Read Zeme Naga HOSIA 13 Bible Online

HOSIA 13 - Zeme Naga bible

HOSIA 13

¹Ephraim ne sa gai bei dege, ziemmename kakedun de lei; Israelram ge pechu â tei’ngngu gai ze bam de lei; kane Baal ziegene pe mâu hangge tew gai lu ze pa chai di de lei.

²Zai chunage penui hemui gai ’ngkiebi-bi, zai chiamlube heraluî ramme penui hangge tew, chiamchibe kau tatew ramme gene heraluîtewbe ramme ze gepût ne chiam zun gai lei. Airamme ge herâtew gai lau, ze penui ne kacheu de lei. Ziemmename ne getumpoine ramme je kakeput lei!

³Chipauziegene penui â, hechua gu muangziu gum zai gazisidibe kezikdui gum, kechaîpung gene chêurie liamleptattibe gum, zai leubaki gene mika patbe gum chang gai du lei.

⁴I â Ijipram ge nang bambe ting gene du ning Rapeu Tingwang lei; achu sâu ze hera kêdabe je nang chî mak lei, zai achu sâu ze tewka’nringpeu kêdabe ga lei.

⁵Kedeichangbe heram lungge, tingkangram ge ningchu chîgaipeu ze I de lei;

⁶kane penui teupuigit lu dege â ’nggeu di de lei, zai penui lung ze ’ngngangrie ze bam di de lei; chipauziegene achu penui ’ngngaî ’ndi de lei.

⁷Chidaze I â penui hang duilui gum chang gu, zai keriakkau gum ze ’mpuî’ntai ge lîmkua ze bam gu lei.

⁸Pe poine ramme je sut-tattibe hegumpui gum ze penui je I ne chup ku lei, I ne penui ga kuipedak kai bu lei, zai chige I ne penui je duilui gum ze teu kam ’ndu lei, penui je hekaune ne ka’nsiabe helî gum zeu.

⁹Hei Israel, I ne ningchu tew’nsia gu lei; châu ne ningchu ’ngngâchi dui lau?

¹⁰Nang ne rangbe, “A hangge heguang benai heguangsinme pei lau,” ze kacheume bau, chunage ningchu tew’nring gai ra, ning gu heguang ’ndaige la lau?

¹¹A râtabe gene ningchu heguang ramme I pei gai bei de lei, zai a lumpumbe gene penui je I teitat ’ndi de lei.

¹²Ephraim gu hemui-helut ze â kanggit kai lu la de lei, pe gu hemui â kaigekua gai la de lei.

¹³Henalung ra ’nraka’nsuabe hangge wang de lei, kane pa â ’mpeumi napoine kemiebe kau lei; chunage henabâm gu kemui ge pe runne pechu peipat kai mak daseu.

¹⁴Kechaiberam gu rezie gene penui je I ripat kai gu semei? Kechaibe gene penui je I meupat kai gu semei? Hei kechaibai, ning gu tewsabe ramme ’ndaige la lau? Hei, Kechaiberam gau, ning gu tewka’nsiabe ’ndaige la lau? Ngauka’nggiabe mikpie a dage ga lei.

¹⁵Hekubang gum ze pa ’ndiakri ze bam leusede, naimik pat ’mbia gu tingkai, Tingwang gu tingkai, tingkangram gene zuachu ze guiwang gu lei; zai pe gu depin ze changkeu du, zai pe gu dekuaki ramme ze changku gai du lei; chize ne pe gu pemîhungbe merua zat leine kaigekuagaibe guigechungtua kam ’ndu lei.

¹⁶Samariaram â pe mâu ze pa ne pung gu lei, pe Rapeu je pa ne hekangbeibe ziegeneu; hiazutkie ne penui je gî gu lei, penui na ’ngngiêne ramme je getaudesuirui gai gu, zai penui ruage ’mpuimi ka’mpungme hebung tit ku lei.