a tatew leine gene I hemuigai’ndibe ze mî de peupatchi lak ku lei,” kacheu de lei.

⁹I â Ijipram ge ningnui bambe ting gene du ning Rapeu chang ze bambepeu Tingwang lei. Riagailube-ngi ting ge gum ze paîki ramme ge nang lung ra I ne tew gai dai gu lei.

¹⁰I ne kemeume je ka’mpau de lei; keliâbe ramme tewpunggaibe ze I ne de lei, zai kemeume dagene teihelak ze sam’nda ramme I ne pei gai de lei.

¹¹Gilgal ge hemui-helut bam lêuzai â chize peruânggabe chang gai himchang gu lei; Gilgal ge getumsei ramme ne herâtew gai zai â, penui gu herâtewbe-kaira ramme ze helu ge tingchukoa bambe gum chang gai du lei.

¹²(Jakob â Aram dei ’mbe pak kai di de lei, chige pa henâu’mbang ze bam de lei, zai henâu hang ziegene meli je pa reî de lei.)

¹³Tingwang ne kemeume tatew gene Israel je Ijip gene nguahang de lei, zai kemeume ne nguatâtewbe gene pechu ze tei’nggim gai bei de lei.

¹⁴Ephraim ne pe lumpum-desang ra tew gai bei de lei; chidaze pe gu hejaipâu ze pe peireige pe Rapeu ne tuâ gai gu lei, zai pa ne saka’nsiabe ramme ze pe peireige teiwang gai dai gu lei.